Sivarai Gwauhamata Tanona Amo

Oi Aniani—Paraoa Oi Ania

NEGA ta, Iesu bona ena hahediba taudia be ruma ta lalonai idia noho neganai, hutuma bada dainai ‘idia aniani diba lasi.’ (Mareko 3:20) Nega ta Iesu be Farisea ena ruma dekenai ia vareai “idia aniani totona.” (Luka 14:1) Edia aniani be dahaka oi laloa?

Idau negai Israel taudia be sedira paraoa idia laloa, badina Heberu bona Greek gado ai “aniani ania” anina be “paraoa oi ania.” Unai be maoro, badina uiti eiava bali amo idia karaia paraoa be edia aniani badana ta.

Hari inai negai taunimanima momo idia laloa Heberu iduhu kwaradia be mamoe naria taudia bona Iesu ena hahediba taudia be haoda taudia. Haida be unai bamona, to idia iboudiai be unai bamona lasi. Idia momo edia mauri dekenai uiti be gau badana. Ia hedinarai Isako bona Iakobo edia nega ai unai be momokani, Genese 26:12; 27:37; bona 37:7 ita duahia neganai unai ita laloa. Bona Iesu ena negai, uma gaukara be Galilea ena gaukara badana dainai, aposetolo ai idia lao taudia haida be reana guna uiti hadoa biru taudia, a?

Reana unai be momokani, badina Gwauhamata Tanona ai uiti idia hatubua momo, bona Bible ese ia gwauraia momo. (Deuteronomi 8:​7-9; 1 Samuel 6:13) Dahaka idia karaia?

October bona November lalonai, medu negana ginigunana ese tano ia hamanokaia murinai, uiti ia hadoa tauna ese tano ia geia bona uhe ia hadoa. Gabeai medu negana ese iena uhe ia hatubua bena, April bona May lalonai, siahu ia do mai lasi neganai do idia mage bona kala be golo bona korema sisina. Iboudiai be uiti gogoa negana idia diba dainai oi duahia diba ia be nega hahedinaraia dalana. (Genese 30:14; Hahemaoro Taudia 15:1) Lauri kahanai ena fotograf amo lagani ena nega oi gwauraia diba, a?a Bona Iesu ena hahediba taudia ese uiti ena huahua idia ania negana be dahaka negana?​—Mataio 12:1.

Uiti gogoa gaukarana dekenai hadohado taudia idia gaukara bada. Uiti gogoa taudia be imana dekenai kaia amo uiti idia utua bona idia kwatua hebou, rau henuai oi itaia diba hegeregerena. Momokani, uiti haida idia itaia lasi bona reana tano dekenai idia moru, unai dainai Ruta ia gogoa diba. (Ruta 2:​2, 7, 23; Mareko 4:​28, 29) Uiti be kwadia gabuna, Arauna ena bamona, dekenai idia abia lao. Unuseniai dahaka ia vara? Bible be “uiti kwadia auna bona boromakau gaukaralaidia gaudia” ia herevalaidia. (2 Samuel 24:​18-22; 1 Sisiga 21:23) Uiti be nadi palakapalakana ai eiava tano aukana ai idia atoa. Boromakau tau eiava ma boromakau ta do ia raka giroa, raka giroa, bona uiti ia moia. Reana unai animal ese moia auna ta ia veria, bona unai ese uiti ia hamakohia bena anina idia kokia diba.​—Isaia 41:15.

Bena ia hegeregere idia hagoevaia totona, tano kadoa gauna eiava savolo amo hodahoda dekenai idia tahoa daekau, atai oi itaia hegeregerena. (Mataio 3:12) Reana hadohado tauna be lai ia mai negana, adorahi kahanai, ia hagoevaia, bona lai ese miro (uiti ena kopina) ia kokia oho, kahana ta dekenai ia moru. Uiti anina idia haboua bona nadi maragidia amo idia hapararaia murinai, ia hegeregere ruma ai idia atoa hegaegae​—eiava edia aniani badana, paraoa, idia karaia totona.​—Mataio 6:11.

Bema oi be ruma hahine bona unai gaukara oi karaia, dina ta ta iboudiai moia gauna oi gaukaralaia flaoa oi karaia totona, reana unai flaoa do oi moia sisina. Eiava oi moia bada “paraoa namona” oi karaia totona, Sara ese moia bada gauna ia karaia “paraoa kuborudia” bena taunimanima tauanina idia atoa anerudia ia henidia, eiava Israel taudia ese idia henia uiti boubou gaudia Iehova dekenai bamona. (Genese 18:6; Esodo 29:2; Levitiko 2:​1-5; Numera 28:12) Sara be ranu amo uiti ena flaoa ia hapariparia paraoa ia karaia totona.

Henuai, idia karaia paraoa be bolo bamona bona paraoa severasevera, palakapalakana ta oi itaia diba, idia atoa hegaegae idia gabua totona. Unai bamona kuboru paraoa badadia be nadi siahudia eiava auri gabua gaudia dekenai idia gabua diba, hahine ese ia karaia hegeregerena. Unai ese oi ia durua diba Sara be vadivadi anerudia totona ia karaia gauna bona gabeai negana ta ai Lota ena ruma besedia ese idia karaia gauna oi laloa totona, a? Ita duahia, ia gwau: “[Aneru] be ia danu ena ruma dekenai idia raka vareai. Lota ese paraoa kavakava ia gabua, bona aniani namona ia nadua, vadaeni idia ania.”​—Genese 19:3.

[Footnotes]

[Picture Credit Line on page 24]

Pictorial Archive (Near Eastern History) Est.

[Picture Credit Line on page 24]

Pictorial Archive (Near Eastern History) Est.

[Picture Credit Line on page 25]

Pictorial Archive (Near Eastern History) Est.

[Picture Credit Line on page 25]

Garo Nalbandian