Taunimanima Edia Henanadai Kekero Muramurana Dekenai

“AONEGA taudia ese uaina idia inua lasi.” Nigeria ena haroro tauna ta be unai bamona ia hereva. Vanegai, bema ta be unai bamona ia hereva, taunimanima ese ena hereva idia abia dae lasi. To hari inai negai, tano haida lalodiai kekero muramurana dadaraia karana ia bada ia lao.

Magasin ta, ladana Reader’s Digest ia gwau, “America taudia ese edia kara idia haidaua hari, kekero muramurana idia inua momo lasi.” Time magasin danu ena hereva be unai hegeregerena, ia gwau: “Hari, America taudia ese edia kekero muramurana inua karana idia hamaragia haraga.” France dekenai danu idia gwau uaina momo idia inua lasi, guna idia inua hegeregerena.

Dahaka dainai edia inuinu karana idia hamaragia? Taunimanima haida idia maumau momo, badina inuinu kekero taudia ese motuka idia taria neganai taunimanima momo idia hamasedia. Reader’s Digest magasin ia gwau: “Lagani 1983 ai, [United States dekenai] kekero muramurana dainai K89.5 bilion ia boio. Danu, kekero muramurana ese ruma bese momo edia noho ia hadikaia.” United Nations ena World Health Oreana ia gwau, namona be gavamani ese ‘kekero muramurana abia dalana idia koua sisina, edia bese taudia do idia gorere momo lasi bona do idia noho namonamo totona.’​—New Nigerian, March 16, 1983.

Haida idia gwau namona be idia koua vaitani. Ataiai ai gwauraia Nigeria haroro tauna be ma ia gwau: “Hereva Lada-isidia 20:1 ia gwau uaina inua taudia be aonega lasi taudia.” Haroro tauna ma ta ese Isaia 5:​11, 12, bona Isa 5:22 ia gwauraia, ia gwau: “Isaia ena Buka lalonai, Buka Helaga ese kekero muramurana ia gwauraia dika.”

Unai hereva dainai taunimanima idia henanadai, idia gwau: Unai Bible siridia edia anina be dahaka? Bible ese kekero muramurana ia taravatulaia a? Iesu ese uaina ia inua a, eiava greip ranuna, kekero lasi gauna ia inua a? Kekero muramurana dainai dika ia vara diba, unai dainai namona be Keristen taudia ese kekero muramurana idia inua lasi a? Bema Bible oi tahua, unai henanadai edia haere do oi davaria diba.