PETERO ENA REVAREVA GINIGUNANA

1 Lau Petero, Iesu Keriso ena aposetolo tauna+ ese umui, Ponto, Galatia, Kapadokia,+ Asia, bona Bitunia edia gabu idauidau ai idia lulua lao taudia* dekenai inai revareva lau torea. 2 Dirava iseda Tamana be guna ia palani hegeregerena umui ia abia hidi.+ Ia ese umui dekenai lauma helaga ia henia umui ia hahelagaia totona.+ Unai bamona ia karaia, ia do umui kamonai henia bona Iesu Keriso ena rara amo umui ia hagoevaia totona.+

Lau guriguri Dirava ese umui dekenai hebogahisi hereadaena do ia hahedinaraia bona umui ia durua maino umui abia totona.

3 Mani iseda Lohiabada Iesu Keriso ena Dirava bona Tamana ita hanamoa. Iena hebogahisi bada dainai ita vara lou,+ bona Iesu Keriso ena toreisi lou karana amo,+ ita dekenai ia mauri noho helarona ia henia.+ 4 Do ita abia maurina be ia bodaga diba lasi, ia miro lasi, bona ia boio diba lasi.+ Unai be umui totona guba dekenai ia noho hegaegae.+ 5 Emui abidadama dainai, Dirava ese umui be ena siahu amo ia gimaia. Oibe, Dirava ese umui ia gimaia noho hahemauri totona, unai hahemauri be nega dokona ai do ia hedinarai. 6 Unai dainai umui moale bada, ena be hari umui be nega sisina lalonai hahetoho idauidau umui lalohisihisilaia,+ 7 unai amo emui abidadama, idia tohoa vadaeni gauna dainai,+ Iesu Keriso ia hedinarai negana ai, hanamoa, hairai bona hemataurai do umui abia. Unai abidadama ese golo ia hereaia, badina ena be golo be lahi amo idia hagoevaia, to ia dika diba.+ 8 Ena be nega ta Keriso umui itaia lasi, to ia umui lalokau henia. Bona ena be hari ia umui itaia lasi, to ia umui abidadama henia bona umui moale momokani, oibe, unai moale be bada herea bona umui herevalaia diba lasi. 9 Bona emui abidadama dainai mai moale ida hahemauri do umui abia.+

10 Dirava ena hebogahisi hereadaena idia perovetalaia taudia ese unai hahemauri dalana idia henanadailaia bona idia tahua namonamo.+ 11 Lauma helaga ese idia ia hadibaia vadaeni Keriso be dahaka hisihisi do ia davaria, bona unai murinai dahaka gau namodia do idia vara.+ Bona peroveta taudia ese unai gaudia idia tahua edena negai bona edena bamona do idia vara.+ 12 Dirava ese idia dekenai ia hahedinaraia gaudia be idia totona lasi, to idia be hesiai taudia bamona umui totona unai gaudia idia perovetalaia. Bona lauma helaga ena siahu amo, hari sivarai namona idia harorolaia taudia ese umui dekenai unai gaudia idia gwauraia lou.+ Aneru danu idia ura dikadika unai gaudia idia lalopararalaia.

13 Unai dainai gaukara badana totona emui lalona umui hegaegaelaia+ bona umui laloa maoromaoro.+ Bona Iesu Keriso do ia hedinarai negana ai do umui abia hebogahisi hereadaena ena hahenamo umui naria noho. 14 Umui be kamonai natudia dainai, guna Dirava umui diba lasi neganai umui badinaia ura idauidau do umui hadokoa, 15 to umui ia boiria Helaga Tauna hegeregerena, emui kara ibounai lalonai do umui helaga,+ 16 badina Toretore Helagadia ia gwau: “Do umui helaga, badina lau be lau helaga.”+

