Tau Ena Gaukara

“¡Ropa, zapato, casa, y comida!” Unai hereva be Spain ena ane gunana ta amo; unai ane lalonai tau ese iena ruma bese ia henia gaudia be namo ia gwauraia: dabua, tamaka, ruma, bona aniani. Bona edia maduna idia laloa bada tataudia momo be mai moale danu unai maduna idia huaia toho.

To, bema oi be ruma bese naria tauna ta, tauanina gaudia idia hereaia lauma gaudia oiemu ruma bese dekenai oi henia, a? Eiava, tatau momo bamona, oi laloa ruma bese lalonai tomadiho gaukara be tatau edia gaukara lasi? Tano haida dekenai, taunimanima idia laloa lasi tatau edia gaukara be nega idia atoa edia natudia be Dirava bona Bible dekenai idia hadibaia totona.

Dirava ena Hereva be mai ena ruma bese tauna dekenai maduna ia henia iena ruma bese dekenai Dirava lalokau henia karana bona Dirava ena dala maorodia laloa bada karana ia hadibaia totona. Haheitalai be Efeso 6:4 dekenai, Bible be inai bamona Keristen tataudia ia hadibaia: “Tamana . . . e, emui natuna do umui habadua lasi, to [Iehova] ena hadibaia hereva idia dekenai do umui hadibaia.”

Ena be haida be unai hereva idia diba, to reana idia diba lasi unai siri ena anina be tamana, eiava ruma bese biaguna, dekenai ia hereva. Haheitalai be Spain bona Portugal gado idia herevalaia taudia. Idia laloa Efeso 6:4 be tamana bona sinana dekenai ia hereva. Unai gadodia dekenai, “tamana taudia” bona “tama sina taudia” edia hereva be tamona. To, Efeso karoa 6 ena siri 1 lalonai, aposetolo Paulo be tamana bona sinana ia hereva henia badina ia be Greek gado herevana, go·neuʹsin, ia gwauraia. Unai hereva be go·neusʹ amo idia abia bona ena anina be “tamana o sinana.” To siri 4 dekenai, idia gaukaralaia Greek herevana be pa·teʹres, bona ena anina be “tamana taudia.” Oibe, Efeso 6:4 dekenai, Paulo be mai ena ruma bese tauna ta dekenai ia hereva.

Momokani, bema ruma bese lalonai, tau ta be lasi ruma bese ia gunalaia totona, maduna be hahine dekenai. Iehova ena heduru amo, sinana momo be Iehova ena sisiba bona hadibaia hereva dalana dekenai edia natudia idia hadibaia namonamo. To, ruma bese lalonai Keristen tauna ia noho neganai, namona be unai gaukara ia gunalaia. Bema unai maduna ia naria namonamo lasi, ruma bese taudia be aniani abia noho karana lauma dalana dekenai do idia hekwarahi. Bona unai maduna ia naria namonamo lasi neganai, Iehova ese do ia hahemaoro henia.

Bible lalonai Keristen kongregesen elda bona hesiai taudia edia taravatu ia noho bona unai ese Dirava ena lalohadai ia hahedinaraia. Bible ia gwau unai gaukara ia karaia tauna be “iena ruma taudia, adavana bona iena natuna do ia biagua namonamo. Iena natuna ese ia do idia kamonai henia bona matauraia. Badina be bema tau ta ese iena ruma korikori taudia ia biagua diba lasi neganai, Dirava ena ekalesia edena bamona do ia gunalaia diba?”​—1 Timoteo 3:​4, 5, 12; Tito 1:6.

Namona be ruma bese tauna be sibona ena moale bona ena ura do ia negea iena natudia be lauma dalana dekenai idia namo totona. Nega haida ia be ma gaukara haida edia nega do ia hamaragia, ia be iena natudia ida nega bada ia henia totona. (Deuteronomi 6:​6, 7) To, ia be ma haida dekenai Dirava ese ia henia gaukarana do ia henia lasi. Iena natudia ia lalokau henia bona ia laloa bada dainai, ia be dabua, tamaka, ruma, bona aniani henia karana sibona do ia laloa lasi.

Natudia be “[Iehova] ena hadibaia hereva” dekenai hadibaia totona be mai hekwarahi bada. Unai dainai, gaukara badana be tau ena. Keristen tamana be iena gaukara ia karaia namonamo neganai, do ia laloa diba iena natudia be Dirava idia gari henia dainai ia be Iehova ena amo hahenamo ia abia. Ia be salamo tauna bamona ia hereva diba: “Tau matamata ena natuna be tuari tauna ena imana dekenai ia noho diba bamona. Ena diba udaia gauna be diba amo ia honu goada tauna do ia moale.”​—Salamo 127:​4, 5.