Taga Bona Ogogami Edia Dika

BIBLE ese taga ia gwauraia dika bona ogogami ia gwauraia namo a? Taunimanima momo be unai bamona idia laloa. Bible ena hereva lada-isidia rua ese ita idia durua diba lalohadai maorona ita abia totona.

Hereva Lada-isidia 10:15 ia gwau: “Taga tauna ena taga be ena hanua aukana, to ogogami taudia edia ogogami ese ia hadikadia.” Bena Her 10 siri 16 ia gwau: “Kara maoromaoro tauna ena davana be mauri ia davaria, to kara dika tauna ena ahuna be ena dika ia habadaia.” Unai siri ruaosi idia hamomokania heheni dalana mani oi laloa.

Her 10 Siri 15 ese ia hahedinaraia taga be mai ena namo, to ogogami be mai ena dika. Taga o moni ese taunimanima na gau dikadia haida amo ia gimadia diba reana. To, reana ogogami tauna ese hekwakwanai momo do ia davaria badina ena moni be gau ibounai totona ia hegeregere lasi. Inai gau dekenai Bible ena hereva be momokani.​—Kohelete 7:12.

To, Her 10 siri 15 ese ia hahedinaraia danu taga bona ogogami be mai edia dika. Taga taudia momo ese edia taga idia abidadama henia; idia laloa taga sibona ese ia gimadia. (Hereva Lada-isidia 18:11) To, taga ese ia durudia lasi edia ladana be Dirava vairanai do idia namo totona eiava ia doko diba lasi moalena do idia davaria totona. Momokani, ena taga dainai unai gau ia abidia be auka herea reana. Iesu ena parabole ta, taga tauna ese aniani haboua rumadia ia haginidia to Dirava dekenai gau momo ia henia lasi parabolena, ese unai ia hamomokania. (Luka 12:​16-21; 18:​24, 25) To, ogogami taudia momo idia laloa kerere, idia laloa idia ogogami dainai idia be helaro namona lasi.

Her 10 Siri 16 mani oi laloa. Herevana kara maoromaoro tauna be mai ena moni bada eiava lasi, to ena gaukara amo moale ia davaria diba. Iena gaukara amo ia davaria monina ia naria namonamo bena iena ladana namona Dirava vairanai ia hadikaia lasi. Kara maoromaoro tauna ena hekwarahi ena davana be moale hari inai negai do ia abia, bona mauri hanaihanai vaira negana lalonai. (Iobu 42:​10-13) Ena be kara dika tauna ese moni bada ia davaria, to hahenamo do ia davaria lasi. Moni ena hegima siahuna do ia laloa lasi bona Dirava ena ura hegeregerena do ia noho lasi, to ena moni o taga amo dika do ia badinaia ena mauri dinadia iboudiai lalodiai.