Duahia Taudia Edia Amo

Herevahereva Dalana  October-December, 1994, Noga! ese “Headava Lalonai Herevahereva Dalana” ia herevalaia, be hari dina lau abia. Lau duahidia vadaeni herevadia amo reana unai be hereadae. Lagani ta bona mai kahana gunanai lau bona lauegu tau ai headava. Aiemai headava ia namo bona ai moale, to nega haida aiemai herevahereva dalana dekenai kerere ia vara. Dahaka dainai unai ia vara be Noga! lalonai ia hedinarai namonamo. Nega toi lau duahia bona lau ura umui bona Iehova lau tanikiu henia nega korikorina ai unai hereva namodia umui halasia dainai.

C. M., United States

Lauegu adavana be Keristen elda bona ful-taim painia namona ta. To, ai headava negana amo ema bona hari, nega haida aiemai herevahereva dalana ia auka. Unai magasin ese aiemai hekwakwanai ena badina ia hahedinaraia maoromaoro bona ai diba inai ese aiemai headava do ia hagoadaia.

C. A., Japan

“Pala” ena sivarai lau duahia neganai, lau laloa ena lalona ena mamina be lauegu hegeregerena momokani. Unai bamona lau hereva diba danu “Gavara” bona egu adavana dekenai, edia kara be tamona. Unai hereva namona be hekwakwanai ese ia havaraia gauna ia hanamoa sibona lasi, to ena badina ia hanamoa diba danu. Lau hoa badina dala namona ai unai mai anina bada gauna umui hahedinaraia.

E. F., Italy

Ena be lauegu mauri lagani be 17 sibona bona lagani haida do lau naria ela bona lau headava, to dahaka dainai headava taudia edia herevahereva karadia dekenai idia hekwarahi hari lau diba dainai, lau moale. Lauegu palani be nega vaira totona unai magasin do lau dogoatao noho bona duahia loulou, bena lau maoheni neganai do lau ura gaukaralaia momokani!

N. B., United States

Lauegu tamana be “Gavara” bamona. To hari lau lalo-parara ia be mai ena maoro nega haida ia herevahereva lasi bona lau ia hereva henia lasi. Ena be unai hereva be lau ia hadibaia, to lau gari tamana ese unai do ia gaukaralaia ena kara ia hamomokania totona.

A. B., United States

Unai sivarai ai torea duahia taudia ia durudia tau bona hahine edia kara bona lalona ena mamina edia idau idia lalo-parara totona. To, ai karaia ena badina be herevahereva heheni lasi, o badu karana hamomokania totona lasi. Buka Helaga ese tamadia ia sisiba henia ‘natudia habadua kava lasi.’ (Kolose 3:21) Unai sisiba ia hahedinaraia nega daudau herevahereva lasi karana, bema natudia idia ura tama sina edia hakaua hereva idia abia neganai, be namo lasi​—Edita.

Lau diba hanamoa revareva momo umui abia vadaeni, mani lauegu umui atoa idia danu. “Gavara” bona “Pala” umui kikilaia neganai, lau bona egu adavana aiemai ladadia umui atoa diba edia gabu dekenai. Madi, “Gavara” bamona, lau kara kerere bona lauegu adavana ena lalona ena mamina lau lalo-pararalaia lasi momokani! Lagani 20 gunana lau ia adavaia hahinena ese lau ia rakatania bona aiemai headava ia hadokoa. Reana unai hereva be ena kudou do ia hamarerea bona aiemai headava ai hanamoa toho diba.

J. K., United States