“Leona mai Ena Boiboi Bada Bamona”

SATANA ia noho herevana oi abia dae a? Hari inai negai, momo ese unai hereva idia abia dae lasi. Idia laloa Satana ia noho herevana be “saiens ena hereva hegeregerena lasi.” Lagani 1911 ai Encyclopædia Britannica ia gwau saiens ese idia vara gaudia idauidau momo edia badina ia gwauraia hedinarai dainai, Satana ese unai gau ia havaradia herevana be maoro lasi. Tomadiho herevadia idia diba momo taudia momo idia gwau Satana be gori, ia be taunimanima edia lalohadai dikana ena toana mo.

Hereva momokanina be dahaka? Bema Baibel oi abia dae, namona be oi abia dae Satana be ia noho. Iesu be unai ia abia dae bona Satana ia gwauraia “tanobada ena lohia.” (Ioane 14:30) Aposetolo Paulo ese ia gwauraia “inai tanobada ena dirava.” (2 Korinto 4:4) Bona aposetolo Ioane ia gwau: “Satani ese tanobada taudia ibounai ia gunalaia noho.”​—1 Ioane 5:19.

Bema Ioane ena hereva oi abia dae lasi, iseda negai idia vara gaudia mani oi lalodia. Orea haida ese taunimanima idia aladia mase kava bona gavamani haida ese idia hahisidia ela bona idia mase. Tuari badadia idia vara bona bese haida idia haoredia vaitani toho. Taunimanima momo aladia mase karana, hahine reipia karana, bona memero kekeni hadikadia karana be edena bamona? Toana be Satana ese inai tanobada taudia ia gunalaidia, ani?

Aposetolo Petro ia gwau: “Umui . . . naria namonamo. Umui ia tuari henia tauna, Satani be leona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Petero 5:8) Bema leona ta be emui gabu ai ia loaloa, ia noho eiava ia noho lasi do oi herevalaia a? Eiava do oi heau mauri a?

Momokani, Satana be ia noho. Ia hebogahisi lasi, ia dagedage, bona iena goada ese iseda goada ia hereaia. Unai dainai, ena goada ese Satana ena ia hereaia Tauna oi heau henia, do oi mauri totona. “Iehova ena ladana be kohoro aukana. Kara maoromaoro tauna be ia lalonai ia heau vareai bena ia mauri.” (Hereva Lada-isidia 18:10) Namona be Iehova Dirava dekenai mauri oi tahua, bona oi diba kahirakahira ia ese taunimanima iboudiai be unai dika tauna, Satana, ena siahu amo do ia ruhadia. Unai ese taunimanima do ia hanamodia bada!​—Apokalupo 20:​1-3.