Basileia Haroro Ripoti

Venezuela Dekenai ‘Uiti Idia Gogoa’

Nega ta Iesu be lagani ta ta iboudiai idia karaia uiti gogoa gaukarana be haroro gaukara dekenai ia hahegeregerea. (Mataio 9:​36-38) Uiti gogoa gaukarana ena Biaguna be Iehova Dirava, bona tanobada hegegemadai uiti gogoa gaukara be bada momokani. Unai ia vara danu idia haroro henia momo lasi gabudia haida Venezuela dekenai.

Watch Tower Society ena Venezuela branch opesi ese sivarai ta idia gwauraia hedinarai. Unai sivarai ia vara Witness haida be Sabana Grande, Guárico State, dekenai idia lao haroro neganai. Unai Witness taudia idia gwau: “Ai noholaia rumana be gabu namona hebou ai karaia totona, unai dainai maoromaoro ai be taunimanima ai boiridia unuseniai idia mai hebou totona. Unai taudia be Iehova ena Witness taudia idia diba lasi. Ena be unai hanua dekenai haroro oreadia hani idia noho, to taunimanima idia ura bada Bible ena amo diba idia abia.

“Daba kahana lalonai hora toi ai gaukara bona adorahi kahana lalonai hora toi ai gaukara, ruma ta ruma ta dekenai ai lao bona taunimanima ai boiridia kerukeru hanuaboi ena hebou dekenai idia mai totona. Ai dekenai helai gaudia be lasi, unai dainai ai hamaorodia sibodia edia helai gaudia idia mailaia. Hebou hamatamaia ena nega ia ginidae neganai, taunimanima idia mai, idia ta ta iboudiai be edia helai gauna idia mailaia. Hebou ia ore neganai, ai hamaorodia ai ura davana lasi Bible stadi edia ruma dekenai ai karaia bona idia ura abia taudia iboudiai edia ladana ai torea. Idia mai taudia 29 iboudiai idia ura edia ladana be lista dekenai ai torea.

“Idia mai taudia edia tau ginigabena ia lao murinai iduara ai koua gwauraia, bona ai itaia ruma murimuri dekenai tatau toi idia gini. Hanuaboi ena hora be 9 o’clock neganai, aniani totona ai helai gwauraia neganai, bena idia be iduara dekenai idia pidipidi. Idia be inai bamona henanadai idia henia: ‘Inai hanua dekenai oi karaia harorona be dahaka? Badina be dahaka hari hanuaboi hebou oi karaia?’

“Ai nanadaidia taravatu ta ai utua o lasi. Idia gwau lasi bona idia gwau idia be unai hanua ena haroro dubudia toi edia pasto taudia. Idia lalohisihisi badina unai hanuaboi lalonai edia dubu dekenai taunimanima idia mai lasi. Ai boiridia idia vareai bona aiemai gaukara ai gwauraia hedinarai. Idia be buka bona magasin haida idia abia bona ai hamaorodia Thursday gabena do idia giroa mai.

“Thursday gabena ai unai pasto taudia idia giroa mai bona idia ida idia mai taudia 22 idia ura aiemai hereva idia kamonai. Unai pasto taudia idia laloa ai be hahine dainai idia ida ai herevahereva hebou neganai do ai hegeregere lasi. To, ai laloa unai hebou be namo. Hebou dokonai ai gwau edia diba Bible dekenai idia ura idia habadaia taudia edia ladana be lista dekenai ai torea. Pasto taudia edia bamodia haida idia ura edia ladana be lista dekenai ai torea, bona haida idia ura ai danu idia lao haroro gaukara dekenai!

“Ai hamaorodia haroro gaukara dekenai ai ida idia do lao lasi ela bona Bible ena diba ma haida idia abia bona karaia dalana idia diba guna. Dina ta ta iboudiai taunimanima be ruma dekenai idia mai, bona idia ura Bible ena hereva ai hadibalaidia. Nega haida, ai hereva ia lao hanuaboi momokani neganai, ai hamaorodia namona be edia ruma dekenai idia giroa lao. Unai teritori ai rakatania neganai, idia lalohisihisi bona idia gwau ai giroa mai neganai, idia be ai danu do idia lao haroro. Idia gwauhamata unai neganai edia diba do ia hegeregere.”

Witness taudia be unai teritori idia rakatania neganai, taunimanima 40 idia ura Bible idia stadilaia. Unai kamonai taudia edia ladana be unai gabu kahirakahira kongregesen dekenai idia henia, unai kongregesen ena daudau be kilomita 50 unai hanua amo. Unai murinai, ma hanua ta ena Witness taudia be unai hanua dekenai idia lao, unuseniai idia noho totona, bona sivarai namona idia harorolaia goadagoada taudia edia grup ta idia karaia.