Nega Momo Kamonai Taudia ese Idia Henia Henanadai

Bema Dirava be lalokau, dahaka dainai kara dika ia do koua lasi?

DIRAVA ese kara dika ia do koua lasi, bona tanobada taudia milioni momo be mai edia ura ida dika idia karaia noho. Hegeregere, idia ese tuari idia hamatamaia, natudia dekenai bomu idia negedia, tano idia hadikaia, bona hitolo badadia idia havaraia. Taunimanima milioni momo ese kuku idia ania bona edia baragi ai kensa gorere idia abia, idia heudahanai bona pokese goreredia idia abia, idia inuinu kekero bona edia asena idia dika, bona unai bamona gaudia ma haida idia vara. Unai bamona taudia idia ura lasi dika ibounai do ia ore. To idia ura dika ese ia havaraia gaudia sibona do idia ore. Idia hadoa gauna ena anina idia abia neganai, idia boiboi, “Dahaka dainai lau dekenai ia vara?” Bona Aonega Herevadia 19:3 ena hereva hegeregerena, idia gwau unai be Dirava ena kerere: “Taunimanima haida be sibodia edia kavakava, ese idia ia hakererea. Unai neganai idia ese Lohiabada idia badu henia noho.” Bona bema Dirava ese edia kara dika ia koua, idia maumau idia gwau edia ura kwalimu ia ore!

Iehova ese kara dika ia do koua lasi ena badina badana be ia ura Satani ia hamatamaia hepapahuahu ena haere ia henia. Satani Diabolo ia gwau, Dirava ese hahetoho lalonai Ia do idia badinaia noho taudia be tanobada dekenai ia atodia diba lasi. (Iobu 1:​6-12; 2:​1-10) Iehova ese Satani dekenai dala ia kehoa noho, iena hepapahuahu ia hamomokania totona. (Esodo 9:16) Hari Satani ese ena hepapahuahu ia hamomokania toho lalonai, dika badadia ia havaraia noho, taunimanima ese Dirava idia dadaraia totona. (Apokalupo 12:12) To, Iobu ese Dirava ia badinaia. Iesu danu. Bona hari idia noho Keristani taudia momokanidia danu.​—Iobu 27:5; 31:6; Mataio 4:​1-11; 1 Petero 1:​6, 7.

Lau ura tanobada paradaisona bona taunimanima idia noho hanaihanai sivaraina lau abia dae, to lau laloa unai bamona gau namo hereana be do ia vara diba lasi?

Baibel ese ia hahedinaraia do ia vara. Hari toana be do ia vara diba lasi, badina lagani handred momo lalonai taunimanima ese dika idia manadalaia. Iehova ese tanobada ia havaraia bona taunimanima ia hamaoroa kara maoromaoro tatau bona hahine amo do idia hahonua bona ena tubutubu gaudia bona animal do idia naria bona ena hairai do idia hadikaia lasi to idia gimaia. (Rau 12 bona 17 itaia.) Unai gwauhamata Paradaisona be namo herea bona do ia vara, to hari mauri dikana ia noho daudau diba lasi. Paradaiso ese ena gabu do ia abia.

Taunimanima haida ese Baibel idia kirikirilaia bona idia gwau ia be gori sibona bona saiens hegeregerena lasi, edena bamona idia dekenai lau haere diba?

Ta ena abidadama unai gwauhamata dekenai be abidadama kava lasi. ‘Abidadama be kamonai amo ia vara.’ Dirava ena Hereva stadilaia karana amo, Baibel ena aonega ia hedinarai goevagoeva bona abidadama ia bada ia lao.​—Roma 10:17; Heberu 11:1.

Baibel negadia idia tahua akioleji gaukarana ese Baibel ena sivarai momo ia hamomokania. Saiens korikorina be Baibel ena hereva hegeregerena. Inai gaudia be diba bada taudia idia do davaria lasi neganai, Baibel lalonai idia noho vadaeni: tanobada havaraia negana lalonai idia vara gaudia idauidau, tanobada be kuboru, gau ta ena latanai ia noho lasi, bona manu be tano ta amo idia roho lao tano ma ta.​—Genese, karoa 1; Isaia 40:22; Iobu 26:7; Ieremia 8:7.

