IAMESI ENA REVAREVA

1 Lau Iamesi,+ lau be Dirava bona Lohiabada Iesu Keriso edia hesiai tauna. Gabu idauidau idia lao iduhu 12 dekenai

Egu hanamoa hereva lau siaia.

2 Lauegu tadikaka e, hahetoho idauidau umui davaria neganai, umui moale.+ 3 Badina umui diba, emui abidadama, inai dala ai idia tohoa gauna ese emui haheauka karana do ia hagoadaia.+ 4 Bona umui haheauka noho karana amo sibona umui hadibaia namonamo, unai amo do umui hegeregere momokani, bona gau ibounai do umui karaia namonamo, gau ta dekenai do umui dabu lasi.+

5 Vadaeni bema umui ta ena aonega be hegeregere lasi, namona be Dirava dekenai ia noinoi noho,+ bona Dirava ese ia dekenai do ia henia, badina ia be ibounai dekenai mai hariharibada ida ia henia,+ bona ia gwau henidia lasi.*+ 6 Namona be unai tauna be mai abidadama ida ia noinoi noho,+ bona ia daradara lasi momokani,+ badina ia daradara tauna be davara ena hurehure bamona, lai ese ia odaia lao odaia mai. 7 Namo lasi unai tauna ia laloa ia be Iehova* amo gau ta do ia abia. 8 Ia be lalorua tauna+ bona dala tamona ia badinaia lasi.

9 To ogogami tadikakana ia moale* be namo, badina Dirava matanai ia be ladana badana ia abia,+ 10 to taga tauna be ladana maragi ia abia dainai do ia moale,+ badina taga tauna be uma ena flaoaflaoa bamona do ia ore. 11 Dina ia daekau bona ena siahu be bada dainai tubutubu gauna ia kakoro, ena flaoaflaoa ia moru, bona ena hairai ia ore hegeregerena, taga tauna danu be ena taga ia tahua noho lalonai do ia boio ia lao.+

12 Hahetoho ia haheaukalaia noho tauna be ia moale,+ badina Dirava ese ia lalonamo henia neganai, ia be mauri ena korona do ia abia,+ Iehova* ese unai be ia idia lalokau henia noho taudia dekenai ia gwauhamatalaia.+ 13 Tau ta ese hahetoho ia davaria neganai, namo lasi ia gwau: “Dirava ese lau ia tohoa noho.” Badina ta ese dika gaudia amo Dirava ia tohoa diba lasi, bona Dirava ese dika gaudia amo ta ia tohoa lasi. 14 To ta be sibona ena ura ese ia tohoa, unai ura ese ena lalona ia veria bona ia koia.*+ 15 Bona unai ura ia rogorogo* neganai kara dika ia havaraia, vadaeni kara dika ia karaia guguru murinai, mase ia vara.+

16 Lauegu lalokau tadikaka e, sibona umui koia lasi. 17 Harihari gaudia namodia ibounai bona harihari gaudia goevadia ibounai be ataiai amo,+ guba ai idia diari gaudia* edia Tamana amo idia diho mai.+ Dina ena laulau be ia senisi diba, to Tamana be ia senisi diba lasi.+ 18 Iena ura dainai, hereva momokani amo ita mauri diba.+ Unai bamona ia karaia unai amo ia havaraia taudia huana amo ia ese ita ia abia hidi guna.+

19 Lauegu lalokau tadikaka e, namona be inai umui diba: Taunimanima ibounai be do idia kamonai haraga, to do idia hereva haraga lasi,+ bona do idia badu haraga lasi,+ 20 badina tau ta ena badu ese Dirava ena kara maoromaoro ia havaraia diba lasi.+ 21 Unai dainai, kara mirodia ibounai bona kara dikadia ibounai* do umui atoa siri,+ bona mai manau ida Dirava ese emui lalona ai ia hadoa herevana umui abia dae, unai ese umui ia hamauria diba.

