Headava Varodia Idia Manoka

HAHINE matamatana ta ese ena beibi ia rosia. Bena karaharaga mai ena badu ida foloa ai ia hamorua. Hora haida murinai, madi mero ia mase. Hahine ia gwau: “Lau hamorua badina be egu adavana ese ena bese ia laloa lasi dainai.” Ia badulaia gauna be ena adavana ida ia herevalaia lasi, to ena beibi, kerere lasi beibina, ia badu henia.

Hahine ta ta sibodia be unai bamona idia karaia, to idia momo edia mamina be unai hahine ena bamona. Taunimanima ese edia headava do idia kwalimulaia dalana be ia auka ia lao. Magasin ta ladana Journal of Marriage and the Family ia gwau, hari inai negai United States ai headava momo idia kwalimu lasi, unai dainai lalo-parara tauna ese headava gwauhamatana aukana do ia karaia lasi.

Hari inai nega dikana ai, heudahanai, lalo-tamona lasi karana, abitorehai, ravana bona nakimi ida heai karana, bona ta be sibona ena ura ia tahua karana ese ruma bese lalodiai dika idia havaraia, bona unai dainai momo ese edia headava idia hadokoa. Katolik Tomadiho Oreana ese headava hadokoa karana ia abia dae lasi, to Japan ai Katolik taudia momo ese edia headava idia hadokoa bena idia headava lou, unai dainai unai orea ese komiti ta ia haginia unai taudia edia hekwarahi hamaragia totona. Headava hadokoa karana dainai idia vara hekwakwanaidia ese tomadiho taudia momo idia hahekwarahidia.

Taunimanima momo ese edia headava idia hadokoa vadaeni, to unai be hekwakwanai badana ta ena kahana maragina mo. United States ai inai gau idia tahua taudia idia davaria, taunimanima momo ese edia headava idia hadokoa badina be ia dika ia lao dainai, edia headava hadokoa haraga dalana idia davaria dainai lasi. Edia headava naria dalana idia tahua goadagoada lasi, bona edia headava gwauhamatana idia laloa bada lasi, unai dainai headava ena namo ia maragi ia lao. Taunimanima momo edia headava be koukouna mo, idia mahuta hebou lasi bona idia hereva heheni lasi. Haida edia lalohadai be Japan hahinena ta ena lalohadai bamona. Ia ese sibona ena gara gabuna ia hoia, ia gwau, ‘Lau ura lasi egu adavana ida do ai noho hebou gara tamona ai.’ Madi, unai bamona taudia ese edia headava idia hadokoa lasi, to edia headava amo moale idia abia lasi.

Isao be unai bamona. Ia headava kava dainai, ena lalona ese ia doria lasi sibona ena ura tahua dalana do ia rakatania totona. Ena gaukara amo moni bada ia abia, to ibounai be sibona ena aniani bona inuinu ai ia haorea kava, ena ruma besena ia naria lasi. Unai dainai ia bona ena adavana idia heai hanaihanai. Isao ia gwau: “Hekwakwanai lau davaria negadiai, egu ruma lau lou henia bona egu famili taudia lau badu henidia.” Dina iboudiai edia headava hadokoa dalana idia heailaia.

Tatau bona hahine momo ese edia headava dikadia idia haheaukalaidia noho. Herevana edia headava idia hadokoa eiava lasi, to moale idia davaria lasi. Edia headava do idia kwalimulaia dalana ta ia noho a? Edia headava varodia be edena bamona do idia ha-aukadia?