Du Idaudia Sibona Lasi

Vadivadi taudia be Caesarea dekenai, Israel kone dekenai ia noho daudau bouti vareai gabunai, Mediterranean Davarana lalonai du idia itaia neganai idia hoa. Heroda Badana ese unai bouti vareai gabuna ia haginia bona unai siti be Kaisara Augustus ena ladana ia henia, unai tau ena ladana ia hanamoa totona.

Idau negai idia vara gaudia idia davaria totona tano idia geia taudia ese unai siti gunana ena kahana badana idia geia hedinarai, edia hebouhebou gabu badana idia geia hedinarai danu. Davara dekenai idia diho badina idia ura itaia kone kahana dekenai dahaka idia karaia bouti vareai gabuna idia haginia totona.

The New York Times niuspepa, (January 8, 1991 gauna) ena sivarai ta ia gwau, davara dekenai idia noho du be pavapava ta ena ruma gunana, unai ruma be davara dekenai idia haginia. Unai du be mai anina bada, badina idia dekenai Roma gavana haida edia ladana idia koroa, guna unai taudia edia ladana idia diba lasi. Bouti “naria” tauna ena ladana idia koroa danu, “unai toretore be hari bouti vareai gabuna ena idau negai sivarai ia gwauraia gauna ginigunana.”

Bible idia stadilaia taudia idia diba aposetolo Paulo ena misinari laolao rua dokodiai ia be bouti amo unai gabu dekenai ia vareai. Unuseniai, ia be haroro tauna Filipo danu ia noho, bona reana iena ekspiriens namodia ese hahediba taudia idia hagoadaia bada. (Kara 18:​21, 22; 21:​7, 8, 16) Aposetolo edia Kara bukana dekenai iena ekspiriens namodia momo ita duahidia diba.

Vadaeni, kone kahana dekenai idia gini du be idau negai sivarai idia gwauraia, to ita gwau lasi idia be anina lasi. Hari, Keristen taudia ese unai du idia itaia neganai, edia idau negai tadikakadia idia lalodia, guna, idia be mai goada danu sivarai namona be bouti vareai gabudia dekenai idia harorolaia, bona “tanobada ena kahana ibounai” dekenai idia harorolaia danu.​—Kara 1:8.

[Picture Credit Line on page 32]

Garo Nalbandian