Baeileia Haroro Ripoti

Bolivia Dekenai Hereva Momokani ese Nun Ta Ia Ruhaia

KUDOU maoro taudia momo be tomadiho koikoi idia rakatania noho, Bible ena hereva momokani idia dibaia noho, bona Dirava momokani Iehova idia tomadiho henia. Bolivia dekenai taunimanima 7,600 bona ma haida, nun ta danu, be unai bamona idia karaia.

Ena mauri lagani be 9 neganai, M—— be nega ginigunana dekenai Iehova ena Witness taudia ese idia hereva henia. Witness taudia ese ena ruma idia vadivadi henia hamatamaia neganai, ia ese iduara ia kehoa, bona unai be nega ginigunana Dirava ena ladana Iehova ia kamonai. Lagani momo lalodiai ia ese unai ladana ia laloaboio lasi.

Ena ruma bese lalonai ia sibona be kekeni, unai dainai, idia hamaoroa nun ta ai do ia lao. M—— ia gwau: “Lau moale bada badina lau be Dirava ena hesiai gaukara do lau karaia​—unai be lauegu lalohadai.” Katolik nun edia sikuli gabuna dekenai kara kerere idauidau bona haida dadaraia karana ia itaia neganai, iena moale ia boio. Ia gwau: “Reana unai lalohisihisi negadia bona tauanina dalanai bona lauma dalanai ai idia botaia kara lau laloa neganai, lau laloa Dirava be lalokau Diravana lasi, to Ia be hebogahisi lasi dekenai taunimanima ia panisia Diravana.”

Ia hereva noho, ia gwau: “Nun ena dagi lau abia neganai, aiemai Bible lalonai Iehova ladana lau davaria lasi. ‘Yahweh’ sibona lau davaria, bona lau daradara bada. Nega ta lau lao Iehova ena ladana idia gwauraia taudia lau tahudia, to lau davaridia lasi.

“Nega ia lao murinai, lauegu ruma bese taudia lau vadivadi henidia noho neganai, toretore ena toa ta lau itaia, unai toa ia gwau, ‘Iehova Ena Witness Taudia Edia Kingdom Hall.’ Lau ura lau hamaorodia idia be peroveta koikoi taudia, to idia ta be idia noho lasi hebou gabuna lalonai. Sunday ai lao giroa. Idia be hebou idia karaia noho, bona idia momo idia hoa sisina badina nun ta be nun ese idia karaia dabua ia karaia bona ia vareai edia hebou lalonai. Hebou murinai lau ura raka lasi haraga. To Witness ta ese lau ia hanamoa, unai dainai lau henanadaia henia, lau gwau, ‘Dahaka dainai, Helaga Tauna be unai ladana amo umui hevasehalaia?’ Lauegu henanadai dainai Bible ena hereva ai kikilaia hebou, bona lau hamaoroa lauegu ruma bese taudia edia ruma dekenai lau do ia vadivadi henia. Lauegu tama bona sina ese idia lulua. Hua rua murinai, ai hedavari lou bona ia ese lau ia boiria ena ruma dekenai Bible stadi do ai karaia totona. Ia ese Bible amo ia hahedinaraia goevagoeva Keristen taudia ese Dirava ena ladana idia gaukaralaia be gau badana, unai ese lauegu lalona ia veria. Unai hereva momokani ese lauegu lalona ia hagoadaia, bona unai amo nun dagina bona edia anina lasi hahediba herevadia lau rakatania.

“Katolik nun edia sikuli gabu dekenai lau noho neganai, gau momo lau lalodia tao. Haheitalai ta be, nega ta lau ura aniani ma sisina lau abia. Unai dainai, revareva lau torea lauegu tama bona sina dekenai aniani haida do idia siaia totona, to lau diba lasi Katolik nun edia sikuli gabuna dekenai ai torea revarevadia be idia duahia. Murinai, aniani gabuna dekenai, paraoa bada bona jam bada herea be lauegu vairana dekenai idia atoa bona lau idia doria ibounai do lau ania haorea totona. Vadaeni, lau be unai aniani momo lau ania diba lasi. Lauegu turadia lau hamaorodia neganai, idia ta ese lau ia hamaoroa lau ania ore diba lasi paraoa be lau hamakohia sisina sisina bona reirei dekenai lau negea. Unai lau karaia neganai, nun ta ese mai badu danu lau ia doria reirei dekenai, bona lau ia hamaoroa, lauegu malana amo unai reirei ibounai do lau demaria ela bona unai reirei ia goeva. Unai ruma be bada momokani. Iena hereva hegeregerenai lau karaia neganai, lau idia kirikirilaia regena lau kamonai​—idia ta ese hebogahisi idia hahedinaraia lasi momokani.

“Hari lau moale bada herea badina hereva momokani ese lau ia ruhaia unai kara kerere iboudiai amo. Unai kara idauidau amo lau gini siri bona lau noho namo. Momokani, lauegu mauri lalonai, gau haida lau haboioa unai. Gau ta be, lauegu tamana ese ruma amo lau ia lulua. Katolik nun sikulina lau do rakatania lasi neganai, lau ese nun matamatadia haida lau durudia hereva momokani idia diba totona. Mai moale danu lau hereva hedinarai, ai haida be emai mauri ai gwauhamatalaia Iehova Dirava dekenai!

“Katolik nun edia sikuli lau rakatania neganai, lauegu tamana ia lalo-parara lasi dahaka dainai dava bada moni gaukarana lau dadaraia, to danu unai be nega haorea gaukarana. To, lau ura egu nega bada be Dirava ena hesiai gaukara dekenai lau halusia. Hari lau be regular pioneer hesiai gaukara lau karaia, lauegu mauri be ia auka lasi bona mauri namona lau davaria. Lau moale bada badina lauegu sinana bona lauegu tadikakadia be lau ida Iehova ena hesiai gaukara ai karaia hebou.”

Momokani, Bible ena hereva momokani ese taunimanima ia ruhaia tomadiho koikoi ibounai amo, bona idia ese moale hanaihanai idia davaria diba.​—Ioane 8:32.