Egu Bamodia Edia Lalo-Ani be Edena Bamona Do Lau Haheaukalaia Diba?

Revareva ta, U.S.A., ena gabu ta ladana Chicago amo polisi tauna ta ese ia siaia vareai pepa ese ia hahedinaraia unai henanadai ena haere ita diba be gau bada. Inai bamona ia torea:

“January 15, 1990 dinanai lau be Mississippi amo Chicago ai idia loulaia laganina 18 mero ta ena dibura pepa lau torea. Ia be kerere ia karaia dainai ia heau lao Mississippi dekenai. Unai pepa ena taravatu ta be iena kohu ibounai do lau abia. Iena kohu lalodiai buka ta ladana, Memero Kekeni edia Henanadai-Haere Maorodia.

“ ‘Inai buka oi duahia, a?’ Lau nanadaia.

“ ‘Io,’ ia haere. ‘Lau heau bona lau lao Mississippi ai neganai farm ta dekenai lau gaukara bona Iehova ena Witness taudia rua ese inai buka idia henia lau dekenai.’ Bena iruru matana ia diho bona ia taitai. Ia tai lalonai, ia hereva: ‘Inai buka be nega momo lau duahia vadaeni, bona lau duahia loulou karoana be “Egu Bamodia edia Lalo-Ani be Edena Bamona Do Lau Haheaukalaia Diba?” ’ Bena ma ia gwau: ‘Bema inai sisiba be idia hanaia vadaeni lagani toi eiava hani lalonai lau davaria neganai hari iniseni do lau noho lasi.’

“Dibura merona idia abia lao dibura dekenai, bona lau ese polisi edia ripoti bona ia ese sibona ena kerere ia torea sivaraina lau duahia. Ia gwau: ‘Aiemai raskol orea ena badana ese lau ia hamaoroa do lau diho lao dala dekenai ma raskol orea ta ena badana do lau pidia badina ia be aiemai kahana dekenai drag ladana cocaine ia hoihoilaia. Ia hamaorogu hegeregerena lau karaia. Lau gari badina lau ura lasi unai raskol memero idia laloa lau be mero maragi ta bamona. Bona lau ura idia ese lau idia abia dae momokani unai raskol orea dekenai.’

“Oibe, unai laganina 18 mero be ala-ala ena kerere davana idia henia, bona ena bamona edia hahedua ia abia dae dainai mase ahuna do ia abia diba.”

Buka Helaga ese dala maoromaorodia bona aonega havaraia sisiba ia henia diba hari inai nega ai idia vara hekwakwanaidia totona. Bema oi ura hadibaia hereva ma haida eiava davana lasi Baibel Stadi oi abia, mani emu kara oi torea mai I.B.S.A., Box 636, Boroko, N.C.D., Papua New Guinea dekenai.