KAHANA 8
Iosaia be mai Ena Tura Namodia
Oi laloa kara maorona ita karaia be auka, a?— Momo idia laloa unai ita karaia be auka. Baibel ia gwau mero ta ladana Iosaia be ia hekwarahi kara maorona ia karaia totona. To, iena tura namodia ese ia idia durua unai ia karaia totona. Mani Iosaia bona ena turadia ita herevalaidia.
Iosaia ena tamana be Amona, ia be Iuda edia King ta. Amona be kara dika tauna bona kaivakuku ia tomadiho henia. Amona ia mase murinai, Iosaia be Iuda edia king ai ia lao. To unai negai, ena mauri lagani be eit sibona! Oi laloa Iosaia be ena tamana bamona ia kara dika, a?— Lasi!
Sepanaia be taunimanima ia hadibaia kaivakuku do idia tomadiho henia lasi
Ena be Iosaia be mero maragina, to ia ura Iehova do ia badinaia. Unai dainai, ia ese Iehova idia lalokau henia taudia ia tura henidia. Bona ena turadia ese ia idia durua kara maorona ia karaia totona. Iosaia ena turana haida be daidia?
Iena turana ta be Sepanaia. Ia be peroveta tauna ta bona ia ese Iuda taudia ia hadibaia, bema kaivakuku idia tomadiho henidia dika bada do idia davaria. Iosaia be Sepanaia ia kamonai henia dainai, ia ese Iehova ia tomadiho henia, to kaivakuku lasi.
Iosaia ena turana ma ta be Ieremia bona edia mauri lagani be hegeregere. Idia be tura namodia dainai Iosaia ia mase neganai, Ieremia ese Iosaia ia reaia bada ena ane ta ia torea. Ieremia bona Iosaia be idia durua heheni kara maorona idia karaia bona Iehova idia badinaia totona.
Iosaia bona Ieremia be idia durua heheni kara maoromaoro idia karaia totona
Iosaia ena sivarai amo dahaka oi diba?— Ena be Iosaia be mero maragina, to ia ura kara maorona ia karaia. Ia diba Iehova idia lalokau henia taudia ia tura henia be mai anina bada. Namona be oi abia hidi turadia be Iehova idia lalokau henia bona oi do idia durua kara maorona oi karaia totona!