17 Bema umui be iseda Tamana, taunimanima edia toana ia laloa lasi, to ta ta edia kara hegeregerena ia hahemaoro Diravana,+ umui gwauraia Tamana, vadaeni idau taudia bamona umui noho negana lalonai, Dirava gari henia karana umui hahedinaraia be namo.+ 18 Bona umui diba, Dirava ese idia dika diba gaudia, hegeregere siliva bona golo, amo emui sene taudia edia anina lasi mauri dalana amo umui ia ruhaia* lasi.+ 19 To ia ese Keriso+ ena dava bada rarana amo umui ia ruhaia,+ unai be ia goeva bona maka ta lasi mamoe natuna ena rara bamona.+ 20 Momokani, taunimanima be tanobada ai idia do vara lasi neganai,+ Dirava ese Keriso ia abia hidi, to ia be nega dokona ai ia hedinarai umui ia durua totona.+ 21 Ia dainai umui be Dirava umui abidadama henia.+ Dirava ese ia be mase amo ia hatorea isi lou+ bona ia dekenai hairai ia henia,+ unai dainai Dirava do umui abidadama henia bona ia do umui naria noho.

22 Umui ese hereva momokani badinaia karana amo umui sibona umui hagoevaia vadaeni, bona mai momokani ida tadikaka lalokau henia karana umui hahedinaraia,+ unai dainai namona be mai emui kudouna ibounai ida umui lalokau heheni.+ 23 Umui be umui vara lou,+ ia bodaga diba uhena amo lasi, to ia bodaga diba lasi uhena* amo,+ unai be ia mauri bona ia noho hanaihanai Diravana ena hereva hegeregerena.+ 24 Badina “taunimanima ibounai be rei bamona, bona edia hairai be idia tubu kava flaoaflaoa bamona. Rei ia kakoro bona flaoaflaoa ia moru, 25 to Iehova* ena hereva be ia noho ela bona hanaihanai.”+ Bona unai “hereva” be umui dekenai idia harorolaia sivarai namona.+

2 Vadaeni dika ibounai, hereva koikoi ibounai, kara koikoidia, mama karadia, bona haida hahisia hereva ibounai do umui rakatania.+ 2 Bona beibi matamata bamona,+ Dirava ena hereva amo ia mai milika goevana do umui ura henia dikadika, unai amo do umui tubu daekau bona hahemauri do umui abia,+ 3 badina umui mamia vadaeni Lohiabada be namo.

4 Ia dekenai umui mai, ia be mauri nadina.+ Taunimanima ese ia idia dadaraia, to Dirava ese ia abia hidi bona ia dekenai ia be dava bada gauna.+ 5 Umui be mauri nadidia bamona, Dirava ena lauma helaga ese ia haginia rumana,+ hahelaga orea helagana ai umui lao totona. Unai amo lauma helaga ena hakaua henunai boubou gaudia umui henia,+ bona Dirava ese Iesu Keriso amo unai boubou gaudia ia abia dae.+ 6 Badina Toretore Helagadia ia gwau: “Siona dekenai nadi ta lau abia hidi bona lau atoa, ia be ruma ena kona nadi badana bona ia be dava bada gauna, bona ia idia abidadama henia taudia be do idia lalohisihisi* lasi.”+

7 Umui be abidadama taudia dainai, umui dekenai ia be dava bada gauna. To abidadama lasi taudia dekenai, ia be unai bamona lasi, Toretore Helagadia ia gwau: “Ruma haginia taudia ese idia dadaraia nadina+ be kona nadi badana ai ia lao,”+ 8 bona ia be “hahekwakwanaia nadi bona hamorua nadi badana.”+ Idia hekwakwanai badina idia ese Dirava ena hereva idia badinaia lasi. Unai bamona taudia dekenai unai do ia vara. 9 To umui be “abia hidi besena, king gaukara umui karaia hahelaga taudia, bese helagana,+ bona Dirava ena taunimanima korikoridia,+ unai dainai Dirava ena kara hereadaedia be gabu ibounai dekenai umui gwauraia hedinarai be namo,”+ ia ese umui be dibura amo ena diari namo herea dekenai ia boiria mai.+ 10 Guna umui be Dirava ena taunimanima lasi, to hari umui be iena taunimanima.+ Guna Dirava ese umui ia hebogahisi henia lasi, to hari ia ese umui ia hebogahisi henia.+

