Aniani Matamatana Ta

INAI taunimanima ese tano amo dahaka gaudia idia gogoa noho? Ia be aisi bamona. Iena toana be kurokuro bona ia severa. To ia be aisi lasi; ia be aniani gauna.

Israela taudia ese Aigupito idia rakatania bona hua ta bamona ia ore vadaeni. Idia be taunimanima idia noho lasi tanona dekenai idia noho. Unuseniai aniani sisina sibona ia tubu dainai, taunimanima idia maumau, idia gwau: ‘Aigupito dekenai Iehova ese ita ia alaia be namo. Unuseniai ai ura aniani be momo herea.’

Unai dainai Iehova ia gwau: ‘Lau ese aniani do lau siaia, guba amo do ia moru medu bamona.’ Bona Iehova be unai bamona ia karaia. Daba ia rere bona Israela taudia ese inai gau kurokurona idia itaia neganai, idia henanadai heheni: ‘Inai be dahaka?’

Mose ia gwau: ‘Inai be Iehova ese umui dekenai ia henia aniani umui ania totona.’ Vadaeni, ena ladana idia gwauraia MANA. Ena mamina be keke palaka mai ena hani danu bamona.

Mose ese taunimanima ia hamaorodia: ‘Umui gogoa, ta ta ena hitolo hegeregerena.’ Unai dainai, daba ibounai unai bamona idia karaia. Bena, dina ia siahu neganai, tano dekenai idia rakatania mana be ia veve.

Mose ma ia gwau: ‘Mana umui dogoatao lasi ela bona dabai.’ To haida be idia kamonai lasi. Oi laloa dahaka ia vara? Daba ia mai neganai, idia dogoatao mana lalonai gaigai maragimaragi momo idia noho bona ena bonana be dika herea!

To Iehova ese taunimanima ia hamaoroa, pura ena dina ta dekenai dina rua ena mana do idia haboua. Unai be dina namba 6. Bona Iehova ia gwau mana haida do idia dogoatao ela bona murina dinana, badina dina namba 7 dekenai mana do ia moru lasi. Mana haida idia dogoatao ela bona dina namba 7 neganai, gaigai maragidia momo idia noho lasi bona ia bodaga lasi! Unai be hoa karana ma ta!

Israela taudia be taunimanima idia noho lasi tanona dekenai idia noho lagani ibounai, Iehova ese mana amo ia ubudia.