Saiens ese Hoa Karadia Ia Hakoikoia Diba, A?

Bible lalonai ia gwauraia hoa karadia be momokani idia vara, a? Taunimanima momo, saiens taudia bona tomadiho gunalaia taudia danu, edia haere be, lasi. Idia laloa hoa karadia abidadama henia karana be gari kava karana ta, bona idia laloa hari inai nega ena saiens karadia ese idia hahedinaraia, hoa karadia idia vara diba lasi. Unai dainai, London ena niuspepa ta, The Times, lalonai inai leta ta idia printaia, bona ia be mai anina. Saiens taudia haida danu ese unai leta idia sainia. Ia gwau:

“Ita gwau diba lasi saiens ese hoa karadia ia hakoikoia diba. Taunimanima haida idia gwau hoa karadia idia vara diba lasi; ma haida idia gwau hoa karadia idia vara diba. Unai taunimanima iboudiai ese edia lalohadai idia abia neganai, abidadama karana ta idia karaia. . . . Hoa karadia be guna idia vara lasi karadia. Herevana aonega taudia edia lalohadai be dahaka bona herevana taunimanima edia lalohadai idia tahua taudia ese dahaka idia davaria, to gau badana be ita diba saiens ese hoa karadia ia herevalaia diba lasi (badina ia ese guna idia vara gaudia sibona ia tahua). Saiens ena ‘taravatu’ be taunimanima ese idia davaria gaudia sibona amo idia karaia. Abidadama ena badina be unai amo ia idau.” (Aiemai italik.) Momokani, hari inai nega ena saiens karadia ese Bible ena hoa karadia idia hakoikoia diba lasi.