11 Lalokau taudia e, umui be idau tano taudia bamona+ bona do umui noho daudau lasi dainai, umui lau hagoadaia, tauanina ena ura do umui dadaraia noho.+ Unai ura be umui idia tuari henia noho.+ 12 Tanobada taudia huanai kara namodia do umui karaia noho,+ vadaeni ena be idia gwau umui be kerere taudia, to emui kara namodia idia itaia dainai,+ Dirava be sekea gaukara totona ia mai neganai ia do idia hanamoa.

13 Lohiabada dainai siahu taudia ibounai henunai do umui noho,+ ena be ia be siahu bada king+ 14 eiava ia ese ia siaia gavana taudia, kerere taudia idia panisia bona kara namo taudia idia hanamoa totona.+ 15 Badina Dirava ena ura be inai, kara namo do umui karaia, unai amo laloa maoromaoro lasi taudia edia kavakava herevadia do umui koua.+ 16 Namona be ura kwalimu taudia bamona umui noho,+ to emui ura kwalimu do umui gaukaralaia lasi kara dika karaia totona,+ to Dirava idia hesiai henia taudia bamona do umui noho.+ 17 Taunimanima idauidau ibounai umui matauraia,+ tadikaka oreana ibounai umui lalokau henia,+ Dirava umui gari henia,+ bona king umui matauraia.+

18 Namona be hesiai taudia be mai hemataurai ida edia biagudia henunai idia noho,+ kara namo bona laloa maoromaoro biagudia sibona lasi, to idia kara auka biagudia danu. 19 Bema ta be metau* ia haheaukalaia bona hisihisi ia abia kava, badina ia ura Dirava vairanai ena lalomamina ia goeva, unai be moale gauna.+ 20 Badina bema kara dika umui karaia bona umui idia botaia neganai umui haheauka, unai ena namo be dahaka?+ To bema kara namo umui karaia dainai hisihisi umui abia bona umui haheauka, Dirava ese unai ia moalelaia.+

21 Momokani, Dirava ese umui ia boiria unai dala dekenai umui raka totona, badina Keriso be umui totona hisihisi ia abia+ bona haheitalai namona ia hahedinaraia, unai dainai iena aena gabudia ai do umui raka.+ 22 Ia ese kara dika ta ia karaia lasi,+ bona ena uduna amo hereva koikoi ia gwauraia lasi.+ 23 Ia idia hereva dika henia* neganai,+ idia ia hereva dika henia* lasi.+ Hisihisi ia abia neganai,+ idia dekenai dagedage herevadia ia gwauraia lasi, to hahemaoro maoromaoro ia karaia Diravana ena imana dekenai sibona ia atoa.+ 24 Au dekenai idia tauadae neganai, iseda kara dika be iena tauanina dekenai ia huaia,+ unai amo iseda kara dika amo ita ia ruhaia bona mai maoromaoro ida do ita noho. Bona “iena bero amo umui ia hanamoa.”+ 25 Badina umui be dala maorona amo idia raka siri mamoe bamona,+ to hari umui be mamoe naria tauna dekenai umui giroa lou,+ ia be emui mauri* ia naria tauna.

3 Unai hegeregerena, umui hahine e, emui adavadia henunai do umui noho.+ Unai amo bema idia haida be Dirava ena hereva idia badinaia lasi, vadaeni ena be hereva ta umui gwauraia lasi, to emui kara amo idia be abidadama taudia ai idia lao diba,+ 2 badina emui kara goeva bona hemataurai bada karana idia itaia.+ 3 Namo lasi emui hairai be murimuri sibona, hegeregere huina umui pania, golo herahera umui atoa+ eiava dava bada dabua umui atoa. 4 To namona be emui hairai be emui kudouna ai ia noho gauna, hegeregere lalomanau bona dagedage lasi karadia be dabua bamona do umui atoa.+ Unai be idia dika diba lasi karadia, Dirava ena matanai idia be mai anina bada. 5 Gunaguna Dirava idia abidadama henia helaga hahinedia ese unai kara amo sibodia idia hahairaia, bona edia adavadia henunai idia noho. 6 Hegeregere Sara ese Aberahamo ia kamonai henia bona Aberahamo ia gwauraia lohia.+ Umui be Sara ena natudia ai umui lao, bema kara namo umui karaia noho bona gau ta dekenai umui gari lasi.+

