Gibeon Taudia—Idia ese Maino Idia Tahua

ATAI ia noho laulauna lalonai, idia gwau unai ororo dekenai ia noho sitina ai gunaguna Gibeon hanuana ia noho, ia be kilomita 10 Ierusalem ena mirigini kahana dekena amo.

Reana oi diba vadaeni Iosua ese Israel bese taudia be Gwauhamata Tanona lalonai ia hakaudia vareai bona Ieriko hanuana ia hamorua ena nega sisina murinai, Gibeon taudia edia sivarai ia vara. Gibeon taudia be Kanana taudia bona idia diba Israel taudia dekenai do idia kwalimu diba lasi, badina ia hedinarai goevagoeva Dirava be Israel taudia ia durua. Dahaka do idia karaia? Gibeon taudia ese koikoi karana ta idia hegaegaelaia bona Gibeon dekena amo taunimanima haida idia siaia Israel taudia dekenai, edia toana be gabu daudau amo idia mai taudia edia toana bamona. Edia hekwarahi maino do idia abia totona ese anina ia havaraia, badina Israel be idia danu gwauhamata idia karaia do idia tuari henidia lasi totona. Edia koikoi karana ia hedinarai neganai, Gibeon taudia be Israel taudia edia au siria taudia bona ranu utua taudia ai idia lao.

Dirava ese unai maino tahua taudia ia lalo-namo henidia. Pavapava ima ese Gibeon taudia idia tuari henidia neganai, Iosua be idia totona ia tuari bona Dirava ese Iosua ia durua. Unai tuari lalonai, Iehova ese hoa karana ia karaia; dina ena nega ia halataia bona dina ia diho lasi ela bona tuari ia ore.​—Iosua 9:​3-27; 10:​1-14.

Unai ororo idia geia taudia ese guri dobu hereana ta idia davaria, nadi dekenai idia geia gauna. Gibeon taudia be vadavada amo idia diho lao unai guri dekenai tano lalona amo ia lohilohidae ranuna idia utua dae totona. Reana unai be 2 Samuel 2:13 dekenai ia gwauraia ‘Gibeon ena ranu guri.’ Idau negai idia vara gaudia edia sivarai idia diba totona tano idia geia taudia ese gunaguna nadi dekenai idia geia daiutudia idia davaria, unai daiutu dekenai uaina karaia kohudia idia davaria. Oibe, reana Gibeon be uaina karaia hanua badana ta.

David ena nega lalonai, Dirava momokanina ena palai, eiava dubu kalagana, be iniseniai ia noho. Pavapava Solomon be iniseniai ia mai boubou karana ia karaia totona. Nihi lalonai Iehova be Solomon dekenai ia hedinarai, bona ia dekenai ia gwauhamata, ia gwau ‘aonega bona lalo-parara kudouna’ do ia henia, bona taga do ia henia danu. (1 Hanua Pavapavadia 3:​4-14; 2 Sisiga 1:3) Inai magasin ena rau 12-17 dekenai ia noho sivaraina ese ia hahedinaraia Gibeon dekenai idia noho taudia edia tubudia be gabeai Dirava ena bese lalonai gaukara namona ta idia abia. Unai sivarai oi diba, a?

[Picture Credit Line on page 32]

Pictorial Archive (Near Eastern History) Est.