Iesu ena Aena Gabudiai Oi Raka A?

Bema tau ta ena kara oi tohotohoa, unai amo ia oi hanamoa bada. Nega momo natu ese tamadia bona sinadia idia tohotohodia. Uhau bona ulato ese band taudia o gita hataia taudia idia tohotohodia, bona taunimanima badadia ese bisinesi taudia bona politikol taudia badadia idia tohotohodia readia. To taunimanima hida ese hahekau tauna badana, Iesu Keriso, idia tohotohoa?

Orea ta, ladana Gallup, ese taunimanima edia kara ia tahua neganai, inai ia davaria: “America taudia 10 10 amo 8 8 idia gwau idia hekwarahi sisina Iesu ena haheitalai idia tohotohoa totona.” “Taunimanima 10 10 amo ta ta sibodia idia gwau idia hekwarahi bada” Iesu idia tohotohoa totona.

Dahaka dainai Iesu ita tohotohoa be mai ena anina bada, to tanobada taudia badadia ita tohotohodia be anina bada lasi? Gau ta be inai: Buka ta, ladana The World Book Encyclopedia ia gwau, Iesu Keriso ena kara bona hereva ese “taunimanima edia kara idia haidaua bada, to ma tau ta ena kara bona hereva be unai bamona lasi.” Keriso ese tuari taudia ia hakaudia lao lasi taunimanima idia doridia idia helalo-kerehai totona, to tanobada ena siahu taudia momo be unai bamona idia karaia. Iesu ese moni bada ia negea lasi taunimanima edia lalona ania totona, hari inai negai idia noho haroro taudia ese idia karaia bamona. Danu, politikol pati ta ia durua lasi. Taunimanima edia lalona ia haidaua diba, badina ia gwauraia herevana be mai ena siahu bona ia herevalaia dalana ese ma taunimanima haida edia hereva dalana ia hereaia.—Mataio 7:28, 29; Ioane 7:46.

Iesu ese taunimanima edia kudouna ia hamareredia, lauma dalanai bona tauanina dalanai edia mauri dalana idia haidaua vaitani totona. Mai ena siahu tauna ma ta ese taunimanima momo unai bamona ia hanamodia, a? Bible ia gwau, Iesu “be helaga. Ia be kara dika lasi, kerere ta lasi. Ia be kara dika taudia bamona lasi.” (Heberu 7:26) Hakaua tauna ma ta be unai bamona idia gwauraia diba a? Iesu ena haheitalai be goevadae—tanobada ai ia noho tauna ma ta be unai bamona lasi!

Reana haida idia gwau: ‘Manoka bona goevadae lasi tauna ta be unai haheitalai edena bamona ia tohotohoa diba?’ Idau negai idia vara gaudia edia sivarai ia torelaia tauna, ladana H. G. Wells, ena buka, ladana The Outline of History lalonai, ia gwau Keriso be tanobada ai ia noho neganai, taunimanima idia laloa idia be hegeregere lasi Keriso do idia tohotohoa. Ma ia gwau: “Ta ese [Keriso] ia laloa bada, anina be mauri dalana idauna ia gavaia, ia manadalaia vadaeni karadia ia rakatanidia, iena ura bona lalohadai ia biagudia, taunimanima idia davaria diba lasi moalena ia tahua.” Ena hereva dokanai Wells ia gwau: “Unai dainai idau nega amo ema bona hari, inai Galilea tauna, [Keriso] ita tohotohoa be auka herea momokani.”

To unai be momokani a? Momokani, dala goevadaena dekenai ta ese Keriso ia tohotohoa diba lasi. To aposetolo Petro ia gwau, Keriso be ‘iena kara toana ita dekenai ia hedinaraia, iena murinai do ita raka totona. Iena aena gabudia do ita raka.’ (1 Petro 2:21) Iesu ese edena “kara toana” ia hahedinaraia? Edena bamona ita tohotohoa diba?