IHARUANA TIMOTEO DEKENAI

1 Lau Paulo, Dirava ena ura dainai lau be Keriso Iesu ena aposetolo tauna ai lau lao, unai be Dirava ese ia gwauhamatalaia maurina hegeregerena, unai mauri be Keriso Iesu murinai idia raka taudia ese idia abia.+ 2 Lau ese egu lalokau natuna Timoteo dekenai inai revareva lau torea.+

Namona be Tamana Dirava bona iseda Lohiabada Keriso Iesu amo hebogahisi hereadaena bona maino oi abia.

3 Lau be egu sene taudia bamona, mai lalomamina goevana ida Dirava ena hesiai gaukara helagana lau karaia. Bona Dirava lau tanikiu henia, badina dina bona hanuaboi ia dekenai lau noinoi goadagoada negadia ai, oi lau laloaboio lasi. 4 Emu taitai lau laloa neganai, lau ura bada oi lau itaia, unai amo egu moale do ia bada. 5 Emu abidadama momokanina lau laloa,+ unai abidadama be guna emu tubuna hahine Loi bona emu sinana Eunike ese idia hahedinaraia, bona lau diba momokani oi danu be unai abidadama oi hahedinaraia.

6 Unai dainai oi lau hadibaia lou, Dirava amo oi abia harihari gauna oi habadaia be namo, guna egu imana be oi latanai lau atoa neganai oi abia gauna unai.+ 7 Dirava ese ita dekenai ia henia lauma helaga ese gari ia havaraia lasi,+ to siahu,+ lalokau, bona laloa maoromaoro karana ia havaraia. 8 Unai dainai iseda Lohiabada ena sivarai oi harorolaia karana be oi hemarailaia lasi.+ Bona ia dainai dibura ruma ai lau noho be oi hemarailaia lasi.+ To Dirava ena siahu dekenai oi tabekau bona sivarai namona dainai oi davaria hisihisi oi haheaukalaia.+ 9 Ita ia hamauria bona ita ia boiria helaga taudia ai ita lao totona,+ iseda gaukara dainai lasi, to iena ura bona hebogahisi hereadaena dainai.+ Gunaguna momokani, ia ese unai hebogahisi hereadaena be Keriso Iesu amo ita dekenai ia hahedinaraia. 10 To hari unai be iseda Hamauria Tauna, Keriso Iesu,+ ena amo ia hedinarai goevagoeva. Ia ese mase ia haorea+ bona sivarai namona amo diari ia hahedinaraia,+ edena bamona ta ese ia dika diba lasi maurina ia abia diba.+ 11 Unai dainai lau ia abia hidi, haroro tauna, aposetolo tauna, bona hadibaia tauna ai lau lao totona.+

12 Unai gaudia dainai hisihisi lau abia danu,+ to lau hemarai lasi.+ Badina lau abidadama henia Diravana lau diba, bona lau abia dae ia dekenai lau henia gauna be do ia naria namonamo ela bona hahemaoro dinana.+ 13 Lau amo oi kamonai hereva momokani* ena lalohadai badana be oi dogoatao noho mai abidadama bona lalokau ida,+ badina oi be Keriso Iesu ida oi hakapua. 14 Oi dekenai ia henia dava bada gauna be lauma helaga amo oi gimaia, unai lauma helaga be ita dekenai ia noho.+

15 Oi diba vadaeni, Asia ena provinsi ai idia noho taudia ibounai+ ese lau idia rakatania. Fugelo bona Heremogene danu be unai bamona idia karaia. 16 Lohiabada ese Onesiporo ena ruma bese dekenai hebogahisi ia hahedinaraia be namo,+ badina ia ese hanaihanai lau ia hagoadaia, bona dibura ruma ai lau noho neganai, lau dainai ia hemarai lasi. 17 To Roma dekenai ia mai neganai, ia ese lau ia tahua namonamo bona lau ia davaria. 18 Namona be hahemaoro dinana ai Lohiabada Iehova* ese ia dekenai hebogahisi ia hahedinaraia. Bona Efeso dekenai ia karaia hesiai gaukara ibounai be oi diba namonamo.

