Haroro Taudia ese Uhau Bona Ulato Idia Haroro Henidia Toho
Montreal, Canada, ena niuspepa ta ladana The Gazette ia gwau, orea ta be McGill Iunivesiti ai idia vareai, edia toana be raskol taudia edia hegeregerena. To idia be “raskol” idaudia. Idia be haroro taudia—iunivesiti ena haroro taudia unai. Unai niuspepa ia gwau, idia be “dala matamatana idia badinaia haroro taudia; iunivesiti ena stiuden taudia, lauma diarina idia tahua taudia, be idia ese idia durudia.”
Unai haroro taudia ese “raskol” dabuadia idia hahedokilaia bena edia foto idia abia, unai laulau amo edia heduru gaukarana ena toana be iunivesiti ai idia hahedinaraia totona. Idia ta, Presbitirian haroro hahinena ta ladana Roberta Clare, ia gwau: “Taunimanima momo idia laloa ai laloa ai be helaga herea bona emai lalona ai ai hahemaoro henidia. Ai ura unai edia lalohadai do ai kokia, unai dainai unai raskol laulauna ai karaia.”
Ia gwau hari inai negai stiuden momo idia ura sikuli ai tomadiho do ita stadilaia. Idia momo ese henanadai dobudia idia lalo-hekwarahilaia, bona iunivesiti ena tisa bona ena haroro taudia dekenai haere idia tahua. Stiuden ta ese niuspepa tauna ta ia hamaoroa, ia ura do ia diba dahaka dainai tomadiho be mai ena siahu bada taunimanima dekenai, dahaka dainai tomadiho daladia idauidau momo idia noho, bona dahaka dainai toana be heiriheiri bada idia havaraia tanobada ai. Ia ese danu Iesu Keriso ena dagi bona guba bona tanobada idia vara dalana ia daradaralaia.
Dirava ese unai bamona henanadaidia dobudia ia haerelaia herevadia be stiuden taudia ese do idia davaria totona, unai haroro taudia ese Baibel amo idia durudia, a? Toana be nega ta ta mo unai bamona idia durudia. Unai Dala Matamatana haroro taudia idia gwaubou stiuden taudia do idia veridia lasi edia orea ai do idia vareai totona. Idia laloa unai be “mamoe henaodia karana.”
Ena be unai haroro taudia edia ura be namo reana, to idia ese Iesu Keriso bona ia murinai idia raka taudia edia hahediba dalana amo idia raka siri daudau vadaeni. Keristani taudia ginigunadia ese “mamoe henaodia karana” idia lalo-hekwarahilaia lasi, bona Dirava ena Hereva harorolaia bona hereva momokani be mai edia momokani ida idia tahua taudia hadibalaidia gaukarana idia goadalaia. (Luka 24:44, 45; Kara 20:20) Badina be, taunimanima ese mauri hanaihanai do idia abia totona, namona be Iehova Dirava bona ena Natuna, Iesu Keriso, idia diba maoromaoro. (Ioane 17:3) Dirava ia ura taunimanima idauidau iboudiai be “hereva momokani do idia diba” maoromaoro, mauri do idia davaria totona.—1 Timoteo 2:3, 4.
Iehova ena Witness taudia edia gaukara ta be, Baibel idia henanadailaia taudia edia ruma ai, idia ida Baibel stadi idia karaia, davana lasi. Bema oi ura neganai, Iehova ena Witness taudia oiemu hanua o taoni ai ese oi do idia durua mai edia moale ida.