Inai Oi Laloatao, A?

Vanegai Gima Kohorona magasin gaudia oi lalodia namonamo, a? Bema oibe, do oi moale henu herevadia oi lalodia lou totona:

▫ Iesu ena dala idia badinaia taudia totona Iehova ese ia hahedinaraia “namo ena toana ta” be dahaka? (Salamo 86:17)

“Namo ena toana ta” ese gunaguna Keristen taudia ia hagoadadia dagedage idia haheaukalaia totona. (1 Tesalonika 1:6) Hari inai nega lalonai be unai bamona danu, bona Iehova, “gau namodia ibounai, bona harihari gaudia namodia momokani ibounai” ia Henia Tauna, ia moale bona “Lauma Helaga idia noinoi taudia dekenai do ia henidia.” (Iakobo 1:17; Luka 11:13) Lauma helaga ena moale dainai Iesu murinai idia raka taudia dekenai “namo ena toana ta” ia hedinarai.​—12/15, rau 18-19.

▫ Dahaka dainai koikoi kara dekenai Dirava ena lalohadai ita abia dae be gau badana?

Salamo 5:6 ia gwau Dirava ese ‘koikoi taudia do ia aladia mase.’ Apokalupo 21:8 be ma ia gwau koikoi taudia ibounai edia ahuna be “mase iharuana.” Unai dainai, koikoi kara dekenai Dirava ena lalohadai bema ita abia dae, hereva momokani do ita gwauraia bona iena harihari gauna, mauri, do ita abia.​—12/15, rau 23.

▫ Samaria taudia edia tomadiho dalana be edena bamona? (Ioane 4:20)

Edia tomadiho dala idauna dekenai, Samaria taudia be Pentateuch, Mose ena buka ginigunadia ima sibodia idia abidia dae Revareva Helagadia. Lagani 500 B.C.E. bamona murinai, dubu ta idia haginia Gerisim Ororona ai, unai be Ierusalem dekenai Dirava ena dubu amo ia idau. Ena be Samaria ena dubu idia hadikaia ore, to ema bona hari lagani ta ta iboudiai Gerisim dekenai Paseka ariana idia ania.​—1/1, rau 25.

▫ Keristen taudia be tanobada hadikaia koua karadia eiava tanobada hagoevadia karadia idia tahua momo be namo, a?

Iesu be iena nega lalonai idia noho hekwakwanai momo ia hamaoromaorodia toho lasi. Iena Mesia Basileiana amo Iehova be tanobada ibounai dekenai iena taravatu maorodia ia hagugurua neganai, tanobada hadikaia karadia be do idia ore ela bona hanaihanai. Unai dainai, Iehova ena Witness taudia idia laloa namonamo. Dekena taudia idia lalokau henidia dainai ma haida edia kohu idia matauraia, to Dirava ena Basileia harorolaia gaukarana idia atoa guna be maoro. (Mataio 6:33)​—1/1, rau 31.

▫ Edena daladia ai Iesu be diari loalaia tauna ai ia lao? (Ioane 8:12)

Iesu be Dirava ena Basileia ena sivarai namona harorolaia gaukarana ia goadalaia. (Luka 4:43; Ioane 18:37) Danu, ia ese tomadiho ena hahediba hereva koikoidia edia kerere ia gwauraia hedinarai, bona unai amo ia ese lauma dalanai tomadiho amo idia guidia vadaeni taudia ia ruhadia. (Mataio 15:​3-9) Tanobada ena diari ai ia lao dalana hereadaena be iena mauri goevadaena ia atoa diho, taunimanima edia mauri davana ia karaia totona. (Mataio 20:28; Ioane 3:16)​—1/15, rau 10-11.

▫ Dirava ita kamonai henia be maoro ena badina haida be dahaka?

Iehova be tanobada bona guba edia Pavapava Badana, bona unai dainai ita kamonai henia be maoro. Danu, Iehova be siahu ibounai Diravana dainai, ta ese ena siahu ia koua diba lasi, unai dainai iboudiai ese idia kamonai henia be namo. Taunimanima bona aneru ia havaradia edia Havaraia Tauna ena ura idia karaia totona, bona iboudiai be mai edia maduna Dirava idia kamonai henia totona.​—2/1, rau 10-11.

▫ Iosef be Potifara ena adavana ida ia heudahanai lasi totona dahaka ese ia durua?

Siahu badana ta ese Iosef ena darana ia veria. Iena turana karana Iehova dekenai ia laloa bada bona ia diba bema ia be unai hahine ida do ia heudahanai ia ese unai hahine ena adavana mo sibona lasi do ia kara dika henia, to Dirava danu do ia kara dika henia.​—2/15, rau 21.

▫ Iesu ia gwau neganai, “Hereva momokani be lau”, iena hereva ena anina be dahaka? (Ioane 14:6)

Iesu be hereva momokani ia herevalaia bona ia hadibalaia sibona lasi; iena mauri dekenai ia hahedinaraia bona ia be hereva momokani. Unai dainai, Keristen dalana be lalohadai ta sibona lasi; to ia be mauri dalana ta.​—3/1, rau 15.

▫ Salamo 51 dekenai dahaka hereva ese ita ia durua?

Unai salamo ese ita ia hadibaia bema ita kara dika to murinai ita helalo-kerehai momokani, bona iseda lalokau guba Tamana ita noinoi henia ena hebogahisi ita abia totona, do ia kamonai bona lalo-metau amo ita do ia hamauria. To, namona be ita sori bada herea gauna be Iehova ena ladana ita hadikaia.​—3/15, rau 18.

▫ Ranu bapatisona ese dahaka ia laulaulaia?

Bapatiso ese ta ena gwauhamata Iehova Dirava dekenai ia laulaulaia. Ranu lalonai idia hadihoa ese ia hahedinaraia bapatiso idia abia taudia be sibodia idia laloa bada mauri dalana dekenai idia mase. Ranu amo idia daekau ese ia hahedinaraia hari idia mauri Dirava ena ura idia karaia totona, edia mauri lalonai unai idia atoa guna. (Mataio 16:24)​—4/1, rau 5-6.