Inai Oi Laloatoa, A?
Oi laloa idia hanai hua lalodiai edia Gima Kohorona ese oi idia durua, a? Namona be oi laloatao gaudia be henuna henanadai amo oi tohoa:
▫ Dahaka badina badana ta dainai Iesu ese taunimanima edia gorere ia hanamoa? Hari inai nega ena mamoe bamona taudia edia hutuma bada herea hagoadaia totona, idia hahedinaraia Aramagedono amo do idia roho mauri taudia edia gorere be nega sisina Aramagedono ena murinai do ia hanamoa. (Isaia 33:24; 35:5, 6)—12/15, rau 12.
▫ Badina be dahaka ita idia hadibaia loulou: “Guriguri do umui goadalaia nega ibounai”? (Roma 12:12) Reana mauri ena metau bona maduna idauidau dainai ita be guriguri ita laloaboio. Eiava reana hekwakwanai ese ita idia koua dainai, Basileia helarona moalelaia karana ita rakatania, bona reana guriguri ita hadokoa danu. Unai dainai, namona be ita idia hadibaia loulou bona ita idia hagoadaia ita guriguri totona bona unai dala dekenai Iehova ena kahirakahira ai ita mai.—12/15, rau 14.
▫ Dahaka ese ia hamomokania Noa ena negai Utu-Utu Badana be gau bada herea dainai taunimanima idia laloaboio diba lasi? Haida idia gwau Utu-Utu Badana ena sivarai gunadia 500 bamona idia noho, iduhu bona bese idauidau 250 bona ma haida ese unai sivarai gunadia idia gwauraia. Unai sivarai iboudiai lalodiai hereva haida edia badina be tamona.—1/15, rau 5.
▫ Peroveta koikoi taudia hari inai nega ai be edena bamona peroveta koikoi taudia Ieremia ena nega ai bamona? Peroveta koikoi taudia hari inai nega ai idia gwau Dirava ena hereva idia gwauraia, to idia be Dirava ena hereva idia henaoa badina idia harorolaia gaudia be taunimanima edia lalohadai bona Bible ena hereva amo taunimanima idia veria oho. Basileia ena hadibaia hereva dekena amo idia veridia oho danu. (Ieremia 23:30)—2/1, rau 4.
▫ Lauma helaga ena ladana dekenai bapatiso ita abia neganai dahaka ia hahedinaraia? Ia hahedinaraia ita be lauma helaga ida do ita gaukara hebou, bona Iehova ena taunimanima edia orea lalonai ena gaukara dalana do ita koua lasi. Unai dainai, ita be hesiai tauna mai ena kamonai bona mai ena kara maoromaoro oreana ida bona kongregesen edia elda taudia ida ita gaukara hebou namonamo. (Heberu 13:7, 17; 1 Petero 5:1-4)—2/1, rau 18.
▫ Badina be dahaka laulau tomadiho henia karana ese tomadiho tauna ia hadikaia? Bible ia hahedinaraia Iehova Dirava be tomadiho laulau ia ura henia lasi momokani bona tomadiho laulau ese idia hahelagaia taudia idia durudia lasi Dirava kahirakahira ai idia lao totona. (Deuteronomi 7:25; Salamo 115:4-8) Satana Diabolo ese taunimanima “edia lalona ia hadiburaia” bona unai dainai hereva momokani ena “diari idia itaia diba” lasi. (2 Korinto 4:4) Unai dainai tomadiho laulau idia hahelagaia neganai, idia be demoni edia gaukara idia durua. (1 Korinto 10:19, 20)—2/15, rau 6-7.
▫ Badina be dahaka Bible ena nega lalonai taunimanima idia laloa mamoe be gau badadia? Mamoe ena huina be nega ibounai ia tubu gauna bona idia gaukaralaia diba ruma bese taudia edia dabua karaia totona eiava idia hoihoilaia diba. Mamoe tau, ram, edia doana idia hiriria Iubile negana idia boiboilaia totona eiava tuari kara ena heau dalana idia taria totona. Mamoe be Israel taudia ese idia ania diba animal goevana dainai, bema ta be mai ena mamoe serina, aniani do ia abia diba, bona nega momo mamoe edia amo rata idia abia diba eiava sisi idia karaia diba.—3/1, rau 24-5.
▫ Dirava idia lalokau henia taudia be Dirava ena Basileia ia mai totona idia guriguri neganai dahaka idia noia? (Mataio 6:10) Idia noia, Dirava ena guba Basileia be kara ta do ia karaia tanobada ena gavamani ia haoredia totona, badina unai gavamani idia gwauhamata maino momokani bona noho namo idia havaraia totona, to idia karaia lasi. (Daniel 2:44)—3/15, rau 6.
▫ Tomadiho Gwauraia Taudia be daidia, bona Toi Tamona idia hadibalaia, a? Tomadiho Gwauraia Taudia be lagani 150 C.E. bamona ia lao 200 C.E. kahirakahira negana ai idia noho dubu taudia. Idia dibaia Keristen dalana hamomokania totona idia toretore, badina unai neganai Roma ese ia biagua tanobadana lalonai, Keristen tomadiho dalana idia hadikaia diba lalohadaidia be momo. Unai taudia ta lasi ese Toi Tamona idia hadibaia.—4/1, rau 24-9.
▫ Sekaria, Ioane Bapatiso ena tamana, be malana dika bona taia kudima ai ia lao, Luka 1:62 ese ia hahedinaraia hegeregerena, a? Gabriel ia gwau Sekaria ena kamonai dalana lasi, to iena hereva dalana, do ia idau. (Luka 1:18-20) Luka 1:64 ia hereva bamona, ia gwau: “Unai neganai [Sekaria] ena uduna ia kehoa, ena malana danu ia maoro, vadaeni ia hereva.” Oi laloa, iniseniai iena kamonai dalana ia idau idia herevalaia lasi. Reana Luka 1:62 dekenai ia herevalaia “toana” ena anina be kwarana idia hamarerea eiava imana ena toana amo idia tahua Sekaria ena ura be dahaka.—4/1, rau 31.