Iseda Tadikaka Rwanda amo Edia Abidadama Bona Edia Boga-Auka

LAGANI 1994 ena matamanai, tanobada taudia idia hoa bada, ala-ala bada herea sivaraina Africa tanona Rwanda amo idia kamonai neganai. Unai ia vara, Rwanda besedia rua, nega daudau lalonai idia inai heheni besedia, be idia tuari heheni neganai.

Heiriheiri bada ia vara dainai, Iehova ena Witness taudia 2,000 mai kahana be Rwanda amo idia heau mauri. Idia 1,300 bamona be kamepa ai idia ginidae, Zaire bona Tanzania ai, to haida idia roho mauri diba lasi. Madi, iseda tadikaka bona taihu, tatau, hahine, bona memero kekeni, 400 bamona be unai dagedage bada hereana lalonai idia mase. Keristen taudia tanobada hegegemadai ese unai kara maoromaoro taudia mai edia boga-auka be idia lalohisihisilaidia, bona Baibel ena toreisi lou gwauhamatana idia helarolaia.​—Ioane 11:25.

Iseda tadikaka bona taihu, idia roho mauri taudia, be edena bamona? Elda taudia haida be tano haida amo idia lao, unai do idia tahua totona. Edia ripoti ta ia gwau unai dika idia “haheaukalaia mai edia boga-auka bada ida.” Hegeregere, idia noilaidia guna gaudia be Baibel bukadia. Ripoti be ma ia gwau: ‘Ena be gau momo ai idia dabu momokani, to do idia abidia dalana idia laloa bada lasi; idia ura bada lauma anianina do idia abia.’ Bona ena be kamepa idia noholaidia taudia edia mauri be auka herea, to ‘iseda tadikaka idia noho gabuna be goeva momokani.’

Watch Tower Society ese moni idia henia, aniani, bilankesi, dabua, tamaka, bona gorere hanamoa muramuradia hoidia totona. June ena kahana ginigunana ia do ore lasi neganai, iseda tadikaka France ai edia hariharibada dainai, idia ese gau idauidau, edia metau be ton rua bamona, be iseda tadikaka, Rwanda taudia, dekediai idia siaidia vadaeni.

Unai ese iseda tomadiho ena ladana ia hanamoa idia itaia taudia vairadiai, bona unai tadikaka ese unai gau haida be kamepa taudia ma haida idia henidia. Haida idia gwau Iehova ena Witness taudia sibodia mo kamepa lalonai be edia tomadiho oreana taudia ese idia vadivadi henidia.

Iseda tadikaka, Rwanda taudia, edia hisihisi dainai, Baibel ena hereva ta ita laloa lou; ia gwau inai “nega dokonai,” taunimanima do idia “dagedage.” (2 Timoteo 3:​1-5) Iehova ia gwau lasi ena orea taudia be hoa dalanai dagedage bona ala-ala amo do ia hamauridia, to ia gwau ia ese edia abidadama do ia gimaia, bena, Keriso ena Lagani 1,000 Lohia Negana lalonai, hari inai negai idia mase taudia be do ia hatoredia isi lou. (Salamo 91:​1-10) Idia do mauri noho taudia dainai Iehova do ita guriguri henia loulou be namo, do ita noia, inai nega dikana lalonai do ia hagoadadia bona do ia durudia.​—Salamo 46:1.