7 Unai hegeregerena, umui tatau e, emui adavadia ida umui noho negadiai, mai aonega ida do umui kara henidia.* Hahine do umui matauraia,+ badina idia be idia goada lasi, ia makohia haraga hodu ta bamona, bona idia danu be umui ida Dirava ese ena hebogahisi hereadaena amo ia henia mauri ahuna do idia abia.+ Unai bamona umui karaia neganai, emui guriguri be gau ta ese do ia koua lasi.

8 Hereva orena be inai, umui ibounai be mai lalotamona ida do umui noho,+ ta ta umui laloa bada, tadikaka bamona umui lalokau heheni, ta ta umui hebogahisi henia,+ bona umui lalomanau.+ 9 Bema ta ese umui ia kara dika henia eiava ia hereva dika henia, ena davana umui henia lasi.+ To namona be umui kara namo henia,*+ badina Dirava ese umui ia boiria unai dala do umui badinaia, unai amo hahenamo umui abia diba.

10 “Namona be mauri ia ura henia bona ia ura nega namodia ia itaia tauna ese dika amo ena malana ia gimaia,+ bona koikoi herevadia amo ena udu bibina ia gimaia. 11 Namona be kara dika ia dadaraia+ bona kara namodia ia karaia.+ Namona be maino ia tahua bona maino ia badinaia noho.+ 12 Badina Iehova* ena matana be kara maoromaoro taudia ia itaia, bona iena taiana be edia noinoi ia kamonai,+ to Iehova* ese kara dikadia idia karaia noho taudia ia inai henia.”+

13 Oibe, daika ese umui do ia hadikaia, bema kara namo umui goadalaia?+ 14 To bema kara maoromaoro dainai hisihisi umui abia, umui moale.+ To, taunimanima ese idia gari henia gauna do umui gari henia lasi,* bona umui lalohekwarahilaia lasi.+ 15 To emui kudouna ai umui abia dae Keriso be Lohiabada bona ia be helaga. Bona nega ibounai do umui noho hegaegae, emui helaro dainai idia henanadai taudia ibounai umui haere henia totona, to mai manau+ bona hemataurai bada ida unai do umui karaia.+

16 Lalomamina namona umui dogoatao noho,+ unai amo herevana edena dala ai umui idia gwauraia dika, to emui Keristani kara namodia dainai,+ umui idia gwauraia dika taudia be do idia hemarai.+ 17 Bema kara namo umui karaia dainai hisihisi umui abia,+ bona bema Dirava ese unai ia koua lasi, unai be namo. To bema kara dika umui karaia dainai hisihisi umui abia, unai be namo lasi.+ 18 Badina Keriso, kara maoromaoro tauna, be nega tamona sibona ia mase,+ kara maoromaoro lasi taudia be kara dika amo ia ruhaia totona.+ Unai bamona ia karaia, Dirava dekenai umui ia hakaua lao totona.+ Ia be taunimanima bamona idia hamasea,+ to lauma* tauna ai ia mauri lou.+ 19 Bena ia lao bona dibura ruma ai idia noho aneru dekenai hahemaoro herevana ia harorolaia,+ 20 idia be Noa ena negai idia kamonai lasi. Dirava be mai haheauka ida ia naria,+ bona unai nega ai Noa be bouti* ia karaia.+ Bona ia lalonai taunimanima be momo lasi, to 8 sibona be abata amo idia roho mauri.+