2 Unai dainai oi, egu natuna e,+ Keriso Iesu ese ia hahedinaraia hebogahisi hereadaena dainai, goada oi abia noho. 2 Lau amo oi kamonai hereva be taunimanima momo ese idia hamomokania danu,+ unai hereva be abidadama taudia dekenai oi henia, unai amo idia danu be do idia hegeregere ma haida idia hadibaia totona. 3 Oi be Keriso Iesu ena tuari tauna namona dainai,+ hisihisi oi haheaukalaia be namo.+ 4 Tuari tauna be bisinesi karadia* idauidau lalonai do ia vareai lasi, badina ia ura tuari totona ena ladana ia atoa tauna ena lalonamo ia abia. 5 Bona bema ta be gadara ta lalonai ia vareai, ia ese gadara ena taravatu ia badinaia neganai, kwalimu ahuna ia abia diba.+ 6 Biru tauna ia gaukara goadagoada dainai, uma ena anina ia abia guna be namo. 7 Lau gwauraia herevadia oi laloa noho, bona Lohiabada ese gau ibounai lalonai, oi dekenai laloparara* do ia henia.

8 Namona be oi laloatao, Iesu Keriso be mase amo ia toreisi lou,+ bona ia be Davida ena bese amo.+ Unai be lau harorolaia sivarai namona,+ 9 bona unai dainai lau be hisihisi lau abia noho, bona kara dika tauna ta bamona dibura ruma ai lau idia atoa.+ To, Dirava ena hereva idia koua lasi.+ 10 Unai dainai Dirava ese ia abia hidi taudia totona gau ibounai lalonai lau haheauka noho,+ unai amo idia danu be Keriso Iesu amo hahemauri bona noho hanaihanai hairaina idia abia diba. 11 Inai hereva be momokani: Oibe, bema ia ida ita mase hebou, vadaeni ia ida do ita noho hebou.+ 12 Bema ita haheauka noho, ita be ia ida king taudia bamona do ita lohia,+ bema ia ita gwauraia hedinarai lasi, ia ese ita do ia gwauraia hedinarai lasi danu.+ 13 Ena be ita ese Dirava ena hereva ita badinaia lasi, to ia be hanaihanai iena hereva ia badinaia, badina ia be sibona ena hereva ia hakoikoia diba lasi.

14 Idia oi hadibaia noho inai gaudia idia laloa, bona Dirava vairanai idia oi hamaoroa, hereva idauidau dainai do idia hepapahuahu lasi. Unai be anina lasi, badina unai ese idia kamonai taudia edia abidadama ia hadikaia. 15 Do oi gaukara goada Dirava vairanai iena lalonamo oi abia totona, bona oi be ia karaia gaukara dekenai ia hemarai lasi tauna bamona, hereva momokani oi hadibaia maoromaoro.+ 16 To helaga gaudia idia hadikaia anina lasi herevadia oi dadaraia,+ badina unai hereva idia gwauraia taudia be Dirava ia ura lasi karadia do idia habadaia, 17 bona edia hereva be toto dikana bamona do ia bada ia lao. Humenaio bona Pileto be unai bamona taudia,+ 18 idia ese hereva momokani idia rakatania, idia gwau toreisi lou be ia vara vadaeni,+ bona haida edia abidadama idia hadikaia. 19 To Dirava ese ia haginia badina aukana be ia gini noho, bona ia latanai inai toretore ia noho: “Iehova* be ena taunimanima ia diba,”+ bona “Iehova* ena ladana ai idia boiboi taudia ibounai+ ese kara dika idia dadaraia be namo.”

20 Ruma badana ta lalonai, golo bona siliva uro sibona idia noho lasi, to au bona raro uro danu. Bona haida be mai anina bada gaudia totona idia gaukaralaia, to haida be anina maragi gaudia totona idia gaukaralaia. 21 Unai dainai, bema ta be anina maragi totona idia gaukaralaia uro amo ia noho daudau, ia be mai anina bada gaukaradia totona idia gaukaralaia urona ai do ia lao, do ia helaga, bona ena biaguna ese ia gaukaralaia diba, bona do ia noho hegaegae gaukara namodia ibounai ia karaia totona. 22 Vadaeni matamata taudia ese idia abia ura idauidau amo oi heau siri, to mai kudou goevana ida Lohiabada ena ladana ai idia boiboi taudia ida kara maoromaoro, abidadama, lalokau, bona maino oi tahua noho.

