Lau Badu Eiava Egu Tauanina Ia Goada?
DAIKA ia badu lasi? Ita ibounai be nega haida ita badu. Nega haida iseda badu be mai ena maoro. To, nega momo, iseda badu (eiava iseda badu ena siahu) be mai ena maoro lasi, ani?
Baibel ese ita ia hadibaia, ia gwau: “Oi badu lasi bona dagedage oi rakatania. Emu lalona oi hahekwarahia lasi; unai be kara dika ia havaraia.” (Salamo 37:8) Unai bamona sisiba be aonega dalana, a? Vaira neganai, ena anina be dahaka emu tauanina ena goada dekenai?
The New York Times niuspepa ena “Tauanina Ena Goada” ia sivarailaia kahana dekenai, ia gwau:
“Idia badu dikadika taudia momo, eiava ta ena hereva o kara idia badulaia haraga bona idia laloa momo taudia, be reana sibodia idia hadikaia. Reana sibodia idia hamasea.
“Unai kara idia tahua taudia be vanegai idia stadilaia gaudia amo idia diba, reana badu hanaihanai karana ese tauanina ia hadikaia. Idia gwau ia be kuku ania karana, tauanina bada, bona digara ania momo karana ena dika bamona, eiava unai dika ia hanaia, unai amo mase dalana ia havaraia haraga diba.
“Dr. Redford Williams, Duke University Medical Center dekenai, taunimanima edia kara totona muramura idia henia karana ia tahua tauna, ia gwau: ‘Unai kara ai tahua neganai, ai davaria tauanina hadikaia gauna ta be dagedage, kerere tahua haraga, bona badu karana.’ ”
Idia tahua gaudia ese idia hahedinaraia, dina ta ta iboudiai hekwakwanai idia badulaia taudia edia tauanina lalonai, tauanina hahekwarahia muramuradia momo idia vara. Nega momo idia badu dainai, edia tauanina ia naria diba eiava ia hadikaia diba siahuna idia hakererea, bona unai dainai kudou bona rara goreredia idia abia diba.
Reana haida idia gwau, ‘Egu kara be vaia unai bamona’ eiava, ‘Lau tubu neganai be unai bamona sibona.’ To ai gwau, bema Dirava ena sisiba oi badinaia, emu kara oi haidaua diba. Emu Baibel lalonai, iena sisiba badu dekenai oi duahia Hereva Lada-isidia 14:29, 30; 22:24, 25; Efeso 4:26; bona Iakobo 1:19, 20 dekenai.
Unai sisiba, Dirava ena amo, be reana emu tauanina ena goada ia hanamoa bona emu mauri ia halataia. Times niuspepa ia gwau: “Tahua taudia momo idia gwau, bema badu haraga taudia be dagedage karana idia haidaua, edia lagani matamata negana ai idia mase dalana idia koua diba.”