Goada Abia Gabuna

NEGA haida lalohisihisi bona sibona oi noho mamina oi abia, a?— Nega haida oi laloa bema ta ese oi ia lalokau henia, a?— Natudia haida be unai idia mamia. To Dirava ia gwauhamata: “Lau ese umui do lau laloaboio lasi momokani.” (Isaia 49:15) Unai ita laloa neganai, ita moale, ani?— Oibe, Iehova Dirava ese ita ia lalokau henia bada!

Baibel torea tauna ta ia gwau: “Badina be egu tamana bona sinana, ese lau idia rakatania, to Lohiabada ese lau do ia abia dae.” (Salamo 27:10) Unai ita diba ese iseda lalona ia hagoadaia, ani?— Oibe, Iehova ese ita ia hamaoroa: “Do umui gari lasi, lau be umui dekenai lau noho! . . . Lau ese . . . umui do lau durua.”​—Isaia 41:10.

Nega haida, Iehova ese Satani ia koua lasi ita ia hahekwakwanaia totona. Danu, Iehova ese Satani ia koua lasi Ena hesiai taudia ia dibagania totona. Nega ta Satani ese Iesu ia hahisia bada dainai Iesu be Iehova dekenai ia boiboi: “Egu Dirava e, egu Dirava e, dahaka dainai lau oi rakatania?” (Mataio 27:46) Ena be Iesu ese hisihisi bada ia abia, to ia diba Iehova ese ia lalokau henia. (Ioane 10:17) To Iesu ia diba danu Iehova ese Satani ia koua lasi Ena hesiai taudia ia dibagania bona hahisia totona. Karoa ma ta ai Dirava ese Satani ia koua lasi ena badina do ai hahedinaraia.

Ita maragi neganai, nega haida ita gari. Hegeregere, nega ta oi boio, a?— Unai neganai, oi gari, a?— Oibe, natudia momo idia gari. Hadibaia Tauna Badana be ta ia boio ena sivarai ta ia gwauraia. To natuna ta ia boio lasi. Ia be mamoe ta.

Dala haida ai oi be mamoe ta bamona. Edena dala ai? Mamoe be idia bada eiava goada momokani lasi. Bona ta ese idia ia naria bona gimaia be namo. Unai be mamoe naria tauna ena maduna.

Iesu ena sivarai lalonai mamoe naria tauna ta mai ena mamoe 100 ia gwauraia. To gabeai mamoe ta ia boio. Reana ia ura ororo kahana dekenai idia noho gaudia ia itaia. To daudau lasi murinai, unai mamoe be mamoe serina amo ia daudau herea. Unai mamoe ia giroa bona ia davaria ia be sibona neganai, iena hemami oi laloa diba, a?—

Bema mamoe naria tauna ia davaria ena mamoe ta ia boio, dahaka do ia karaia? Do ia gwau, unai be mamoe ena kerere dainai do ia laloa lasi, a? Eiava gabu namona dekenai mamoe 99 do ia rakatania bona do ia lao ia boio mamoena ia tahua totona, a? Do ia hekwarahi unai mamoe tamona ia tahua totona, a?— Bema oi be unai boio mamoena, do oi ura mamoe naria tauna ese oi ia tahua, a?—

Mamoe naria tauna ese ena mamoe ibounai ia lalokau henia, ia boio mamoena danu. Unai dainai ia boio mamoena ia tahua totona ia lao. Ia boio mamoena ese mamoe naria tauna ia itaia neganai, ia mamia moalena mani oi laloa! Bona Iesu ia gwau mamoe naria tauna ia moale badina ena mamoe ia davaria. Iena moale ia boio mamoena dainai ese ena moale idia boio lasi mamoe 99 dekenai ia hereaia. Iesu ena sivarai lalonai ia gwauraia mamoe naria tauna be daika bamona? Daika ese ita ia laloa bada, mamoe naria tauna ese iena mamoe ia laloa bada hegeregerena?— Iesu ia gwau ena Tamana guba dekenai ese ita ia laloa bada. Bona ena Tamana be Iehova.

Iehova Dirava be ena taunimanima edia Mamoe Naria Tauna Badana. Ia idia hesiai henia taudia ibounai ia lalokau henia, oi bamona matamata taudia danu. Ia ura lasi dika ita davaria. Dirava ese ita ia laloa bada karana ita dibaia ese ita ia hagoadaia momokani!​—Mataio 18:​12-​14.

Iehova Dirava oi abidadama henia momokani, a?— Oi dekenai ia be tau korikorina, a?— Momokani, Iehova ita itaia diba lasi, badina ia be Lauma. To ia be tau korikorina ta bona ita ia itaia diba. Ia diba edena negai heduru ita abia be namo. Bona guriguri amo ia ita hereva henia diba, tanobada dekenai ma ta ita hereva henia bamona. Iehova ia ura unai ita karaia.

Unai dainai bema oi lalohisihisi eiava sibona oi noho lalohadaina oi abia, dahaka oi karaia be namo?— Iehova oi hereva henia. Ia kahirakahira oi lao bona ia ese oi do ia hagoadaia bona durua. Laloaboio lasi Iehova be oi ia lalokau henia, ena be oi laloa oi be sibona oi noho. Mani iseda Baibel ita abia. Salamo 23, siri 1 amo ia matamaia, ia gwau: “Lohiabada ese lau ia naria noho, mamoe naria tauna ese, iena mamoe ia naria bamona. Unai dainai gau ta do lau dabu lasi. Rei namona gabuna dekenai lau ia hakaua, unuseni lau laga-ani totona. Ranu namona gabuna dekenai danu, ia ese lau ia hakaua noho.”

Siri 4 mani ita itaia: “Oibe, lau be mase ena dibura koura gabuna, dekenai do lau raka lao, to dika ta dekenai do lau gari lasi, badina be, Lohiabada e, oi be lau danu oi noho. Oiemu mamoe hakaua itotohi, bona oiemu botaia auna ese, lau idia gimaia noho.” Taunimanima be unai bamona hemami idia abia bema edia Dirava be Iehova. Hekwakwanai negadiai, goada idia davaria. Unai bamona hemami oi abia danu, a?—

Lalokau mamoe naria tauna ese ena mamoe ia naria hegeregerena, Iehova ese ena taunimanima ia naria namo herea. Ia ese idia dekenai dala maorona ia hadibaia, bona mai moale ida Ia idia badinaia. Ena be dika momo huanai idia noho, to idia gari lasi be namo. Mamoe naria tauna ese ena itotohi ia gaukaralaia mamoe be dagedage animal amo ia gimaia totona. Baibel be mamoe naria tauna Davida ese ena mamoe be laiona amo ia gimaia dalana ia gwauraia. (1 Samuela 17:​34-​36) Bona Dirava ena taunimanima idia diba Iehova ese idia do ia gimaia danu. Idia gari lasi badina Dirava be idia danu ia noho.

Iehova ese ena mamoe ia lalokau henia bada, bona idia ia naria namonamo. Baibel ia gwau: ‘Ia ese iena mamoe do ia hakaua, mamoe naria tauna bamona. Iena imana dekenai maragidia do ia haboua hebou.’​—Isaia 40:11.

Oi diba Iehova be unai bamona dainai unai ese emu lalona ia hamoalea, ani?— Oi ura iena mamoe ta ai oi lao, a?— Mamoe be mamoe naria tauna ena gadona idia kamonai. Idia be ia kahirakahira idia noho. Iehova oi kamonai henia, a?— Ia kahirakahira oi noho, a?— Vadaeni oi gari lasi be namo. Iehova be oi danu do ia noho.