21 Unai ia vara gauna be toa ta bona ia be hari umui ia hamauria noho gauna ida ia hegeregere, unai be bapatiso karana, Iesu Keriso ena toreisi lou amo. Bapatiso karana ese emui kopina amo miro ia kokia lasi, to unai kara amo Dirava umui noia lalomamina namona umui abia totona.+ 22 Ia be Dirava ena imana idiba kahanai ia helai,+ badina guba dekenai ia daekau bona Dirava ese aneru bona siahu ibounai be ia henunai ia atoa.+

4 Keriso be tauanina ai hisihisi ia abia dainai,+ umui danu be Keriso ena laloa dalana hegeregerena do umui laloa, badina tauanina ai hisihisi ia abia tauna be kara dikadia ia rakatania vadaeni,+ 2 unai amo ia mauri noho lalonai, taunimanima edia ura do ia karaia lou lasi,+ to Dirava ena ura do ia karaia.+ 3 Badina guna umui be nega bada umui haorea tanobada taudia edia ura umui badinaia totona.+ Umui ese tauanina ena ura idauidau umui biagua lasi, gwau-edeede hemarai karadia,* inuinu kekero, regerege bada pati, inuinu helulu, bona kaivakuku tomadiho henia karadia dika rohorohodia umui karaia.+ 4 Umui be idia ida kara bodagadia karaia totona umui heau loaloa lasi dainai, idia daradara bona umui idia gwauraia dika.+ 5 To unai taudia be Keriso vairanai edia kara do idia gwauraia hedinarai, ia be idia mauri bona idia mase taudia ia hahemaoro henia tauna.+ 6 Oibe, unai badina dainai sivarai namona be mase taudia* dekenai idia harorolaia danu,+ unai amo herevana taunimanima edia lalohadai hegeregerena idia hahemaoro henidia, to Dirava ena lauma helaga ena hakaua hegeregerena mauri idia abia diba.

7 To gau ibounai edia dokona be ia mai kahirakahira. Unai dainai, do umui laloa maoromaoro+ bona hanaihanai umui hegaegae* umui guriguri totona.+ 8 Gau badana be, ta ta do umui lalokau henia bada,+ badina lalokau ese kara dika momo ia gwauatao.+ 9 Namona be ta ta dekenai heabidae karana umui hahedinaraia, bona umui maumau lasi.+ 10 Dirava ena hebogahisi hereadaena amo umui ta ta ese umui abia harihari gauna do umui gaukaralaia, naria taudia namodia bamona ta ta umui hesiai henia totona. Unai hebogahisi hereadaena be dala idauidau ai ia hedinarai.+ 11 Bema ta ia hereva diba, namona be Dirava amo idia mai herevadia ia gwauraia. Bema ta be hesiai gaukara ia karaia diba, namona be Dirava ese ia henia goadana dekenai ia tabekau, unai hesiai gaukara ia karaia totona.+ Vadaeni gau ibounai lalonai Dirava be Iesu Keriso amo hanamoa do ia abia.+ Hairai bona siahu be iena ela bona hanaihanai. Amen.

12 Lalokau taudia e, lahi bamona hisihisi idauidau umui davaria neganai umui hoa lasi, unai gaudia idia vara umui idia tohoa totona.+ Namo lasi umui laloa gau idauna ta ia vara noho. 13 To, Keriso ia abia hisihisina be umui abia danu,+ unai dainai do umui moale noho.+ Unai amo iena hairai ia hedinarai neganai, do umui moale bada danu.+ 14 Bema Keriso ena ladana dainai umui idia gwauraia dika, umui moale,+ badina Dirava ena lauma helaga bona ena hairai be umui latanai ia noho.