23 Ma danu, kavakava bona anina lasi hepapahuahu oi dadaraia,+ badina oi diba unai ese heai idia havaraia. 24 Lohiabada ena hesiai tauna ia heai be anina lasi, to gau badana be taunimanima ibounai ia hebogahisi henia,*+ ia hegeregere hadibaia totona, ia idia kara dika henia neganai ia haheauka,+ 25 bona mai manau ida gwau-edeede taudia ia hadibaia.+ Reana Dirava ese dala do ia kehoa idia helalo-kerehai* totona, bena hereva momokani ena diba maoromaoro do idia abia,+ 26 unai amo idia laloparara bena Diabolo ena tarapu amo do idia raka siri, badina ia ese idia ia tarapua iena ura idia karaia totona.+

3 To namona be inai oi diba, dina gabedia ai+ nega aukadia do idia vara, unai ese taunimanima do idia hametaua bada. 2 Badina taunimanima be sibona do idia laloa bada, moni do idia ura henia bada, do idia hekokoroku, hadikaia herevadia do idia gwauraia, tama sina do idia kamonai henia lasi, tanikiu karana do idia diba lasi, ma haida do idia badinaia lasi,* 3 famili lalonai lalokau do ia noho lasi, do idia lalotamona lasi, ladana do idia hadikaia, sibona do idia biagua lasi, do idia dagedage, kara namodia do idia ura henia lasi, 4 edia turadia edia mauri hadikaia dalana do idia karaia, do idia kwara auka, do idia heagi, moale karadia do idia ura henia bada, bona Dirava do idia lalokau henia lasi, 5 Dirava badinaia karana be toana sibona do idia hahedinaraia, to edia mauri ai Dirava do idia badinaia lasi,+ unai bamona taudia oi dadaraia. 6 Idia huana amo tatau haida idia hedinarai, bona aonega dalana ai ruma bese taudia idia koia, bona hahine haida, idia manoka bona kara dika ese ia hametaua bona ura idauidau idia badinaia hahine unai, idia hakaua kerere. 7 Unai hahine be hanaihanai diba idia tahua, to idia hegeregere lasi hereva momokani ena diba maoromaoro idia abia totona.

8 Iane bona Iambre ese Mose idia dadaraia hegeregerena, unai taudia danu be hereva momokani idia dadaraia noho, edia lalohadai be dika momokani, Dirava ese idia ia dadaraia badina abidadama ena dala idia badinaia lasi. 9 To, unai bamona do idia karaia noho lasi, badina edia kavakava karana be taunimanima ibounai ese do idia itaia, guna unai tatau rua edia kavakava karana idia itaia bamona.+ 10 To oi ese egu hadibaia hereva, mauri dalana, tahua gauna, abidadama, boga-auka, lalokau, bona haheauka karana oi badinaia namonamo.+ 11 Danu, Antioka,+ Ikonio,+ bona Lusitera+ ai lau davaria dagedage bona hisihisi oi diba, to lau ese unai dagedage karadia lau haheaukalaia bona idia ibounai amo Lohiabada ese lau ia hamauria.+ 12 Oibe, Keriso ida idia hakapua bona idia ura Dirava badinaia karana idia hahedinaraia taudia ibounai be dagedage do idia davaria danu.+ 13 To kara dika taudia bona koikoi taudia ese edia kara dika do idia habadaia momokani, idia ese ma haida do idia hakaua kerere bona ma haida ese idia do idia hakaua kerere.+

14 To oi dibaia gaudia do oi badinaia noho, bona oi abia dae idia be momokani,+ badina oi diba daidia amo unai gaudia oi dibaia, 15 bona oi beibi negana amo+ Toretore Helagadia oi diba,+ unai ese oi dekenai aonega ia henia bona Keriso Iesu abidadama henia karana amo hahemauri oi abia.+ 16 Toretore Helagadia be Dirava ena siahu amo idia torea,+ bona ia be mai ena namo hadibaia totona,+ sisiba henia totona, gau idauidau hamaoromaoroa totona, bona kara maoromaoro ai matahakani henia totona,+ 17 unai amo Dirava ena hesiai tauna be ia hegeregere momokani, bona ia noho hegaegae gaukara namodia ibounai ia karaia totona.

