Basileia Haroro Ripoti

Baibel amo Ia Abia Lalohadaina Ia Badinaia

ISRAEL pavapavana David ese Iehova ia guriguri henia, ia gwau: “Lau be egu kara maoromaoro ai do lau raka. Mani lau oi hamauria bona oi lalo namo henia.” (Salamo 26:11) Bena Iehova ese ia lalo namo henia, ena kara maoromaoro ia badinaia dainai. Iehova ese Iesu danu ia hanamoa, Iena ura ia karaia dainai, bona mero ta Colombia ai ia hanamoa, badina be Baibel ena hereva hegeregerena ena lalona ia hadaia, bena unai ena lalohadai ia badinaia. Hari mero ia gwau:

“Lau be Iehova ena Witness taudia ida Baibel ai stadilaia matama neganai, Katolik sikulina ta ai lau sikuli noho. Egu lalona ia hegeregere lasi Mass do lau lao, unai dainai hed-tisa bona narimai taudia ma rua lau noidia, do idia gwau maoro, Mass do lau lao lasi. Ena be idia gwau maoro, to haida ese lau idia doria toho do lau lao totona. Iehova ena Witness taudia edia orea lalonai bapatiso lau abia murinai, edia hedori idia habadaia. Tamagu ia gwau bema sikuli amo lau idia hadokoa, ruma amo lau do ia lulua. Iena lalohadai be iunivesiti do lau lao bena moni gaukarana namona do lau abia.

“Hed-tisa ia gwau loulou Katolik tomadiho karadia idia karaia lasi taudia be panisi do idia abia. Lagani ena Mass negana ginigunana ai lau komu. Bena lau ese buklet ta ladana Sikuli bona Iehova ena Witness Taudia be egu tisi lau henia, bona lau hamaoroa lau be Iehova ena Witness tauna dainai Mass lau lao diba lasi. Ia gwau: ‘Sikuli idauna oi tahua matama be namo.’ Lau diba bema sikuli amo lau do idia hadokoa neganai tamagu ese ruma amo lau do ia lulua. To Iehova lau guriguri henia, bona egu bamona sikuli ai lau haroro henidia goevagoeva noho.

“Holide negana murinai, Mass negana ia ginidae lou neganai, hed-tisa bona fada taudia oredia be dubu vairanai idia narimai, emai kerere be do ai hamaorolaidia. Lau gari bada. Lau vareai bona lau helai, to egu lalona ese lau ia hahisia. Ane idia abia matama neganai, lau laloa, ‘Dahaka dainai iniseniai lau helai? Iehova be egu Dirava. Lau gari dainai ia lau gorea be maoro lasi. Lau dadaraia diba lasi. Lau do ia rakatania lasi.’ Lau guriguri, lau noia do ia hagoadagu. Bena dubu amo lau raka lasi, bona hed-tisa vairanai lau ginidae. Lau hamaoroa, lau gwau: ‘Tisa e, lau mai be egu kerere gwauraidia totona lasi.’ Ia gwau: ‘Lau diba vadaeni.’ Lau hamaoroa egu lalona ia hegeregere lasi Mass ai do lau vareai; panisi do lau abia be herevana, badina be Baibel amo lau dibadia gaudia lau dadaraidia diba lasi.

“Ia kiri henigu bona ia gwau: ‘Umui Witness taudia iboudiai lau hanamoa. Dirava ena ura umui tahua guna, bona ena taravatu umui badinadia, herevana dahaka do ia vara. Inai emu kara namo hereana do oi karaia noho be namo. Lau ura Katolik taudia iboudiai be umui hegeregerena Dirava do idia lalokau henia bada mai edia lalo-siahu ida. Lau gwau maoro inai, harihari amo, emai tomadiho karadia ai do oi vareai lasi.’ Lau moale dikadika! Baibel amo lau abia lalohadaina lau badinaia dainai, Iehova ese lau ia hanamoa.

“Kerukeru ia ese sikuli memerodia ia hereva henidia, ia gwau: ‘Tomadiho oreadia idaudia ese ita idia hanaia. Dirava ena hesiai idia lao henia mai edia lalo-siahu bona mai edia ura bada ida; dahaka dainai ita be idia hegeregeredia lasi?’

“Gabeai unai hed-tisa idia siaia lao Roma, bona hed-tisa matamatana ese egu kara ia laloa lasi. Egu tamana ese ruma ia rakatania, unai dainai lau be mai egu dala, sikuli do lau haorea murinai pioneer gaukarana do lau karaia.”

Iehova ese hari mero ia hanamoa, badina be Baibel amo ia abia lalohadaina ia badinaia dainai. Iena ura idia karaia toho taudia iboudiai be unai bamona do ia hanamodia.​—Hereva Lada-isidia 3:​5, 6.