15 To namo lasi hisihisi umui abia badina umui ala-ala, umui henaohenao, umui kara dika, eiava ma haida edia mauri lalonai umui vareai kava.+ 16 To bema ta be Keristani tauna dainai hisihisi ia abia, namo lasi ia hemarai,+ to namona be ena Keristani mauri dalana amo Dirava ia hanamoa noho. 17 Badina hari be abia hidi negana hahemaoro karaia totona, bona unai hahemaoro be Dirava ena ruma ai ia matamaia.+ Vadaeni bema ita dekenai ia matamaia,+ Dirava ena sivarai namona idia ura lasi kamonai taudia dekenai, dahaka do ia vara?+ 18 “Bona bema kara maoromaoro tauna ia gaukara goada Dirava ese ia hamauria totona, vadaeni Dirava ia badinaia lasi tauna bona kara dika tauna dekenai, dahaka do ia vara?”+ 19 Namona be Dirava ena ura idia karaia dainai hisihisi idia abia taudia ese kara namo do idia karaia noho bona Havaraia Tauna ena imana dekenai edia mauri idia atoa, badina ia idia abidadama henia diba.+

5 Lau be umui ida lau gaukara hebou elda tauna ta, bona lau ese Keriso ena hisihisi lau itaia, bona gabeai do ia hedinarai hairaina do lau abia dainai,+ umui huanai idia noho elda taudia lau noia:* 2 Dirava ena mamoe oreana, emui henunai idia noho, do umui naria.+ Naria gaukarana umui karaia,* ta ese umui ia doria dainai lasi, to Dirava ena vairanai mai emui ura ida do umui karaia.+ Koikoi dalanai kohu abia totona lasi,+ to mai emui ura bada ida do umui karaia. 3 Bona Dirava ese umui henunai ia atoa taudia* do umui biagua auka lasi,+ to mamoe oreana dekenai haheitalai namona do umui hahedinaraia.+ 4 Vadaeni mamoe naria tauna badana ia hedinarai neganai,+ ia dika diba lasi korona mai hairaina do umui abia.+

5 Unai hegeregerena, umui tatau matamata e, elda taudia edia henunai do umui noho.+ To umui ibounai ese ta ta dekenai manau* karana do umui hahedinaraia, unai kara be dabua bamona do umui atoa. Badina Dirava ese hekokoroku taudia ia dadaraia, to manau taudia dekenai hebogahisi hereadaena ia hahedinaraia.+

6 Unai dainai, Dirava ena imana goadana henunai sibona umui hamanaua, vadaeni nega korikorina ai ia ese umui do ia abia isi,+ 7 emui lalohekwarahi ibounai be ia dekenai umui negea lao,+ badina ia be umui ia laloa bada.+ 8 Umui laloa maoromaoro bona umui gima noho!+ Emui inai tauna, Diabolo, be ia boiboi badabada laiona bamona ia raka loaloa, do ia ania ore tauna ia tahua noho.+ 9 To mai abidadama goadana ida ia umui tuari henia.+ Badina umui diba, emui tadikaka oreana tanobada hegegemadai danu be unai bamona hisihisi idauidau idia davaria noho.+ 10 To nega sisina lalonai hisihisi umui abia murinai, hebogahisi hereadaena ia hahedinaraia Diravana ese emui treinini do ia hagugurua. Ia ese Keriso ida umui ia hakapua, bona ia boiria ena noho hanaihanai hairaina umui abia totona.+ Bona ia ese umui do ia hagoadaia,+ unai amo emui abidadama be do ia goada,+ bona umui do ia haginia goada. 11 Ia dekenai goada ia noho ela bona hanaihanai. Amen.

12 Silivanus,*+ ia be abidadama tadikaka ta, ese lau ia durua inai revareva be umui dekenai lau torea totona. Unai amo umui lau hagoadaia bona lau gwau diba, Dirava ena hebogahisi hereadaena umui dekenai be momokani, ia lalonai umui gini goada be namo. 13 Babulonia dekenai ia noho hahine,* ia be abia hidi hahinena ta umui bamona, bona egu natuna Mareko ese umui dekenai edia hanamoa herevana idia siaia.+ 14 Mai lalokau ida ta ta umui kisi henia bona hanamoa.

Mani umui ibounai, Keriso ida umui hakapua taudia be maino umui abia.