Tanobada ena Moni ena Siahu Idia Perovetalaia

LAGANI 1987 ai stok maketi ia dika dainai, London magasin ta ladana Accountancy Age ia gwau, hari inai negai bisinesi taudia haida ese babalau amo hisiu toadia idia tahua taudia edia heduru idia tahua, edia bisinesi ai do idia vara gaudia do idia perovetalaidia totona.

Unai bamona babalau tauna ta ese moni ena siahu be lagani 30 lalodiai dina ta ta ia daekau diho toana be hisiu badadia edia heau daladia ida ia hahegeregeredia. Unai amo ia gwau nega vairai moni ena siahu do ia edena bamona. Ena be lagani 1987 vairanai iena heduru idia tahua taudia momo ese ena hereva idia abia dae lasi, to ia davaria, hari inai negai bisinesi taudia aukadia danu edia lalodia idia hegeregere iena hereva do idia kamonai.

Unai bamona babalau tauna ma ta ese taunimanima edia vara dinadia amo edia kara korikori ia tahua bona bisinesi karadia karaia negadia namodia edia toadia ia tahudia danu. Ma ta ia laloa siliva ena davana ia senesi, hua ena toana ia senesi hegeregerena. Ia davaria bema ia kerere sisina iena heduru idia tahua taudia ese idia samania haraga.

Moni ena siahu perovetalaia herevana ta do ia vara momokani. Unai be hisiu toadia idia diba taudia edia peroveta herevana ta lasi. Unai hereva be Bible lalonai, “koikoi diba lasi” Diravana Iehova ese ia havaraia herevana. (Tito 1:2) Ena peroveta tauna Esekiel amo ia gwau: “Edia siliva be ariara ai do idia negea, bona edia golo be gau mirona ai do ia lao. Iehova ena badu dinana ai, edia siliva bona edia golo ese do idia hamauridia diba lasi.”​—Esekiel 7:19.

Unai be edena negai do ia vara? Iesu ese ia perovetalaia negana, “hisihisi bada herea” negana, ai do ia vara; Esekiel ese unai nega ia gwauraia “Iehova ena badu dinana.” (Mataio 24:21; Esekiel 7:19) Moni momo ese taunimanima do ia hamauridia lasi, herevana hisiu toadia idia diba taudia ese dahaka idia perovetalaia. Tanobada ibounai ena politikol, tomadiho, bona bisinesi oreadia dikadia iboudiai do ia kokidia neganai, taunimanima hamauridia karana tamona be inai: Hahemauri Tauna Hereadaena, Iehova Dirava, abidadama henia karana.​—Hereva Lada-isidia 3:​5, 6; Sefania 2:3; 2 Petero 2:9.