Bisisi ena Koukouna Aukana

SIOKA ta be emu imana amo oi hakwaidua be haraga, ani? To, inai rau dekenai ena laulau ia noho bisisina ta mani oi hamakohia toho. Reana hama do oi gaukaralaia hamakohia totona. To inai bisisi bona sioka edia anina be tamona​—⁠kalsiam kaboneit, ahu unai. Bisisi ena koukouna ena auka ese sioka ena auka be nega 40 ia hanaia.

Inai bisisi ena koukouna ia auka ena badina hehunina be saiens taudia, Washington ena Iunivesiti lalonai, Seattle, U.S.A. dekenai ese idia davaria vadaeni. Bisisi ese ena koukouna amo sibona ena mauri ia naria. Ena koukouna ia auka, badina ia be mai kahana rua; ena murimurina kahana ia rigikarigika, to ena lalona kahana ia manadamanada bona ia diaridiari.

Magasin ta, Science News, ia gwau unai saiens taudia ese idia davaria, inai bisisi ena koukouna ena lalona kahana ena anina be biriki maragimaragidia bona semenisi bamona; biriki be maragi herea dainai taunimanima ese edia matadia amo idia itadia diba lasi, bona unai semenisi, bisisi sibona ese ia karaia gauna, ese unai biriki ia kamodia tao goadagoada. Bema gau ta ese ena koukouna ia bampaia neganai, atai birikidia be henu birikidia latadiai idia mareremarere sisina, unai dainai ia makohi lasi. Bema ia makohi sisina, semenisi ese “varovaro” idaudia amo matu ia koua. Reana bisisi be dala 5 amo sibona ia naria, ena koukouna do ia makohi garina!

Saiens taudia ese inai bisisi ena koukouna aukana idia laloa bada dainai idia ese dala idia tahua, raro be unai bamona do idia gaukaralaia, gau auka hereadia idia karadia totona. Bema idia kwalimu, taunimanima ese do idia hanamodia bada. To madi, iena kara be unai dala amo idia tohotohoa Diravana be taunimanima ese idia hanamoa bada lasi!​—⁠Iobu 37:⁠14.