Saiens Taudia Idia Diba Lasi Gaudia

Saiens taudia ese iunives idia stadilaia namonamo. To, mai anina bada henanadai momo idia haerelaia diba lasi.

Saiens taudia ese iunives bona mauri ia vara dalana idia herevalaia diba, a? Lasi. Haida idia gwau iunives idia stadilaia saiens taudia ese iunives ia vara dalana idia herevalaia diba. To, Dartmouth College ena profesa Marcelo Gleiseri ia gwau: “Ai be iunives ia matamaia dalana ai herevalaia diba lasi.”

Unai hegeregerena, mauri ia matamaia dalana totona Science News magasin ia gwau: “Do ia auka tanobada ai mauri ia matamaia dalana ita herevalaia totona: Tanobada ia matamaia neganai idia noho gaudia momo be idia boio vadaeni.” Unai hereva amo ita diba, saiens ese inai henanadai, Edena dala ai iunives bona mauri ia matamaia? idia do haerelaia lasi.

Reana oi laloa, ‘Bema tanobada ai idia noho mauri gaudia be ta ese ia havaraia, havaraia tauna be daika?’ Danu do oi henanadai: ‘Bema aonega bona lalokau Havaraia Tauna ia noho, dahaka dainai taunimanima edia hisihisi ia koua lasi? Dahaka dainai tomadiho idauidau idia noho? Dahaka dainai ia idia tomadiho henia taudia ese kara dika momo idia karaia, to unai ia koua lasi?’

Saiens dekenai unai bamona henanadai edia haere ita abia diba lasi. To haere maorodia oi davaria diba. Oibe, taunimanima momo ese Baibel ai haere maorodia idia davaria.

Bema oi ura diba dahaka dainai Baibel idia stadilaia saiens taudia haida idia gwau, idia abia dae Havaraia Tauna ia noho, oi lao jw.org ai, Mauri Ia Matamaia Dalana Dekenai Ma Haida Edia Lalohadai oi tahua.

Saiens bona Baibel ese idia ia durua

Georgiy N. Koidan, kemisi

“Egu gaukara be molekiul lau ‘haboudia.’ Unai lau karaia totona, do lau karaia gauna lau palanilaia guna. Bema gau ta lau laloaboio, molekiul do ia parara. Ena be egu gaukara be mai ena hekwarahi, to idia mauri sel lalonai idia vara molekiul idauidau ena gaukarana ese unai ia hereaia. Unai dainai lau abia dae Havaraia Tauna ia noho, ia be Diba Bada Kemisi Tauna.

Baibel lau stadilaia neganai, lau diba Baibel be buka ta sibona lasi. Baibel be lagani 2,000 gunanai idia torea ore, to lau mamia hari ena sisiba be mai anina bada. Baibel ena hereva ese famili lalonai, gaukara gabuna ai, bona dekena tauna ida hepapahuahu hamaoromaoroa dalana ai heduru bada ia henia. Lau abia dae unai bamona sisiba namodia ia henia tauna be taunimanima edia aonega ia hereaia.”

Yan-Der Hsuuw, embryologist

“Beibi ta ena mauri ia hamatamaia neganai, sel ibounai idia gaukara hebou, sel haida be varovaro, masolo, turia, rara bona gau ma haida ia havaraia, bona taunimanima ta ai ia lao. Unai sel ta ta amo beibi ta ia vara karana ita lalopararalaia diba lasi. Lau diba, mauri be aonega bada tauna ta ese ia havaraia.

Baibel bukana Salamo 139:15, 16, ese sinana ena bogana ai beibi ia vara matamaia dalana ia herevalaia. Unai be saiens taudia ese lagani haida gunanai edia tahua gaukara amo idia davaria gaudia ida ia hegeregere. Dahaka dainai Baibel ese unai ia gwauraia maoromaoro, ena be idaunegai idia torea? Badina Havaraia Tauna ese toretore tauna dekenai unai ia hahedinaraia.”

Inai vidio oi itaia Rocío Picado Herrero: A Chemistry Teacher Explains Her Faith. Unai vidio ena sinado be jw.org ai do oi tahua.