Oi Laloa Inai ena Davana be Hida?

GAU ta oi diba a, emu lalona ia hegeregere emu gau iboudiai do oi henia do oi abia totona? Iesu ese unai bamona gauna na iena hahediba taudia ia hamaorolaidia.

Ia gwau: “Guba Basileia be hoihoi tauna ta bamona, davana bada nadi namodia ia tahua. Nadi namo herea ta ia davaria, vadaeni ia lao, ena gau ibounai ia hoia lao, unai nadi namo herea ia hoia.”​—Mataio 13:​45, 46.

Unai hoihoi tauna ena lalona ia hegeregere ena gau iboudiai do ia haboiodia, unai “nadi,” Dirava ena Basileia, do ia abia totona. Badina be tanobada ai gau ta be ia ida ia hegeregere lasi. Dirava ena Basileia ese tuari, hitolo, raskol karadia bona dagedage karadia do ia haoredia. (Salamo 72:​4-8, 13, 14) Basileia henunai, kara dika, gorere, bona mase danu do idia ore. (Apokalupo 21:​4, 5) Unai dainai Lohiabada ia gwau, do ita guriguri do ita gwau, “Oiemu Basileia do ia mai.”​—Mataio 6:​9, 10.

Dahaka do oi henia, Basileia ena hahenamo abidia totona? Idia be davana lasi. To do oi abidia totona, namona be Basileia do oi dibaia, do oi abia dae ia be gau korikorina, bona do oi tahua guna. Unai bamona oi karaia diba a? Baibel ena hereva ese oi do ia durua. Mani Iehova ena Witness taudia edia heduru oi abia dae, bena oi do idia durua, Dirava ena Basileia bona hari inai negai danu oi do ia hanamoa dalana do oi dibaia totona.