Baibel ena peroveta herevadia idia guguru karana ese ia hahedinaraia Dirava ena lauma amo ia vara. Daniela ese tanobada ena basileia badadia edia toreisi bona moru, bona Mesia ia mai bona idia hamasea negadia, ia perovetalaia. (Daniela, karoa 2, 8; 9:​24-​27) Hari, peroveta herevadia ma haida idia guguru noho, idia hahedinaraia ita be “nega ena dokona” lalonai ita noho. (2 Timoteo 3:​1-5; Mataio, karoa 24) Taunimanima ese unai bamona gaudia ia perovetalaia diba lasi. (Isaia 41:23) Diba ma haida abia totona Watchtower Bible and Tract Society ese ia halasia bukadia Baibel​​—Dirava Ena Hereva Eiava Taunimanima Edia? bona Is There a Creator Who Cares About You? itaia.

Baibel henanadai haerelaia dalana be edena bamona lau dibaia diba?

Namona be Baibel oi stadilaia bona oi lalohadailaia, bona Dirava oi noia ena lauma amo oi do ia hakaua. (Aonega Herevadia 15:28; Luka 11:​9-13) Baibel ia gwau: “Bema umui ta be aonega lasi, namona be Dirava do ia noia, vadaeni Dirava ese aonega ia dekenai do ia henia. . . . Dirava ese do ia badu henia lasi.” (Iamesi 1:5) Danu, Baibel stadi idia durua bukadia namodia idia noho. Nega momo heduru oi abia be namo, Filipo be Etiopia tauna ida ia stadi hegeregerena. (Kara 8:​26-35) Iehova ena Witnes taudia ese kamonai taudia edia ruma dekenai idia ida davana lasi Baibel stadi idia karaia. Unai heduru noia totona oi laloa daradara lasi.

Dahaka dainai taunimanima momo ese Iehova ena Witnes taudia idia dagedage henia bona lau idia hamaoroa idia ida lau stadi lasi?

Iesu ena haroro gaukara dainai idia dagedage henia, bona ia gwau ia murinai idia raka taudia do idia dagedage henia danu. Haida ese Iesu ena hadibaia herevadia idia laloa bada neganai, dagedage tomadiho taudia ese idia nanadaia: “Be, umui danu ia ese ia koia vadaeni? Sedira hanua edia lohia ta, o Farisea taudia ta ese ia dekenai idia abidadama vadaeni, a? Lasi momokani.” (Ioane 7:​46-48; 15:20) Witnes taudia ida oi stadi lasi totona oi idia hereva henia taudia momo be diba maorona idia abia lasi eiava Witnes taudia idia lalo-dika henia kava. Namona be Witnes taudia ida oi stadi bona do oi itaia, emu lalo-parara Baibel dekenai do ia bada ia lao eiava lasi.​—Mataio 7:​17-20.

Dahaka dainai Witnes taudia ese mai edia tomadiho taudia idia vadivadi henia?

Unai idia karaia lalonai Iesu ena haheitalai idia badinaia. Ia be Iuda taudia dekenai ia lao. Iuda taudia be mai edia tomadiho, to dala momo ai ia be Dirava ena Hereva amo ia idau vadaeni. (Mataio 15:​1-9) Bese iboudiai, herevana idia gwauraidia Keristani eiava Keristani lasi besedia, to idia be mai edia tomadiho. Taunimanima ese Dirava ena Hereva ai idia noho hadibaia herevadia idia abia dae be mai anina bada, bona Witnes taudia ese unai totona taunimanima idia durua karana amo dekena taudia lalokau henia karana idia hahedinaraia.

Witnes taudia idia abia dae edia tomadiho sibona be maoro, a?

Bema ta ese ena tomadiho ia laloa bada, do ia laloa ena tomadiho be tomadiho maorona. Bema lasi, dahaka dainai ia badinaia? Keristani taudia idia hagania: “Hereva ibounai do umui laloa namonamo, . . . bona hereva namodia do umui dogoatao momokani.” (1 Tesalonika 5:21) Namona be ta ese ia hamomokania Baibel ia hahedinaraia gaudia sibona ia abia dae, badina tomadiho momokanina be tamona sibona. Efeso 4:5 ese unai ia hamomokania, ia gwau: “Lohiabada be tamona, abidadama be tamona, bapatiso be tamona.” Hari inai negai momo idia abia dae herevana, hahemauri dekenai ita idia hakaua daladia bona tomadiho be momo, be Iesu ese ia abia dae lasi. Ia gwau: “To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.” Iehova ena Witnes taudia idia laloa unai dala idia davaria. Bema lasi, tomadiho ma ta do idia tahua.​—Mataio 7:14.

Idia laloa idia sibona ese hahemauri do idia abia, a?

