Dahaka Dainai Kara Dika Taudia Idia Noho Namo?
“DAHAKA dainai kara dika taudia idia mauri ela bona idia buruka?” Kamonai tauna Iobu be idaunegai unai bamona ia henanadai, bona unai nega amo ema bona hari taunimanima momo ese. Tano ta, guna ena ladana idia hatoa Yugoslavia, idia noholaia taudia momo ese unai idia laloa reana, badina be, inai magasin ena vairana ena laulau ai ia hedinarai hahinena hegeregerena, idia ese tuari ia hadikadia taudia idia taitailaidia. Dahaka dainai kara dika taudia idia roho mauri bona idia noho namo? Iobu ena hereva hegeregerena, nega momo “edia ruma be maino sibona, gari ia noho lasi, bona Dirava ena hekwadi auna be idia latanai ia mai lasi.”—Iobu 21:7, 9.
Unai ena anina be dahaka? Dirava ena hesiai ita lao henia, iseda dekena taudia ita lalokau henidia, bona kara dika ita dadaraia, be anina lasi a? Lasi, bona lasi vaitani! Baibel ese lalohadai maorona ita ia henia, ia gwau: “Kara dika taudia oi hereadia toho lasi eiava kara kerere taudia oi tohotohodia lasi. Badina be rei bamona do idia kakoro haraga, bona rei matamatana bamona do idia marai. LOHIABADA oi abidadama henia bona kara namo oi karaia.”—Salamo 37:1-3, The New English Bible.
Oibe, kara dika taudia edia noho namo be nega kwadogi gauna. Edia mauri laganidia be momo lasi, to Dirava ena hesiai idia lao henia taudia be mai edia helaro namona nega vaira ena. Kahirakahira, Dirava ena gwauhamata ena anina do ia vara: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:4) Kara dika taudia lasi, to kara maoromaoro taudia sibodia ese unai nega do idia itaia. Unai ese ita ia hagoadaia, Dirava dekenai do ita raka kahirakahira lao bona iena ura do ita karaia, herevana idia bogaragidiai ita noho taudia edia kara be dika rohoroho!
Bema oi ura ma diba haida do oi abia eiava oi ura ta be emu ruma do ia mai, Baibel stadi, davana lasi gauna, be oi dekenai do ia karaia totona, mani inai adres oi tore henia: IBSA, Box 636, Boroko, N.C.D., P.N.G.