Kahana 3
Iesu Keriso be Daika?
Dahaka dainai Baibel ese Iesu ia gwauraia Dirava ena “vara guna” Natuna? (1)
Dahaka dainai ia gwauraia “Hereva”? (1)
Dahaka dainai Iesu be taunimanima edia oromana ai ia mai tanobada dekenai? (2-4)
Dahaka dainai hoa karadia ia karaia? (5)
Kahirakahira Iesu be dahaka do ia karaia? (6)
1. Iesu be tanobada dekenai ia do mai lasi neganai, ia be lauma ta, guba dekenai ia noho. Ia be Dirava ese ia havaraia gaudia ginigunana, unai dainai idia gwauraia Dirava ena “vara guna” Natuna. (Kolose 1:15; Apokalupo 3:14) Dirava sibona ese ia havaraia Natuna tamona be Iesu. Iesu be taunimanima ta ai ia do lao lasi neganai, Iehova ese ia gaukaralaia, iena “gaukara karaia tauna” ai ia halaoa, gau oredia ibounai guba ai bona tanobada ai idia karaia totona. (Aonega Herevadia 8:22-31; Kolose 1:16, 17) Dirava ese ia be Iena hereva gwauraia tauna badana ai ia halaoa. Unai dainai Iesu idia gwauraia “Hereva.”—Ioane 1:1-3; Apokalupo 19:13.
2. Dirava ese Iena Natuna ena mauri be Maria ena bogana lalonai ia atoa, unai dala amo tanobada dekenai ia siaia mai. Anina be Iesu be mai ena tanobada tamana ta lasi. Unai dainai kara dika ia abia hanai lasi; ia be goevadae. Iesu be badina toi dainai Dirava ese tanobada dekenai ia siaia: (1) Ita dekenai Dirava sivaraina momokanina ia hadibaia totona (Ioane 18:37), (2) ia kara maoromaoro guguru totona, unai amo ita ese do ita badinaia dalana ia hahedinaraia (1 Petero 2:21), bona (3) ena mauri do ia bouboulaia, kara dika bona mase amo ita ia ruhaia totona. Dahaka dainai unai ia vara be namo?—Mataio 20:28.
3. Tau ginigunana, Adamu, be Dirava ena hahegani ia kamonaia lasi neganai, ia karaia karana be Baibel ese ia gwauraia “kara dika.” Unai dainai Dirava ese ena davana mase ia gwauraia. (Genese 3:17-19) Dirava ena ura dalana ai ia hegeregere lasi, unai dainai unai nega amo ia goevadae lasi. Metairametaira ia buruka ia lao bena ia mase. Adamu ese kara dika ia henia hanai ena natudia dekenai. Unai dainai ita buruka, ita gorere, bona ita mase danu. Taunimanima be edena bamona idia roho mauri diba?—Roma 3:23; 5:12.
4. Adamu hegeregerena, Iesu be goevadae tauna. To, herevana Iesu be hetoho bada hereana ia abia, to Dirava ia badinaia goevagoeva; Adamu be unai bamona lasi. Unai dainai ia be ena mauri goevadaena ia bouboulaia diba, Adamu ena kara dika davana henia totona. Unai be Baibel ese ia gwauraia ‘taunimanima ibounai hamauria davana.’ Unai dainai Adamu ena natudia be mase ena igui amo ia ruhaia diba. Iesu idia abidadama henia taudia iboudiai be Dirava ese edia dika ia gwauatao diba bona mauri hanaihanai idia abia diba.—1 Timoteo 2:5, 6; Ioane 3:16; Roma 5:18, 19.
5. Iesu be tanobada ai ia noho neganai, gorere taudia ia hanamoa, hitolo taudia ia ubua, bona lai badadia ia koua. Mase taudia ia hatorea isi danu. Dahaka dainai hoa karadia ia karaia? (1) Idia hisihisi taudia ia hebogahisi henidia, bena ia ura ia durudia. (2) Iena hoa karadia ese idia hahedinaraia ia be Dirava ena Natuna. (3) Tanobada ena Pavapava ai do ia lohia negana lalonai kamonai taudia totona do ia karaia karadia idia hahedinaraia.—Mataio 14:14; Mareko 2:10-12; Ioane 5:28, 29.
6. Iesu ia mase bena Dirava ese lauma ta ai ia hatorea isi lou, bena guba dekenai ia giroa lou. (1 Petero 3:18) Unai murinai, Dirava ese King ai ia halaoa. Kahirakahira Iesu ese inai tanobada amo kara dikadia ibounai bona hisihisi ibounai do ia kokia.—Salamo 37:9-11; Aonega Herevadia 2:21, 22.
[Pictures on page 7]
Iesu ena hesiai gaukara lalonai taunimanima ia hadibaia, hoa karadia ia karaia, bona ita totona ena mauri ia bouboulaia