Lagani gunadia handred momo lalodiai idia mauri taudia, idia be Iehova ena Witnes taudia lasi, be do idia toreisi lou bona do idia mauri. Hari idia mauri taudia momo be “hisihisi badana” ia do matamaia lasi neganai hereva momokani bona kara maoromaoro ena kahana ai idia mai diba, bona hahemauri do idia abia. Danu, Iesu ia gwau namo lasi ita hahemaoro heheni. Ita ese ta ena toana ita itaia; Dirava ese ena kudouna ia itaia. Ia itaia namonamo, bona mai hebogahisi ida ia hahemaoro henia. Ia ese hahemaoro gaukarana be ita dekenai lasi to Iesu dekenai ia henia.​—Mataio 7:​1-5; 24:21; 25:31.

Iehova ena Witnes taudia edia hebou dekenai idia lao taudia be dahaka kontribusen idia henia?

Aposetolo Paulo ese kontribusen monina ia herevalaia, ia gwau: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:7) Iehova ena Witnes taudia edia Kingdom Hall bona hebouhebou gabudia lalonai, moni idia gogoa lasi. Maua haida idia atoa, idia ura taudia ese edia kontribusen idia atoa diba totona. Ta ia diba lasi bema ma ta be moni ia henia bona hida ia henia. Haida idia henia gauna ese ma haida edia ia hanaia; reana haida be gau ta idia henia diba lasi. Iesu ese lalohadai maorona ia hahedinaraia, ia ese Ierusalema ena dubu lalonai ia noho mauana bona kontribusen monina idia henia taudia ia herevalaia: Ta ese ia henia moni ena bada be anina lasi, to henia neganai ia hahedinaraia lalohadai bona ia henia monina be ia henia diba hegeregerena, unai be mai anina bada.​—Luka 21:​1-4.

Bema lau be Iehova ena Witnes tauna ai lau lao, idia bamona do lau haroro, a?

Ta be Keriso ena Basileia ese ia lohiaia tanobada Paradaisona ena sivarai ia diba namonamo neganai, ia ura ma haida dekenai ia hadibaia. Do oi ura danu. Ia be sivarai namona!​—Kara 5:​41, 42.

Unai gaukara oi karaia amo dala badana ta ai oi hahedinaraia oi be Iesu Keriso ena hahediba tauna ta. Baibel lalonai, Iesu idia gwauraia “hereva momokani tauna, bona Dirava ena hereva ia gwauraia maoromaoro tauna.” Tanobada dekenai ia noho neganai ia haroro, ia gwau: “Guba Basileia be kahirakahira ia mai vadaeni,” bona ena hahediba taudia ia siaia unai idia karaia totona. (Apokalupo 3:14; Mataio 4:17; 10:7) Gabeai, Iesu ese ia murinai idia raka taudia ia hagania: “Do umui lao, bese ibounai be diba tahua taudia do umui halaoa, . . . do umui hadibaia.” Ia gwau danu, dokona ia mai kahirakahira neganai, “Basileia ena Sivarai Namona be tanobada ibounai dekenai do idia harorolaia.”​—Mataio 24:14; 28:​19, 20.

Unai sivarai namona harorolaia daladia be momo. Nega momo turadia bona ita diba taudia ida ita herevahereva neganai dala ia kehoa, unai ita karaia totona. Haida ese revareva eiava telefon amo unai idia karaia. Ma haida ese idia diba taudia dekenai buka haida idia siaia bema idia laloa idia herevalaia gaudia do idia ura henia. Witnes taudia idia ura lasi ta idia reaia dainai, ruma ta ruma ta dekenai unai sivarai idia harorolaia danu.

Baibel ese inai hereva namona ia hahedinaraia: “Lauma Helaga bona Headava Matamata Hahine idia gwau, ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Namona be mai eda ura ida ma haida dekenai Paradaiso tanobadana bona iena hahenamo ita harorolaia, mai eda kudouna ibounai ida ita ura unai sivarai namona ita harorolaia be namo.

Ai diba oi ura henanadai ma haida oi henia, Iehova ena Witnes taudia bona idia abia dae gaudia oi diba totona. Reana gau haida oi abia dae be auka. Ai ura emu henanadai ai haerelaia. Inai buklet be bada lasi dainai, oi ai boiria Witnes taudia do oi henanadai henia. Kingdom Hall ai idia karaia heboudia dekenai eiava emu ruma dekenai oi idia vadivadi henia neganai, unai oi karaia diba. Eiava Jehovah’s Witnesses dekenai emu henanadai oi siaia, henunai idia noho adres maorona oi gaukaralaia.