4 Keriso Iesu be do ia hedinarai+ bona iena Basileia+ lalonai do ia mai bona mauri taudia bona mase taudia+ do ia kota henia.+ Ia bona Dirava vairanai oi lau oda henia, 2 nega namodia bona nega dikadia ai, Dirava ena hereva oi harorolaia goadagoada.+ Mai haheauka ida bona hadibaia dala namona ai idia do oi sisiba henia,+ oi hereva auka henia, bona oi hagoadaia.+ 3 Badina nega do ia mai bona idia ese hereva momokani* do idia ura henia lasi.+ To sibona edia ura hegeregerena, hadibaia taudia do idia abia, idia ura henia gaudia sibona idia kamonai totona.+ 4 Idia ese hereva momokani do idia kamonai henia lasi, to sivarai koikoidia do idia kamonai henia. 5 To gau ibounai dekenai oi laloa maoromaoro noho, dika oi haheaukalaia,+ evanelia tauna ena gaukara oi karaia,* bona emu hesiai gaukara oi hagugurua momokani.+

6 Lau be idia bubua vadaeni wain boubou hegeregerena,+ bona egu ruhaia negana+ be ia kahirakahira. 7 Tuari namona ai lau tuari vadaeni,+ heau helulu lau haorea vadaeni,+ bona Keristani abidadama lau badinaia vadaeni. 8 Hari nega amo lau totona kara maoromaoro ena korona ia noho hegaegae.+ Lohiabada, hahemaoro tauna maoromaorona,+ ese hahemaoro dinana ai lau dekenai unai ahuna do ia henia.+ Lau sibona lasi, to mai edia ura bada ida iena hedinarai negana idia naria taudia ibounai danu ese unai ahuna do idia abia.

9 Oi hekwarahi lau dekenai oi mai haraga totona. 10 Dema+ be inai nega oromana* ia ura henia bada dainai lau ia rakatania, bona Tesalonika dekenai ia lao. Kresike be Galatia dekenai ia lao, bona Tito be Dalamatia dekenai ia lao. 11 Luka sibona be lau ida ia noho. Namona be Mareko danu oi hakaua mai, badina hesiai gaukara lalonai lau do ia durua. 12 To lau ese Tukiko+ be Efeso dekenai lau siaia lao vadaeni. 13 Oi mai neganai, Troa dekenai Kapo ida lau rakatania keru dabua oi mailaia. Bona lokua toretoredia, animal kopina amo idia karaia toretore gaudia unai, oi mailaia.

14 Kopa gaukaralaia namonamo tauna, Alesana ese lau dekenai metau momo ia henia. Iena kara hegeregerena Iehova* ese davana do ia henia.+ 15 Namona be ia dainai do oi naria namonamo danu, badina ia ese iseda hereva ia dadaraia momokani.

16 Lauegu kota ginigunana ai, tau ta ese lau ia durua lasi, to idia ibounai ese lau idia rakatania. Namona be Dirava ese edia kara ena davana ia henia lasi. 17 To, Lohiabada ese lau ia durua bona lau ia hagoadaia, vadaeni sivarai namona lau harorolaia guguru, bona idau taudia ibounai ese idia kamonai.+ Bona Lohiabada ese laiona ena uduna amo lau ia hamauria.+ 18 Lohiabada ese dika ibounai amo lau do ia hamauria bona iena guba Basileia totona lau do ia naria.+ Ia dekenai hairai ia noho ela bona hanaihanai. Amen.

19 Prisikila bona Akwila+ bona Onesiporo ena ruma taudia dekenai egu hanamoa hereva do oi henia.+

20 Erasito+ be Korinto dekenai ia noho, to Tropimo+ be ia gorere dainai Mileto dekenai lau rakatania. 21 Keru negana ia do ginidae lasi neganai, oi mai haraga.

Eubulo, Pude, Lino, Klaudia, bona tadikaka ibounai ese oi dekenai edia hanamoa hereva idia siaia.

22 Emu laloa daladia ibounai lalonai Lohiabada be oi do ia hanamoa. Iena hebogahisi hereadaena be umui ida ia noho.