Dubu Idauidau Idia Gaukara Hebou Karana
Tomadiho taudia ibounai ese Dirava tamona idia tomadiho henia, a?
Tomadiho momo edia hahediba herevadia ibounai be Iehova ese ia abia dae, a?
Mt 7:13, 14; Ioa 17:3; Ef 4:4-6
Baibel sivarai haida:
Ios 24:15—Iosua ia gwau do ita abia hidi Iehova ita hesiai henia eiava dirava ma haida do ita hesiai henia
1Ki 18:19-40—Iehova ese peroveta tauna Elia amo ia hahedinaraia, Dirava momokani idia tomadiho henia taudia ese dirava ma haida, hegeregere Bala, do idia tomadiho henia lasi
Bese ma haida edia dirava bona idia tomadiho henia karana be Iehova ese edena bamona ia laloa?
Iehova be dahaka do ia laloa bema haida idia gwau ia idia tomadiho henia, to ia inai henia karadia idia karaia?
Isa 1:13-15; 1Ko 10:20-22; 2Ko 6:14, 15, 17
Baibel sivarai haida:
Eso 32:1-10—Arona be Israela taudia ese idia doria dainai, ‘Iehova dekenai aria ta karaia’ totona boromakau kaivakuku ia karaia, unai dainai Ia badu momokani
1Ki 12:26-30—King Ieroboama ia ura lasi taunimanima be Ierusalema ena dubu dekenai do idia lao dainai, kaivakuku ia karaia Iehova ia laulaulaia totona, unai ese taunimanima ia hakaua kerere
Israela taudia be dirava ma haida idia tomadiho henia taudia idia bamoa lasi totona, Iehova ese idia dekenai dahaka ia hadibaia?
Iehova ena taunimanima be tomadiho ma haida idia badinaia neganai, Iehova be dahaka ia karaia?
Hah 10:6, 7; Sal 106:35-40; Ier 44:2, 3
Baibel sivarai haida:
1Ki 11:1-9—King Solomona ese idau tano hahinedia ia adavaia bona idia ese ena lalona idia veria dainai, dirava koikoidia ia tomadiho henia matamaia bona Iehova ia habadua
Sal 78:40, 41, 55-62—Asapa ia hahedinaraia Iehova be Israela taudia ia dadaraia, badina idia gwau-edeede, kaivakuku idia tomadiho henia bona Ia idia hahisia
Dirava ena Hereva ida ia hegeregere lasi tomadiho hahediba herevadia be Iesu ese ia abia dae, a?
Baibel sivarai haida:
Mt 16:6, 12—Iesu ese Farisea bona Sadukea taudia edia hahediba herevadia be isti ida ia hahegeregerea, badina edia hahediba koikoi herevadia be ia bada haraga bona Dirava ena hereva momokani ia hadikaia
Mt 23:5-7, 23-33—Iesu ese taravatu hadibaia taudia bona Farisea taudia edia hahediba koikoi bona kara koikoi dainai ia gwauraidia dika
Mr 7:5-9—Iesu ia gwau, taravatu hadibaia taudia bona Farisea taudia ese taunimanima edia kastom karadia idia badinaia, to Dirava ena Hereva idia badinaia lasi
Iesu ese ena hahediba taudia ia hagoadaia tomadiho orea ma haida idia haginia totona, a?
Baibel sivarai haida:
Ioa 15:4, 5—Iesu ese vain au ena parabole amo ia hahedinaraia, ia murinai idia raka taudia be ia bona Keristani taudia ida lalotamona ai idia noho be namo
Ioa 17:1, 6, 11, 20-23—Iesu ena hanuaboi ginigabena ai, iena hahediba taudia ibounai totona ia guriguri unai amo mai lalotamona ida idia noho diba
Keristani ginigunadia edia nega ai kongrigeisen idauidau edia hahediba herevadia bona Iehova idia tomadiho henia dalana be tamona, a?
Baibel sivarai haida:
Ka 11:20-23, 25, 26—Antioka bona Ierusalema ai idia noho kongrigeisen be idia lalotamona bona idia gaukara hebou
Ro 15:25, 26; 2Ko 8:1-7—Keristani kongrigeisen ginigunadia be heduru gaudia idia henia, unai amo lalokau ese kongrigeisen ia hatamonaia karana ia hahedinaraia
Tomadiho idauidau ese Keriso abidadama henia herevadia idia gwauraia, to Dirava ese edia tomadiho do ia abia dae, a?
Bema tomadiho taudia be Keriso bona ena aposetolo taudia edia hadibaia herevadia idia badinaia lasi, Dirava ese idia do ia abia dae, a?
Baibel sivarai haida:
Mt 13:24-30, 36-43—Iesu ese uma lalonai idia tubu ava dikadia ena parabole amo ia hahedinaraia, Keristani koikoi taudia momo do idia hedinarai bona kongrigeisen do idia biagua
1Io 2:18, 19—Aposetolo tauna burukana Ioane ese ia hahedinaraia, Iesu ia vara bena lagani 100 bamona murinai, Keriso inai henia taudia momo idia hedinarai