Iesu ena Mauri bona Gaukara

Daidia Idia Moale Momokani?

TAUNIMANIMA iboudiai idia ura idia moale. Unai dainai Iesu be ororo dekenai ia haroro neganai, idia moale momokani taudia ia sivarailaidia. Unai ese helai taudia edia lalona ia veria. To Iesu ena haroro hamatamaia herevadia be taunimanima momo idia daradaralaia.

Iesu ese iena hahediba taudia ia hereva henidia, ia gwau: “Umui ogogami taudia be moale, badina be Dirava ena Basileia be umui emui. Harihari umui hitolo taudia be moale, badina be emui bogana do idia kunu. Harihari umui taitai taudia be moale, badina be umui be do umui kiri. Taunimanima ese umui idia badu henia neganai, umui moale . . . Unai dina ai do umui moale, do umui roho isi, badina be emui davana guba dekenai do ia bada.”

Danu, Iesu ia gwau, dagedage lasi taudia, hebogahisi taudia, lalo-goevagoeva taudia, bona maino idia karaia taudia do idia moale, badina tanobada do idia abia, Dirava ese do ia hebogahisi henidia, bona do ia gwauraidia iena natudia dainai.

Iesu ese moale ia herevalaia neganai, kiri bona moale karadia ia herevalaia lasi. Moale korikori ena anina be, taunimanima ta be ena lalona ai ia moale, ia lalo-namo, bona ia laloa iena mauri lalonai anina namona ia havaraia.

Unai dainai Iesu ese ia hahedinaraia idia moale momokani taudia be inai: Idia diba lauma gaudia dekenai idia dabu, edia kara dika dainai idia lalohisihisi, bona Dirava idia dibaia bona iena hesiai gaukara idia karaia taudia. Bena, herevana haida ese idia inai henidia o idia dagedage henidia Dirava ena ura idia karaia dainai, to idia moale badina idia diba Dirava idia hamoalea bona edia davana namona do idia abia, mauri hanaihanai unai.

To, Iesu ena hereva idia kamonaia noho taudia momo edia lalohadai be hari inai negai idia noho taudia haida edia lalohadai hegeregerena: idia laloa kohu momo bona moale karadia ese taunimanima edia lalona idia hamoalea. Iesu ia diba unai lalohadai be maoro lasi, unai dainai, ia gwau:

“Kohu momo taudia, madi o, badina emui hanamoa be umui abia vadaeni. Emui bogana idia kunu taudia, madi o, badina be do umui hitolo. Harihari umui kiri taudia, madi o, badina be do umui lalo-metau, do umui tai. Taunimanima ibounai ese umui do idia hanamoa neganai, madi o, badina be edia sene taudia ese peroveta koikoi taudia dekenai umui bamona idia hanamoa.”

Dahaka dainai Iesu ia gwau, unai bamona taudia ese dika do idia davaria? Badina be bema ta ese unai gaudia ia abidia bona ia lalodia bada, moale momokani ia havaraia gauna, Dirava ena hesiai gaukara, do ia laloa lasi. Iesu ia gwau lasi ogogami, hitolo bona tai ese taunimanima edia lalona idia hamoalea. To, nega momo unai bamona taudia ese Iesu ena hereva idia abia dae, bena moale momokani idia davaria.

Unai murinai, Iesu ese iena hahediba taudia ia hereva henidia, ia gwau: “Umui be tanobada taunimanima edia damena.” Idia be damena momokani lasi. To damena ese aniani ia hanamoa ia bodaga haraga garina. Iehova ena dubu badana ena pata helagana kahirakahira dekenai, damena idia senua, helaga taudia ese boubou gaudia idia damenadia totona.

Iesu ena hahediba taudia be “tanobada taunimanima edia damena,” badina be edia haroro gaukara amo taunimanima do idia hamauridia. Idia harorolaia sivaraina ese idia abia dae taudia do ia hamauridia! Edia mauri do hanamoa, do ia durudia do idia kara mai edia momokani bona mai edia abidadama ida, bena lauma dalanai do idia dika lasi bona edia kara do ia dika lasi.

Iesu ia gwau: “Umui be tanobada taudia ibounai edia diari.” Vaia, taunimanima ese lamepa idia atoa pata dekenai, bosea henunai idia atoa lasi. Unai dainai Iesu ia gwau: “Emui diari taunimanima edia vairana dekenai unai bamona do umui hedinaraia.” Edia haroro gaukara amo bona edia kara namodia amo Iesu ena hahediba taudia ese unai idia karaia. Luka 6:​20-26, NW; Mataio 5:​3-16.

◆ Daidia idia moale momokani, bona badina be dahaka?

◆ Daidia ese dika idia davaria, bona badina be dahaka?

◆ Edena dala ai Iesu ena hahediba taudia be “tanobada taunimanima edia damena” bona “tanobada taudia ibounai edia diari”?