22 Namona be hereva badinaia taudia ai umui lao,+ to kamonai taudia sibona lasi. Bema umui kamonai kava sibona, lalohadai koikoidia amo umui sibona umui koia unai. 23 Badina bema tau ta be hereva ia kamonai sibona, to ia badinaia lasi,+ ia be hevarivari dekenai sibona ena vairana ia itaia noho tauna bamona. 24 Ia be sibona ia itaia bena ia lao bona maoromaoro ia laloaboio ia be edena bamona tauna. 25 To taravatu goevadaena,+ ura kwalimu gauna unai, ia itaia noho bona ia badinaia noho tauna be do ia moale, badina ia be hereva ia kamonai sibona lasi, to karana ia karaia danu.+

26 Bema ta ia laloa ia be Dirava ia tomadiho henia tauna, to ena uduna ia biagua lasi,+ ia be sibona ena kudouna ia koia noho, bona ena tomadiho karana be anina lasi. 27 Iseda Dirava bona Tamana ena matanai ia goeva bona miro lasi tomadiho dalana be inai: Tama sina idia mase natudia+ bona vabu+ be edia hisihisi+ lalonai do ita naria, bona inai tanobada ena kara mirodia amo do ita noho daudau.+

2 Egu tadikaka e, umui ese iseda hairai Lohiabada Iesu Keriso umui abidadama henia lalonai, haida sibona umui ura henia noho, a?+ 2 Bema emui hebou dekenai tau ta ia vareai bona ia be dabua hairaina ia karaia bona ena ima kwakikwaki ai golo rini idia noho, to dabua mirona ia karaia ogogami tauna ta danu ia vareai, 3 umui be mai moale ida dabua hairai ia karaia tauna umui itaia bona umui gwau, “Inai gabu namona dekenai oi helai,” bona ogogami tauna dekenai umui gwau, “Oi gini noho,” eiava umui gwau, “Lauegu aena atoa gauna badinai oi helai,” a?+ 4 Bema unai bamona umui karaia, umui huanai orea ta be orea ta ia hereaia,+ bona umui be diadi taudia bamona hahemaoro gagevana umui karaia vadaeni.+

5 Egu lalokau tadikaka e, umui kamonai. Inai tanobada taudia ese idia gwauraia ogogami taudia be Dirava ese ia abia hidi edia abidadama idia habadaia+ totona, ani? Oibe, ia abidia hidi Basileia ena ahuna idia abia totona, unai be ia idia lalokau henia taudia dekenai ia gwauhamatalaia.+ 6 To umui ese ogogami taudia umui matauraia lasi. Daika ese umui idia hahisia+ bona kota dekenai umui idia veria lao? Taga taudia, ani? 7 Umui abia ladana namona be idia ese idia hadikaia, ani? 8 Toretore Helagadia ia gwau, “Namona be emu dekena tauna oi lalokau henia, oi sibona oi lalokau henia hegeregerena.”+ Bema unai taravatu hereadaena umui badinaia noho, vadaeni kara namona umui karaia unai. 9 To bema haida sibona umui ura henia,+ unai be umui kara dika noho, bona taravatu ese umui be taravatu utua taudia bamona ia hahemaoro henia.+

10 Badina bema tau ta ese Taravatu* ibounai ia badinaia, to tamona sibona ia utua, ia be Taravatu ibounai utua tauna ai ia lao unai.+ 11 Dirava ia gwau, “Namo lasi umui heudahanai,”+ bona danu, “Namo lasi umui ala-ala.”+ Vadaeni, bema oi heudahanai lasi to oi ala-ala, oi be taravatu utua tauna ai oi lao unai. 12 Umui be ura kwalimu taudia dainai, taravatu hegeregerena umui do idia kota henia. Unai dainai, ura kwalimu taudia bamona do umui hereva bona kara.+ 13 Badina hebogahisi ia hahedinaraia lasi tauna be hebogahisi lasi ida do idia hahemaoro henia.+ Oibe, hebogahisi karana ese hahemaoro karana ia hereaia.

14 Egu tadikaka e, bema ta ia gwau ia be mai ena abidadama, to kara be lasi, unai ena namo be dahaka?+ Unai abidadama ese ia do ia hamauria diba, a?+ 15 Bema tadikaka eiava taihu ta be dabua lasi bona unai dina ena aniani totona ia hegeregere lasi, 16 to umui ta be ia dekenai ia gwau, “Oi lao bona oi lalohekwarahi lasi. Hari dina ena aniani bona dabua do oi davaria,” to ia durua totona ena dabu gauna ta umui henia lasi, unai ena namo be dahaka?+ 17 Unai hegeregerena, abidadama mai ena kara lasi be mase gauna.+

