“Tano ena Herahera”

GAUKARA be lasi. Gau edia davadia idia bada daekau. Ogogami. Bisinesi momo idia dika. Unai bamona herevadia be niuspepa ai idia hedinarai loulou. Idia hahedinaraia taunimanima milion milion idia hekwarahi bada, aniani, dabua, bona mahuta gabudia abidia totona.

Abidadama taudia bona abidadama lasi taudia ese unai idia hekwarahilaia. To abidadama taudia ese heduru idia abia. Iesu ese manau taudia haida ia hereva henidia, ia gwau: “Atai manu mani umui itaia. Idia be hadoa lasi, idia geia lasi, naria gabuna dekenai aniani idia haboua lasi. To emui Tamana guba dekenai noho ese unai manu ia naria namonamo. Umui be manu umui hanaia, ani?”​—Mataio 6:26.

Iesu ma ia gwau: “Tano ena herahera edia tubu dalana mani umui itaia, idia gaukara lasi, dabua idia turia lasi. To umui lau hamaoroa, Solomona be mai ena kohu momo to iena dabua be herahera ta ena hairai bamona lasi. . . . Dirava ese unai gaudia edia hairai ia henia. Be, ia ese umui dekenai danu dabua do ia henia namonamo lasi, a?”​—Mataio 6:​28-30.

Unai ena anina be Keristen tauna do ia gaukara lasi a? Lasi vaitani! Keristen tauna do ia gaukara ena diba hegeregerena, ena tauanina durua gaudia edia davana karaia totona. Aposetolo Paulo ia gwau: “Bema tau ta gaukara ia ura lasi neganai, aniani ta umui henia lasi.” (2 Tesalonika 3:10) Keristen tauna ia diba Dirava ese ia naria bona ia gimaia. Unai dainai, tanobada ena lalo-metau gaudia ia lalo-hekwarahilaidia bada lasi. Hekwarahi negadiai danu lauma gaudia ia tahudia guna. Iesu ena hereva ia abia dae: “Iena Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.”​—Mataio 6:33.