Inai Oi Laloatao, A?

Gima Kohorona magasinidia, vanegai ai halasidia gaudia, ese oi idia durua momokani, a? Vadaeni, inai henanadai amo emu helalotao mani oi tohoa:

▫ Dahaka dainai Iehova ena Witness taudia ese edia dekena taudia idia lao henidia loulou?

Iehova ena Witness taudia idia ura Dirava ena hahenamo be Basileia amo do idia abia, bona Iesu hegeregerena edia dekena taudia idia lalokau henidia dainai, idia ura idia danu ese do idia abia. Unai dainai idia vadivadi henidia loulou. (Mataio 6:​9, 10; 22:​37-39)​—8/15, rau 8, 9.

▫ Dahaka dainai evolusen herevana abia dae karana be abidadama kava karana?

Ena be mauri gauna ta ia senisi bena bese idauna be iena amo ia vara be saiens taudia ese nega ta idia itaia lasi, to evolusen herevana idia abia dae taudia idia gwau mauri gaudia besedia matamatadia idia vara dalana be unai.​—9/1, rau 5.

▫ Ita idia koua bona eda lalona idia hahisia gaudia be edena bamona ita halusidia diba?

Ita karaia diba karadia bema ita lalodia bona ita karaia diba lasi karadia bema ita lalohisihisilaidia lasi, iseda lalona do idia hegeregere. (Salamo 126:​5, 6)​—9/1, rau 28.

▫ Dika gwauatao ena namo be dahaka?

Hetura ia habadaia (Efeso 4:32); maino ia havaraia bona lalo ia hanamoa (Roma 14:19; Kolose 3:​13-15); haida edia dika ita gwauatao neganai, unai ese siboda eda dika gwauatao dalana ia kehoa (Mataio 6:14); bona unai neganai ita laloatao ita be mai eda dika dainai haida ese iseda do idia gwauatao be namo. (Roma 3:23)​—9/15, rau 7.

▫ Amos ena haheitalai ese ita edena bamona ia durua iseda haroro gaukarana lalonai?

Amos hegeregerena, Dirava ena hereva ita haidaua lasi bona ita hamanokaia lasi. Ita haroro mai eda kamonai ida; haida ese idia badulaia be herevana.​—9/15, rau 17.

▫ Dahaka kara Dirava ena be do ita tohotohodia be namo?

Ena orea ia naria namonamo karana bona ena moale. (1 Korinto 14:33; 1 Timoteo 1:11) Ia ese ena orea ia biagua namonamo lalonai moale ia koua lasi.​—10/1, rau 10.

▫ Tama sina ese edia natudia edena bamona idia durudia diba, Iehova ena hesiai do idia lao henia totona?

Gau badana be idia maragi negana amo idia ese kamonai dalana bona Iehova bona tomadiho henia karadia matauraidia dalana do idia hadibalaidia, bena edia hahediba herevadia do idia lalodia boio lasi. (Hereva Lada-isidia 22:6) Namona be edia ura kereredia do idia lalo-pararalaidia, bona do idia durudia do idia hamaoromaorodia totona. (Hereva Lada-isidia 22:15) Bona tiokratik karadia haida do idia gwaurai henidia be namo, do idia tahudia totona.​—10/1, rau 27-8.

▫ Iehova ese dika ia gwauatao dalana edena bamona do ita tohotohoa be namo?

Iehova ese dika ia gwauatao bona ia laloaboio danu. (Ieremia 31:34) Mataio 6:​14, 15 ai, Iesu ese ia hahedinaraia ita danu be unai bamona do ita karaia be gau badana.​—10/15, rau 25-6.

▫ Eda hebogahisi idia koua gaudia toi be dahaka dahaka?

Ita be mai eda kara dika dainai, ita mama diba. Bema ta ita mama henia, do ita kara henia mai eda hebogahisi ida lasi, ani? Bema dagedage karadia ita raraidia loulou, unai danu ese eda hebogahisi do ia koua, badina be hisi-ania taudia do ita hebogahisi henia lasi. Bona, bema siboda eda namo ita tahua, reana do ita hebogahisi lasi. (1 Ioane 3:17)​—11/1, rau 19, 20.

▫ Iobu sivaraina Baibel lalonai ese dahaka ia hadibaia ita?

Unai sivarai dainai, Satana ena koikoi karadia ita diba herea, bona ita diba taunimanima ese edia lalo-maoromaoro amo Dirava ena lohia siahuna idia hamomokania. Iobu hegeregerena, Dirava idia lalokau henia taudia iboudiai be Satana ese ia tohodia. Namona be Iobu hegeregerena do ita haheauka, Satana ena hereva do ita hakoikoia, bena Dirava ena Basileia ena hahenamo do ita abidia.​—11/15, rau 20.

▫ Elda edia orea ena seamani ese idia ta ta edena bamona ia matauraidia diba?

Bema mai dalana, nega taina daudau ia do noho neganai, do idia heboulaidia gaudia edia lista do ia henidia, unai gau do idia lalodia namonamo guna diba mai edia guriguri ida totona. Edia hebou lalonai, edia lalodia do ia anidia toho lasi, to do ia hagoadadia, do idia ‘hereva goadagoada’ totona. (1 Timoteo 3:13)​—12/1, rau 30.