18 To tau ta do ia gwau: “Oi be mai emu abidadama, bona lau be mai egu kara. Edena dala ai lau dekenai emu abidadama oi hahedinaraia diba bema kara namo oi karaia lasi? Egu abidadama be egu kara namodia amo oi dekenai do lau hahedinaraia.” 19 Oi abia dae Dirava be tamona sibona, a? Unai be namo herea. To demoni danu be unai idia abia dae bona idia heudeheude.+ 20 To oi, anina lasi tauna e, inai oi diba lasi, a? Abidadama mai ena kara lasi be anina lasi. 21 Iseda tamana Aberahamo ese ena natuna Isako be boubou patana latanai ia atoa murinai, iena kara dainai Dirava ese ia gwauraia kara maoromaoro tauna.+ 22 Oi diba, Aberahamo ena abidadama bona kara be idia gaukara hebou, bona ena kara ese ena abidadama ia hamomokania,+ 23 bona Toretore Helagadia edia hereva idia guguru. Ia gwau: “Aberahamo ese Iehova* ia abidadama henia, bona ia ese Aberahamo ia gwauraia maoromaoro,”+ bona ia idia gwauraia Iehova* ena turana.+

24 Hari umui diba, tau ta be ena abidadama sibona amo lasi, to ena kara dainai ia do idia gwauraia kara maoromaoro tauna. 25 Unai hegeregerena, ariara hahinena Rahaba ese ia karaia karana dainai Dirava ese ia danu ia gwauraia kara maoromaoro hahinena, badina ia ese gwaukau taudia ia abia dae bona dala idauna ai idia ia siaia lao, ani?+ 26 Momokani, tauanina be laga* lasi neganai, ia be mase gauna,+ unai hegeregerena abidadama mai ena kara lasi be mase gauna.+

3 Egu tadikaka e, namo lasi umui ibounai be hadibaia taudia ai umui lao, badina ita diba hadibaia taudia be hahemaoro metauna do idia abia.+ 2 Ita ibounai be nega momo ita kerere.+ Bema ta be ena hereva dekenai ia kerere lasi, ia be goevadae tauna, bona ia hegeregere ena tauanina ibounai ia biagua totona. 3 Bema hosi edia uduna dekenai auri ita atoa, iseda ura idia badinaia totona, vadaeni edia tauanina ibounai ita biagua diba. 4 Mani bouti umui laloa danu: Ena be idia be bada herea bona lai bada ese idia odaia, to tari maragina ese ia biagua, bona taria tauna ena ura gabuna dekenai ia lao.

5 Unai hegeregerena danu, malana be tauanina ena kahana maragina ta, to hekokoroku herevadia ia gwauraia momo. Lahi umui laloa. Lahi maragina ese uda bada herea ia araia diba! 6 Malana be lahi bamona.+ Iseda tauanina ena kahana ibounai amo, malana be kara dika amo ia honu, badina tauanina ibounai ia hamiroa+ bona ta ena mauri ibounai ia gabua ore diba, Gehena* ese gau ta ia gabua ore hegeregerena. 7 Dagedage animal, manu, idia rau animal, bona davara lalonai idia noho animal idauidau ibounai be taunimanima ese idia hamanadaia diba bona idia hamanadaia vadaeni. 8 To malana be tau ta ese ia hamanadaia diba lasi. Ia be ta ese ia biagua diba lasi bona ia dika momokani, bona tau ta ia hamasea poisini amo ia honu.+ 9 Malana ita gaukaralaia, Iehova* iseda Tamana, ita hanamoa totona, to danu ita gaukaralaia, “Dirava ese ena toana hegeregerena”+ ia havaraia taudia ita hadikaia totona. 10 Uduna tamona amo hanamoa hereva bona hadikaia hereva ita gwauraia.

Egu tadikaka e, unai bamona gaudia idia vara be maoro lasi.+ 11 Ranu namona* bona ranu iditana be ranu guri tamona amo idia daekau lasi, ani? 12 Egu tadikaka e, fig auna ese olive huahua ia havaraia diba lasi, eiava greips auna ese fig huahua ia havaraia diba lasi, ani?+ Bona davara ranuna ese ranu namona ia havaraia diba lasi.

