Dirava Tahua Negana
INAI rau dekenai laulauna be Acropolis, Athens dekenai, guna unai be dirava bona dirava hahinedia momo tomadiho henia gabuna. Acropolis ena henunai be Areopagus, taunimanima idia gwau idau negai unai be kota gabuna. Lagani 2,000 gunanai, aposetolo Paulo be unai gabu dekenai ia gini bona haroro namo hereana ta ia henia. Henuai be iena hereva haida:
“Rara tamona dekenai [Dirava] ese taunimanima bese ibounai ia karaia, bona tanobada ena kahana ibounai do idia noho. Ia sibona ese edia nega bona edia tano dokona ia gwauraia guna. Inai bamona ia karaia, Dirava do idia tahua totona, bona sedira idia tahua noho lalonai do idia davaria. To momokani, Dirava be daudau lasi ita ta ta dekenai. Badina be, ‘Ia lalonai ita mauri, ita marere bona ita noho.’ ”—Kara 17:26-28.
Bema taunimanima be Paulo ena hereva idia kamonai tanobada ena sivarai be idau momokani! Bema taunimanima idia diba Tanobada Ibounai Lohiabadana, Iehova, ese tau ta amo idia iboudiai ia havaraia, vadaeni, tuari momo bona hisihisi momo be idia vara lasi.
Hari inai negai, bese abia isi karadia, taunimanima gini siri karadia, idau bese dadaraia karadia, bona taunimanima edia noho hadikaia karadia ese taunimanima idia hapararaia. To Paulo ena hereva idia do momokani noho. Ita ibounai be Dirava ese ia havaraia tau tamona ena natudia. Unai dala dekenai ita ibounai be tadikaka bona taihu. Bona ita do davaria diba negana lalonai nega ia do noho Dirava ita tahua totona.
Iena hereva dokona ita laloa neganai Paulo ena hereva edia anina be bada herea. Ia gwau: “Dirava ese dina ta ia abia hidi vadaeni, unai dina dekenai iena abia hidi tauna ese tanobada ibounai do ia kota henia mai maoromaoro danu. Bona inai kara Dirava ese ia hamomokania taunimanima ibounai vairanai, unai tau mase dekena amo ia hamauria dainai.”
Iesu ia toreisi lou be tanobada ena sivarai hereva momokanina ta, bona Paulo ese ia hahedinaraia hegeregerena, unai ese ia hamomokania taunimanima kota henidia dinana do ia vara. Edena negai? Ita diba Paulo be Areopagus dekenai ia gini bona unai hereva ia gwauraia murinai lagani 2,000 idia lao ore vadaeni bona unai dina ia mai kahirakahira momokani. Momokani, Bible ena peroveta herevadia idia guguru dainai idia hahedinaraia unai dina ia kahirakahira momokani. Unai ita laloa be namo! Dirava ita tahua momokani be gau badana, badina, Paulo ese Atena taudia ia hamaorodia hegeregerena, “Dirava ese . . . taunimanima ibounai gabu ibounai dekenai ia hamaoroa, ia gwau, ‘Umui emui lalona umui giroa.’ ”—Kara 17:30, 31.