Inai Oi Laloatao, A?

Gima Kohorona, vanegai gaudia, be oi duahidia mai emu moale ida a? Bema oibe, henu herevadia do oi lalodia lou mai emu ura ida:

▫ Aposetolo edia negai, lauma helaga ena gaukara idauidau ese dahaka idia hamomokania?

Lagani 1,500 unai nega gunanai, Dirava ese Israel besena ia abia hidi iena orea taudia, to lauma helaga ena gaukara idauidau ese idia hahedinaraia unai neganai Dirava ena lalo-namo be Keristen ekalesiana matamatana, Iesu ese ia haginia gauna, dekenai ia noho. (Heberu 2:​2-4 itaia.)​—8/15, rau 5.

▫ Badina be dahaka Iehova ena Witness taudia idia hutuma idia lao?

Badina ginigunana be Dirava ena hahenamo dainai. Idia karaia gaukarana be iena. Idia haroro neganai, idia hadibaia herevadia iboudiai be Bible ena amo. Badina ma ta be, idia abia dae vaitani Dirava ese Keriso Iesu na Keristen ekalesiana ena kwarana ai ia halaoa vadaeni.​—9/1, rau 19.

▫ Ena be David be Bataseba ida ia kara dika rohoroho, to dahaka dainai Iehova ese ia bogaia hisi?

Badina badana be Basileia gwauhamatana, Dirava be David ida ia karaia gauna, dainai, bona David ena hebogahisi dainai bona ia be mai ena momokani ida ia helalo-kerehai dainai. (1 Samuel 24:​4-7; 2 Samuel 7:12; 12:13; Salamo 51:​1, 2, 17)​—9/15, rau 10, 11.

▫ Keristen Greek Revarevadia ese edena dala toi ai Iesu ena Mesia dagina idia hamomokania?

Ginigunana be Iesu ena sene tubudia edia ladadia edia lisi. (Mataio 1:​1-16; Luka 3:​23-38) Iharuana be edia anina idia vara vadaeni peroveta herevadia. Peroveta herevadia momo, Daniel 9:​25 hegeregerena, ese idia hahedinaraia Iesu be Mesia. Ihatoina be Dirava sibona ena hereva; nega toi ena gadona be guba amo ia mai. (Mataio 17:5; Luka 3:​21, 22; Ioane 12:28)​—10/1, rau 10, 12.

▫ Iesu ia gwau: “Noa ena nega bamona, Taunimanima ena Natuna do ia [noho] neganai unai bamona gaudia do idia vara.” (Mataio 24:37) Ena hereva ena anina be dahaka?

Abata Badana ese tanobada oromana dikana ia do haorea lasi neganai, Noa be lagani momo lalodiai lagatoi ia karaia bona kara dika taudia ia sisiba henidia. Unai hegeregerena, Keriso ia lou mai hehuni vadaeni murinai, lagani momo lalodiai tanobada hegegemadai taunimanima idia haroro henidia, bena hisihisi bada hereana do ia vara.​—10/1, rau 16.

▫ Famili Bible stadi karaia dalana namona be dahaka?

Namona be nega oi hidia stadi totona. Namo lasi TV raraia karana eiava ma kara ta ese unai nega ia haorea. Famili do idia durua herevadia umui stadilaidia be namo. Henanadai idauidau be emu natudia oi henidia, unai amo do oi diba idia stadilaia herevadia idia lalo-pararalaidia eiava lasi. (Mataio 17:25) Stadi neganai moale mamina oi havaraia. Stadi be mai emu goada ida oi karaia, bona emu natuna iboudiai be stadi lalonai ahuna idia abia be namo.​—10/15, rau 17.

▫ Rara ena anina be reana aniani ai idia atoa be Keristen taudia ese do idia laloa momo be namo, a?

Bema ta ia hereva kava ia gwau rara be reana aniani ta ai ia noho, namona be Keristen taudia ese unai do idia laloa momo lasi, bona namona be aniani ena anina herevadia paketi o tini ai sekedia karana do idia hekwarahilaia lasi bona vamu hoihoilaia taudia do idia nanadailaidia momo lasi. To, bema Keristen taudia idia diba edia gabu ai momo ese rara be aniani ai eiava muramura ai idia atoa, namona be idia naria namonamo bona Dirava ena taravatu rara dekenai idia badinaia. (Kara 15:​28, 29)​—10/15, rau 30-1.

▫ Israel ai lauma gaudia hadibalaidia dalana be Hereva Lada-isidia bukana ese edena bamona ia hahedinaraia namonamo?

Ia hahedinaraia ena gaukara be inai gau hereadia be “Iehova gari henia” dalana ai “diba lasi taudia” ia hadibalaidia: aonega, matahakani, lalo-parara, hahemaoro maoromaoro, lalohadai maoromaorodia, diba, bona laloa namonamo dalana. (Hereva Lada-isidia 1:​1-7; 2:​1-14)​—11/1, rau 12.

▫ Memero kekeni ese edukeisini edena bamona idia laloa be namo?

Namona be Keristen taudia idia laloa, edukeisini amo idia tahua gauna idia davaria diba. Hari inai dina gabedia ai, edia ura be, bema mai dalana edia diba hegeregerena hesiai gaukarana do idia karaia nega ibounai.​—11/1, rau 18.

▫ Dahaka dainai Iehova ese Israel taudia ia haganidia edia gau edia karoa namba ten do idia henia?

Unai amo do idia hahedinaraia iena kara namo idia laloa bada, bona Levi taudia do idia durudia danu, bena Levi taudia ese edia gaukara do idia tahudia guna diba, unai gaukara ta be Taravatu hahedibalaia gaukarana. (2 Sisiga 17:​7-9 itaia.)​—12/1, rau 9.

▫ Keristen taudia edia gau edia karoa namba ten be dahaka? (Malaki 3:10)

Idia ese iseda gau edia kahana idia laulaulaia, Iehova dekenai ita mailaidia, o iena hesiai lao henia karana ai ita iusilaidia; unai be iseda lalokau ia enai ena toana, bona unai amo ita hahedinaraia ita diba ita be iena.​—12/1, rau 15.