Hari Inai Nega Samaria Tauna Namona Ta
CANADA dekenai ia noho hahine ta be motuka aksiden lalonai dika ia davaria. Hari inai nega Samaria Tauna Namona ta ese ia durua. (Luka 10:29-37) Unai tauna ena hebogahisi ese unai hahine ena lalona ia hamarerea dainai, The Georgetown Independent niuspepa dekenai inai revareva ia torea:
‘Edita e:
‘Oi lau tore henia ena badina be rua. Gau ginigunana be, lau ura Georgetown dekenai ia noho tauna ta lau tanikiu henia, badina vanegai wiki ena dokona ai lau ia durua egu motuka lau taria kerere bona koupa lalonai motuka ia moru neganai.
‘Mr. John Saunders be lau ia hanaia iena motuka ia taria neganai bena ia hastopua. Lau ia durua hamatamaia bona egu lalona ia hagoadaia namo herea. Lau ida ia noho ela bona ambulance taria taudia bona pulisi idia mai bona lau idia durua. Emu gabu taudia be namo idia davaria badina Mr. Saunders be Samaria Tauna Namona ta emu gabu dekenai.
‘Mr. Saunders ia mai hospital dekenai egu adavana bona lau ia vadivadi henia totona, badina ia ura ia diba lau hegeregere eiava. Lau hoa badina lau davaria Mr. Saunders be Georgetown dekenai Iehova ena Witness taudia edia opesi badana ai ia gaukara. Guna lau laloa unai taudia be muramura karaia karana idia abia dae lasi, to hari tauna be lau ia durua totona first aid medikal dibana ia gaukaralaia. Vadaeni, oi lau tore henia ena badina iharuana do lau gwauraia.
‘Guna, egu iduara dekenai idia mai Iehova ena Witness taudia iboudiai dekenai hemataurai lasi karana lau hahedinaraia, bona unai dainai lau ura idia iboudiai dekenai sori herevana lau gwauraia. Guna, lau laloa umui be kerere dalana ai emui tomadiho karana umui abia dae goadagoada taudia. Mr. Saunders ese ia hamomokania lau lalohadai kava bona lau laloa kerere. Vaia taunimanima edia kara hegeregerena umui ibounai umui ura kara maorona umui karaia.
‘Mr. Saunders e, oi lau tanikiu henia lou, bona namona be emu abidadama oi dogoatao noho. Dirava ese oi ia hanamoa.
‘T. M., Toronto’
Iehova ena Witness taudia idia laloa, namona be “oiemu badibadinai tauna dekenai oi lalokau henia, oi sibona dekenai oi lalokau henia hegeregerena.” (Luka 10:27) Bema oi ura Iehova ena Witness taudia dekenai diba ma haida oi abia eiava oi ura davana lasi Baibel stadi oi abia, namona be IBSA, Box 636, Boroko, N.C.D oi tore henia.