Nega ta Uda Badana ta Oi Ha-Araia A?

LASI, oi gwau. To, reana oi ese! Hahediba tauna Iakobo ena hereva mani oi kamonai; ia gwau: “Mala be gau maragina, to ia be hekokoroku momo. Lahi danu umui laloa. Lahi maragina ese uda bada herea ia araia ore diba.”​—Iakobo 3:5.

Taunimanima be edia maladia amo idia hereva diba, to madi idia momo ese idia gaukaralaidia kerere! Edia maladia amo idia hereva koikoi, idia gwaugwau, haida edia ladadia idia hadikadia, bona helogohelogo idia havaraia. Adolf Hitler ese ena malana amo bese ta ia ha-uraia do idia tuari totona​—‘uda badana araia’ karana unai!

Ura namo taudia ese danu ‘uda maragina idia ha-araia’ diba. Nega ta hereva ta oi gwauraia bena maoromaoro oi diba oi gwauraia be namo lasi, a? Bema oibe, Iakobo ena hereva ena anina oi lalo-pararalaia; ia gwau: “Mala be tau ta ese ia hamanadaia diba lasi.”​—Iakobo 3:8.

To, iseda maladia be namo havaraia totona ita gaukaralaidia toho diba. Ita ta ta ita gwau diba: “Lauegu dala do lau naridia namonamo, lauegu malana amo kara dika do lau havaraia na garina.” (Salamo 39:1) Taunimanima ita gwau henidia be dika, edia lalodia ita hagoadadia toho be namo. Eda malana amo ita hadikadia be dika, ita hanamodia be namo. Ita koikoi be dika, hereva momokani ita gwauraia bona ita hahediba be namo. Ta be ena lalo-goeva amo ia hereva neganai, ena malana ese hahegoada ia mailaia. Iesu ese ena malana ia gaukaralaia, hahemauri dalana be taunimanima ia hadibalaidia totona.

Momokani, “mase bona mauri na mala ena siahu lalonai idia noho.” (Hereva Lada-isidia 18:21) Emu malana ese mase o mauri ia havaraia a? Ta ese Dirava ia guriguri henia, ia gwau: “Egu malana ese emu hereva do ia anelaia, badina be emu hahegani iboudiai na maoromaoro.” (Salamo 119:172) Bema ita tohotohoa, iseda malana be namo havaraia totona do ita gaukaralaia.

[Picture on page 32]

U.S. Forest Service photo