“Hereva Namodia Natuna Hadibaia Mai Moale Danu Ia Tubu bona Ia Bada Neganai Do Ia Namo Totona”

UNAI be hereva kwarana ta, magasin ta ladana Medical Aspects of Human Sexuality lalonai, bona unai sivarai dekenai lalona gorere ia stadilaia iunivesiti profesa Doketa Irene Jakab, ia hahedinaraia dahaka ita karaia natuna ia tubu noho lalonai bena gabeai ia bada neganai ena kara ia namo totona. Ia gwauraia “hereva namodia” haida be inai: ia gwau, gau badana be tamana bona sinana ese edia natuna idia lalokau henia, idia hadibaia dahaka be namo bona dahaka be dika, bona idia hadibaia dala maorona ia abia hidi totona. Ia laloa namo lasi tamana bona sinana be natudia dekenai idia badu haraga, bona namo lasi idia laloa hanaihanai kara goeva sibona do idia karaia diba, bona namo lasi idia dainai idia lalo-hekwarahi toana idia hahedinaraia momo, bona namo lasi idia sisiba henidia lasi.

Doketa Jakab ia gwauraia “hereva namodia” be maoro. Oibe, lagani tausen momo gunanai, Bible ese tamana bona sinana dekenai unai bamona sisiba ia henidia. (Mani, Hereva Lada-isidia 4:1; 13:24; 22:6; Kolose 3:21 oi itaia.) To, Profesa Jakab ia gwauraia lasi herevana ta Bible ese ia herevalaia, gauna be inai: gau badana be natudia idia hadibaia Gau Ibounai Havaraia Diravana do idia lalokau henia bona iena Hereva idia diba namonamo totona. Aposetolo tauna Paulo, ia gwau: “Tamana bona sinana e, emui natuna do umui habadua lasi, to [Iehova] ena hadibaia hereva idia dekenai do umui hadibaia.”​—Efeso 6:4; Deuteronomi 6:​4-7.

Bema unai bamona idia hadibaia lasi, natudia idia tubu lalonai mauri ena taravatu, dogo bamona, do idia abia lasi. Unai neganai dika idia davaria diba, badina taravatu utua bona kara dika tanobadana dekenai idia noho.