Hamatamaia Herevana—Haere Maorodia

‘DAHAKA DAINAI egu tamana sinana ese lau idia diba namonamo lasi?’ ‘Drag do lau ania kava bona kekero muramurana do lau inua be namo, a?’ ‘Lau do headava lasi neganai, ta ida lau mahuta hebou be namo, a?’ ‘Edena bamona do lau diba inai be lalokau korikorina eiava?’ ‘Nega vairai, lauegu mauri be edena bamona?’

Oi sibomu lasi, to memero kekeni momo be unai bamona idia henanadai. To unai henanadai idia gwauraia neganai, nega momo haere idauidau idia davaria. Haheitalai ta be inai: Reana ta ena tamana sinana idia gwau kekero muramurana inua be namo lasi, to gau be idia sibodia idia inua. Magasin bona TV ese unai kara idia abia isi. Oiemu uru taudia ese emu lalona idia veria toho oi inua totona. Unai dainai memero kekeni momo idia daradara dahaka do idia karaia be maoro.

Noga!a magasin torea taudia idia diba memero kekeni idia ura edia henanadai edia haere maorodia do idia abia, unai dainai lagani 1983 ai hereva ta ladana “Matamata Taudia Idia Henanadai . . . ” idia halasia matamaia. Unai hereva idia duahia taudia ese idia moalelaia. Ta ia gwau: “Unai hereva ese idia hahedinaraia umui ese memero kekeni edia hekwakwanai umui laloa. Lauegu helaro bona egu guriguri be, unai hereva do umui hadokodia lasi.”

Ma ta ia gwau: ‘Lauegu mauri laganidia be 14. Guna lau diba lasi memero kekeni idia tubu daekau negana lalonai unai bamona lalo-hekwarahi idia davaria. Hari inai negai memero kekeni dibaganidia gaudia be momo herea. Unai dainai unai hereva lau moalelaidia. Hanuaboi iboudiai Dirava lau tanikiu henia, unai magasin ena hereva dainai.’ Unai hereva be memero maragidia edia hereva bamona ai torea lasi. Unai dainai taunimanima badadia danu ese unai hereva ladana “Matamata Taudia Idia Henanadai . . . ” idia moalelaidia. Hahine ta ia gwau: “Lauegu mauri laganidia be 40. Unai hereva ese ai tama sina ia durua bada.” Idia ese Keristen elda taudia idia durudia, Iehova ena Witness taudia edia kongregesen lalodiai idia noho memerodia bona kekenidia idia diba namonamo bona idia durudia totona.

Dahaka dainai taunimanima momo ese inai hereva ladana “Matamata Taudia Idia Henanadai . . . ” idia moalelaidia? Badina be magasin ese ia gwauraia haeredia be maoro! Noga! torea taudia ese hereva ta ta iboudiai idia tahudia namonamo guna. Danu, memero kekeni edia lalohadai idia diba namonamo totona, memero bona kekeni momo idia henanadai henidia, tanobada ibounai dekenai! Edia haere ese idia durudia, sisiba herevadia maorodia idia torea totona.

To “Matamata Taudia Idia Henanadai . . . ” herevadia edia namo korikorina be, Baibel amo haere maorodia idia gwauraia. Oibe, Baibel be mai ena hereva momo memero kekeni sisiba henidia totona. (Hereva Lada-isidia karoa 1-7 bona Efeso 6⁠:​1-3 itaia.) Ita ia havaraia Diravana ese Baibel torea taudia ia hadibadia hegeregerena idia torea. Ia be “uhau edia lebulebu karadia” ia diba. (2 Timoteo 2⁠:​20-22; 3⁠:16) Ena be Baibel idia torea negana lalonai taunimanima edia noho be idau bona hari iseda noho be ma idau, to memero kekeni edia ura idia idau lasi. Unai dainai Baibel ena hereva be mai anina hari inai negai danu. Baibel ena sisiba ai gwauraia, memero kekeni hereva auka henidia totona lasi, to badina be ai ura do idia laloa bona do idia tahua. Unai hereva ai torea neganai, Iehova ena Witness memerodia bona kekenidia ai lalodia, to Baibel ena aonega idia ura henia taudia iboudiai ese idia duahia diba bona idia moalelaia diba.

“Matamata Taudia Idia Henanadai . . . ” herevadia idia duahia taudia momo edia noinoi dainai, unai hereva momo be inai buka ena karoa 39 lalodiai ai torea hanai. Hereva matamatadia haida danu ai torea. Memero kekeni haida, bese idauidau bona tano idauidau taudia, edia laulau danu ai hahedinaraia.

Buka ena karoa edia lisi oi itaia, bona oi laloa momo henanadaidia oi tahudia bena edia hereva oi duahia. To, ai ura gabeai oi ese karoa iboudiai do oi duahidia bona Baibel ena siri be sibomu emu Baibel lalonai do oi duahidia.

Ruma bese haida lalodiai tama sina bona natudia idia herevahereva hebou lasi. Unai dainai karoa iboudiai edia dokodia ai hereva ladana “Inai Henanadai Herevalaia” be ai torea, do idia herevalaia hebou totona. Sibomu emu lalohadai unai henanadai momo dekenai do oi gwauraia hedinarai diba, eiava unai hereva ena anina oi dekenai be do oi laloa diba.

Unai dainai reana ruma bese momo do idia ura edia ruma bese taudia ese inai buka do idia stadilaia hebou. Idia ta ta ese paragraf ta ta do idia duahia diba bona Baibel ena siri danu do idia duahia diba. Henanadai haida be karoa ta ta edia dokonai ai torea; karoa ena kahana ta idia duahia murinai o karoa ena dokona ai, unai henanadai idia herevalaia diba. Tama sina ese edia natudia idia hagoadadia diba, edia lalohadai inai hereva idauidau dekenai do idia gwauraia hedinarai mai edia momokani ida. Reana memero kekeni idia ura inai buka ena hereva do idia herevalaia hebou.

Hari be “metau dikadia momo” edia nega, taunimanima badadia bona memero kekeni dekediai. (2 Timoteo 3⁠:1) To, bema Dirava ena Hereva oi diba, inai hekwarahi momo negana lalonai do oi namo diba. (Salamo 119⁠:9) Ai moale badina inai buka lalonai oiemu henanadai be Baibel amo ai haerelaidia.

Buka Torea Taudia

[Footnotes]

[Table of contents]

(See publication)