13 Umui huanai daika be mai ena aonega bona laloparara? Namona be ena kara namodia amo ia hamomokania ena gaukara be mai manau ida ia karaia. Unai manau karana be aonega amo ia vara. 14 To bema emui kudouna ai mama+ bona badu* karadia+ idia noho, namo lasi heagi+ bona koikoi herevadia amo hereva momokani umui hadikaia. 15 Unai be ataiai amo ia mai aonegana lasi. Ia be tanobada gauna,+ edia kara be animal bamona bona demoni amo ia mai. 16 Badina mama bona badu* idia noho neganai, heiriheiri bona dika gaudia ibounai danu do idia noho.+

17 To ataiai amo ia mai aonegana ia abia tauna be ia kara goeva,+ ia be maino tauna,+ ia laloa maoromaoro,+ hereva ia badinaia haraga, iena hebogahisi be bada, bona kara namodia ia hahedinaraia,+ taunimanima edia toana ia laloa lasi,+ bona ia kara koikoi lasi.+ 18 Danu, maino idia karaia taudia+ ese kara maoromaoro ena huahua be maino negana+ ai idia hadoa.

4 Umui huanai hepapahuahu bona heai idia vara ena badina be dahaka? Unai be tauanina ena ura amo idia vara, bona unai ura be umui lalonai idia tuari noho.+ 2 Unai dainai gau ta umui ura, to umui ura henia gauna umui abia lasi. Umui inai heheni noho bona ma haida edia kohu umui ura dikadika, to umui abia diba lasi. Umui heatu bona tuari noho.+ Danu, bema unai gauna umui abia lasi, unai ena badina be umui noinoi lasi. 3 Umui noinoi neganai, umui abia lasi, badina umui be ura kererena totona umui noinoi. Umui ura unai gaudia umui gaukaralaia tauanina ena ura dikadia hagugurua totona.

4 Heudahanai taudia* e, tanobada tura henia karana amo Dirava umui inai henia. Unai umui diba lasi, a? Unai dainai, bema ta ia ura tanobada ena turana ai ia lao, ia be sibona Dirava ena inai tauna ai ia halaoa.+ 5 Toretore Helagadia ia gwau: “Iseda lalona ai mama ia noho dainai, hanaihanai gau idauidau ita ura henia dikadika.”+ Umui laloa unai hereva be anina lasi, a? 6 To, Dirava ese ia henia hebogahisi hereadaena ese mama karana ia hereaia. Unai dainai Toretore Helagadia ia gwau: “Dirava ese hekokoroku taudia ia inai henia,+ to manau taudia dekenai hebogahisi hereadaena ia hahedinaraia.”+

7 Unai dainai, Dirava henunai umui noho.+ To Diabolo umui inai henia,+ bona umui amo do ia heau siri.+ 8 Dirava kahirakahira umui lao, bona ia be umui kahirakahira do ia mai.+ Umui kara dika taudia e, emui imana umui hagoevaia,+ bona umui lalorua taudia e, emui kudouna umui hagoevaia.+ 9 Do umui lalometau, bona umui lalohisihisi bona taitai.+ Emui kiri be lalohisihisi ai do ia lao, bona emui moale be lalometau ai do ia lao. 10 Iehova* vairanai sibona umui hamanaua,+ bona ia ese umui do ia abia isi.+

11 Tadikaka e, ta ta gwauraia dika karana umui hadokoa.+ Tadikaka ta ia gwauraia dika eiava ia hahemaoro henia tauna ese taravatu ia gwauraia dika bona taravatu ia hahemaoro henia. Vadaeni bema taravatu oi hahemaoro henia, oi be taravatu badinaia tauna lasi, to diadi tauna. 12 Taravatu Henia Tauna bona Hahemaoro Tauna be tamona,+ ia ese taunimanima ia hamauria bona ia hadikaia diba.+ To oi, oi be daika emu dekena tauna oi hahemaoro henia noho?+

13 Vadaeni kamonai, umui haida umui gwau: “Hari eiava kerukeru ita be unai siti dekenai do ita lao bona unuseniai lagani ta do ita noho, bona bisinesi do ita karaia bona moni momo do ita abia,”+ 14 to kerukeru umui dekenai dahaka do ia vara be umui diba lasi.+ Badina umui be kwalahu bamona, nega sisina ia hedinarai bena ia boio.+ 15 To namona be umui gwau: “Bema Iehova* ia ura,+ ita be do ita mauri bona inai eiava unai do ita karaia.” 16 To hari mai hekokoroku ida sibona umui abia isi karana umui heagilaia. Unai bamona heagi karadia ibounai be dika momokani. 17 Unai dainai, bema ta be kara maorona ia karaia diba, to ia karaia lasi, ia be ia kara dika unai.+

