Hanibi amo Aonega Idia Abia Diba

“Idia ore lagani haida lalodiai, enjinia taudia bona kohu idauidau karaia taudia ese gau ta idia lalo-pararalaia, to hanibi be idau nega amo unai gau idia diba: bema severasevera gauna ta ena kahana idauidau be 6 neganai do ia goada herea.”​—The New York Times, October 6, 1991.

TAUNIMANIMA be manumanu amo aonega idia abia diba be hoa gauna ta lasi. Idau negai ia noho abidadama tauna Iobu be nega ta ia gwau: “Uda boromadia do oi nanadaidia, bena oi do idia hadibaia; atai manudia danu, bena oi do idia hamaoroa. . . . Idia iboudiai bogaragidiai daika be ia diba lasi Iehova imana ese unai kara ibounai ia karaia, a?” (Iobu 12:​7-9) Oibe, hanibi ena ruma lalonai daiutu ta ta iboudiai edia haba be 6 bona unai ese Gau Ibounai Havaraia Diravana ena aonega ia hedinaraia.

Unai daiutu ena haba be wax amo idia karaia bona daiutu ta ta iboudiai edia uduna be milimita tamona henunai, to idia be goada herea. Oibe, ena be edia metau be nega 30 amo oi habadaia to unai bamona metau gauna idia huaia diba.

Unai goada gauna be ma gau haida dekenai idia gaukaralaia diba, hegeregere, idia gaukaralaia diba gau ta ese kohu ia botaia karana ena mamina idia hamaragia totona. Ami ena kohu be mai ena parachute ida be peleini amo tano dekenai idia negea diho neganai, kohu ia dika lasi badina unai goada gauna ese botaia mamina ia koua. The New York Times niuspepa lalonai unai goada gauna dekenai ia gwau: “Idia ese metau gaudia, ami edia jeep danu be patapata dekenai idia kwatua, bena unai patapata henunai hanibi edia haba 6 daiutu toana bamona gaudia idia atoa bona unai kohu ese tano ia botaia ena mamina ia hamaragia.”

Taunimanima be unai haba 6 daiutu toana be gau idauidau amo idia karaia diba. Idia gaukaralaia momo gauna be pepa amo idia karaia. Nylon-fiber pepa bona kamoa tao gauna idia gaukaralaia unai haba 6 daiutu toana idia karaia totona, bena peleini badadia haida edia kopina dekenai idia atoa. Unai ese peleini ena kopina ia hagoadaia to ia metau lasi. Dahaka dainai?

Unai haba 6 edia daiutu padanai hodahoda ia noho, unai dainai ia metau lasi. Danu, hodahoda be namo herea siahu bona keru ia koua totona.

Unai hanibi be unai “aonega” ia diba lasi, ia be sikuli dekena amo enjinia ena diba ia abia lasi. To, dina ta ta iboudiai ia gaukara, Havaraia Tauna, Iehova, ese ia lalonai ia atoa dibana hegeregerena.