HENANADAI 5

Sikuli ai Bema ta ese Lau Ia Hagaria be Edena Bamona?

DAHAKA DAINAI UNAI LAU LALOA BE NAMO?

Emu kara o hereva dalana amo gau ibounai oi hanamoa—⁠eiava hadikaia momokani.

DAHAKA DO OI KARAIA?

Haheitalai ta laloa: Hari dina ai, Thomas ia ura lasi sikuli dekenai ia lao. Bona ia ura lasi kerukeru sikuli dekenai ia lao. Danu, ia ura sikuli ia rakatania vaitani. Badina hua toi gunanai, ena turadia be koikoi herevadia amo Thomas ena ladana idia hadikaia. Unai murinai, Thomas ena nickname idauidau idia gwauraia. Nega haida, ta ese Thomas ena imana ai idia noho buka ia hamorudia, bena ia gwau, ‘Inai be aksiden,’ eiava grup huanai ta be Thomas ia doria bena Thomas ia giroa neganai, ia daradara daika ese ia ia doria. Varani, sikuli turadia be E-Mail amo Thomas dekenai hagaria hereva idia siaia, idia gwau bema kerukeru Thomas be sikuli dekenai ia lao, ia do idia botaia.

Bema oi be Thomas, dahaka do oi karaia?

STOPU BONA LALOA!

Oi be mai emu goada! Ena be, dagedage taudia oi heatu henia lasi, idia oi koua diba. Edena dala ai?

BADU LASI. Baibel ia gwau: “Kavakava tauna ese iena badu ia hedinaraia noho, to aonega tauna ese sibona ena badu ia koua, ia haheauka noho.” (Aonega Herevadia 29:11) Bema oi manau—⁠reana emu toana amo unai kara oi hahedinaraia—⁠hanaihanai, reana oi idia dagedage henia taudia be oi dekenai do idia hesiku.
DAVANA KARAIA LASI EIAVA RETALIATE LASI. Baibel ia gwau: “Tau ta ena dika davana umui haloua lasi.” (Roma 12:17) Dika davana karaia tauna be dika ia habadaia.
DIKA DEKENA AMO OI RAKA SIRI. Baibel ia gwau: “Aonega tauna ese dika ia itaia noho, bona unai dika dekena amo ia raka siri.” (Aonega Herevadia 22:3) Hekwakwanai idia havaraia diba taudia oi itaia neganai oi raka siri, bona dagedage taudia idia noho gabudia dekenai oi lao lasi.
HEREVA TA OI GWAURAIA. Baibel ia gwau: “Mai manau danu ia haere tauna, ese badu ia koua noho.” (Aonega Herevadia 15:1) Kiri ia havaraia herevana ta oi gwauraia diba. Hegeregere, bema ta ia gwau, ‘Oi be boga bada,’ reana oi kiri bona oi gwau, “Oibe, reana lau lose weight be namo!”
RAKA SIRI. Nora, 19, ia gwau: “Gau ta oi gwauraia lasi neganai, oi hahedinaraia emu goada ese dagedage tauna ena goada ia hanaia. Momokani, oi be boga-auka o haheauka karana oi hahedinaraia—⁠unai kara be dagedage tauna ese ia hahedinaraia diba lasi.”—⁠2 Timoteo 2:24.
GARI LASI KARANA OI HABADAIA. Nega momo, dagedage taudia idia diba daika ia gari, ia hemarai, bona ia heatu diba lasi. To, bema idia itaia oi gari lasi bona oi ura lasi oi idia biagua, idia be oi do idia rakatania.
TA OI SAMANIA. Sikuli tisa gunana ta ia gwau: “Stiuden Ibounai lau hadibaia bema ta ese oi ia dagedage henia, lau oi hadibaia be namo. Unai bamona oi karaia be namo badina unai amo ta be oi do ia dagedage henia lasi.”

Mero ta be mai gari lasi ida dagedage merona ia itaia — Gari lasi karana ese emu goada do ia habadaia, to dagedage taudia be unai bamona idia karaia diba lasi

INAI OI DIBA, A?

Bullying anina be ta oi botaia, ta oi paisia, o ta oi dagedage henia karana sibona lasi, to danu, ena anina ma haida be inai:

Uduna herevadia amo ta oi hadikaia. “Lau idia hadikaia ladadia o idia gwauraia gaudia lau laloaboio lasi. Idia laloa lau be anina lasi, lau idia ura henia lasi, bona idia laloa lau be kavakava. Namona be lau idia botaia dikadika, unai amo egu ladana do idia hadikaia lasi.”—⁠Celine, 20.
Oi sibona oi noho. “Sikuli ai egu turadia be lau idia ura henia lasi. Lau itaia lunch teibolo dekenai speis idia henia lasi, so idia danu lau helai lasi. Lagani ta ia hanaia vadaeni, lau tai bona lau sibona lau aniani noho.”—⁠Haley, 18.
Cyberbullying. “Kompiuta ai oi taipia hereva haida amo, oi ese ta ena ladana—⁠eiava ena mauri—⁠oi hadikaia diba. Momo idia laloa unai be momokani lasi, to unai kerere oi karaia diba!”—⁠Daniel, 14.

**HENANADAI BONA HAERE**
MOMOKANI EIAVA KOIKOI	HAERE IBOUNAI
1 Dagedage o bullying karana be lagani tausen momo gunana ai ia matamaia ema bona hari.	1 Momokani. Hegeregere, Baibel ese ia sivarailaia taudia haida be, Nepili taudia—⁠unai grup ladana ena anina be “Idia ese edia goada amo taunimanima idia hahisidia.”—⁠Genese 6:4, NWT.
2 Bully karana be hevaseha karana ta sibona. Ia be dika ta do ia havaraia lasi.	2 Koikoi. Bully karana dainai matamata taudia momo be sibona idia hamasea (suicide).
3 Bully tauna oi heatu henia neganai, ia ese ena dagedage karana do ia hadokoa.	3 Koikoi. Bully taudia edia goada ese eda goada ia hanaia dainai, idia ita heatu henia be anina lasi.
4 Bema oi itaia ta be ma ta ia dagedage (bully) henia, gau ta oi karaia lasi.	4 Koikoi. Unai bamona negadiai, gau ta oi karaia be namo. Bema oi itaia ta be ma ta ia dagedage (bully) henia bona hereva ta oi gwauraia lasi, anina be oi ese dagedage tauna oi durua bona hekwakwanai oi hamaoromaoroa lasi.
5 Ena be dagedage o bully taudia be haida hadikaia herevadia idia gwauraia diba, to idia danu be idia gari.	5 Momokani. Ena be dagedage o bully taudia haida idia laloa idia be haida idia hereaia to idia momo be idia gari—⁠idia ese haida idia hadikaia badina idia ura idia moale.
6 Dagedage o bully taudia ese edia kara idia senisia diba.	6 Momokani. Bema dagedage o bully taudia ese heduru idia abia, idia ese edia lalohadai bona kara idia senisia diba.