5 Taga taudia e, umui kamonai, umui dekenai do idia mai hisihisi dainai, umui taitai mai boiboi bada danu.+ 2 Emui taga idia bodaga vadaeni, bona emui dabua be manumanu ese idia ania vadaeni.+ 3 Emui golo bona siliva be idia raraka vadaeni, bona edia raraka ese emui kerere do idia hahedinaraia, bona emui tauanina do idia hadikaia ore. Umui haboua noho kohu be dina gabedia ena lahi totona.+ 4 Emui uma ena anina idia gogoa taudia idia taitai noho, badina edia davana umui henia lasi, bona utua taudia edia boiboi heduru totona be tuari oreadia edia Iehova* ese ia kamonai.+ 5 Tanobada ai umui be taga maurina umui noholaia bona tauanina ena ura gaudia sibona umui tahua. Umui aniani bona emui tauanina ia bada ela bona umui idia hamasea dinana.+ 6 Umui ese kara maoromaoro tauna umui hahemaoro henia bona umui alaia mase danu. Dirava ese umui ia inai henia.

7 Vadaeni tadikaka e, umui haheauka noho ela bona Lohiabada ena noho negana.+ Kamonai! Biru tauna be tano ena huahua namodia totona ia naria noho, ia haheauka noho ela bona medu ginigunana bona medu dokona ia diho.+ 8 Umui danu umui haheauka noho.+ Emui lalona umui hagoadaia, badina Lohiabada ena noho negana be ia mai kahirakahira vadaeni.+

9 Tadikaka e, umui ta ta dekenai umui maumau lasi, unai amo hahemaoro do umui abia lasi.+ Hahemaoro Tauna be iduara dekenai ia gini vadaeni. 10 Tadikaka e, Iehova* ena ladanai idia hereva peroveta taudia+ umui itaia+ bona dala idauidau ai hisihisi idia haheaukalaia dalana+ do umui tohotohoa. 11 Ita gwau idia haheauka taudia be idia moale.*+ Umui be Iobu+ ena haheauka sivaraina umui kamonai vadaeni bona Iehova* ese ia hanamoa dalana umui diba.+ Unai amo umui laloparara Iehova* be lalokau bona hebogahisi bada Diravana.+

12 Tadikaka e, guba eiava tanobada eiava gau ma ta ladanai gwauhamata umui karaia karana umui hadokoa. To namona be emui “Oibe” be oibe bona emui “Lasi,” be lasi,+ unai amo hahemaoro do umui abia lasi.

13 Umui huanai ta be hisihisi ia haheaukalaia noho, a? Namona be ia guriguri noho.+ Ta be ia moale, a? Namona be salamo anedia amo Dirava ia hanamoa.+ 14 Umui huanai ta ia gorere, a? Namona be kongrigeisen ena elda taudia ia boiria,+ bona idia ese ia totona do idia guriguri, bona Iehova* ena ladanai iena kwarana dekenai dehoro do idia bubua.+ 15 Bona abidadama tauna ena guriguri ese gorere tauna* do ia hanamoa, bona Iehova* ese ia do ia abia isi. Danu, bema ia be kara dikadia ia karaia, Dirava ese ena dika do ia gwauatao.

16 Unai dainai, ta ta dekenai emui kara dika do umui gwauraia hedinarai+ bona ta ta totona do umui guriguri, vadaeni do umui namo. Kara maoromaoro tauna ena noinoi be mai ena siahu.+ 17 Elia be mai ena hemami ita hegeregerena, to ia guriguri goadagoada medu do ia diho lasi neganai, lagani toi bona hua 6 lalonai medu ia diho lasi.+ 18 Bena ia guriguri lou, bona guba amo medu ia diho bona tano ese ena anina ia havaraia.+

19 Egu tadikaka e, bema ta ese umui huanai ta be hereva momokani amo ia hakaua siri bona ma ta ese ia hakaua giroa lou, 20 vadaeni inai umui diba be namo, ta ese kara dika tauna be ena dala kererena amo ia hakaua giroa lou neganai,+ unai tauna be mase amo ia hamauria bona ena kara dika momo do ia koua.+