“Iehova Ena Witness Taudia be Lau Idia Naria!”

HARI inai nega gabedia ai, ia hedinarai goevagoeva taunimanima momo “idia dagedage, kara namodia do idia ura henia lasi.” (2 Timoteo 3:1, 3) West Africa dekenai, Watch Tower Society ena brens opesi volantia haroro tauna ta Isaac ia davaria unai be momokani. Iena sivarai be inai:

“January 1992 lalonai, taxi ta lalonai lau bona guia taudia ima ida taunimanima momo lasi dalana dekenai ai lao. Lau badinai ia helai hahinena ida lau herevahereva, bona mai moale danu Baibel buklet ta lau dekena amo ia abia.

“Haraga herea, adorahi 4 okaloka bamona, number plates lasi motuka matamatana ta be aiemai dala ia koua, bona aiemai motuka be mai regerege bada danu ia stopu haraga. Tatau badadia toi, idia ta ta be mai ena ipidi, be unai motuka amo idia diho bona emai motuka ena iduara idia kehoa. Idia ta ia boiboi, ia gwau, ‘Umui ibounai, umui raka lasi.’

“Ma tau ta ese egu buka baege ia dogoatao. Baibel bukadia sibona ia itaia neganai, baege ia negea. Ipidi be lau dekenai ia duduia, bena ia henanadai, ‘Ma dahaka danu oi dogoatao?’ Egu puse lalonai ia noho monina lau henia haraga. Ia henanadai, ‘Unai sibona, a?’ Lau hamaoroa lau be Iehova ena Witness ta bona Witness taudia idia koikoi lasi. Egu puse ia dogoatao, bena lauegu Watch Tower identity kadi ia itaia, bena ia gwau, ‘Vadaeni, Watchtower. Iniseniai oi naria.’

“Murinai, taxi lalonai lau hereva henia hahinena ia itaia. Iena ageva be haraga ia kokia bona ena puse lalonai ia noho monina ia henia. Raskol tauna ia itaia unai hahine ena heudeheude imana lalonai buklet ia noho, bona ia laloa ai loaloa hebou, unai dainai ena imana amo ia hahedinaraia ia ura lau ida ia gini noho.

“Unai ibounai ia vara lalonai, mai edia ipidi raskol taudia ma haida be mai dagedage bada ida ai danu idia loaloa taudia idia botadia. Taxi taria tauna bona ai danu ia laolao tauna ma ta idia botadia bona edia gau idia henaodia. Henao tauna ta be hahine iharuana ena ageva ia dogoatao. Unai hahine ese ia koua toho neganai, iena kwarana bona kemena be ipidi ena au kahana amo idia botaia dikadika ela bona ia mase. Hahine ihatoina be motuka amo idia veria oho bona kemena dekenai idia pidia. Madi, ia danu ia mase. Lau bona lau ida ia gini hahine matamatana idia hadikaia lasi.

“Gabeai, ai ia davaria motuka taria tauna ta ena motuka dekenai ai guia neganai, unai hahine ia gari bada dainai ia gwau loulou, ‘Iehova ena Witness taudia be lau idia naria!’ ”