“Dirava Ena Maino ese Taunimanima Edia Diba Ia Hanaia Momokani”

IDAUNEGA amo ema bona hari, Dirava ena hesiai taudia mai edia kamonai edia lalodia be nega ta ta idia hekwarahi bada herea. Unai be momokani vaitani hari inai negai, badina be ‘metau dikadia momo idia vara’ negana be inai! (2 Timoteo 3:1) Aposetolo Paulo ese Keristen taudia ia sisiba henidia, guriguri amo edia lalo-hekwarahi be Iehova dekenai do idia negedia be namo. Bena dahaka do ia vara? “Keriso Iesu umui danu ia hakapua tamona dainai, [Dirava ena] maino ese emui laloa gaudia bona emui kudouna idia mamia gaudia ibounai do ia naria namonamo.”​—Filipi 4:7.

“Dirava ena maino” be dahaka? Ia be Dirava tura henia karana amo ia vara mainona. Unai hetura karana dainai ita diba, herevana iseda lalona idia hekwarahi, to “Iehova ese ena bese taudia do ia rakatanidia lasi.”​—Salamo 94:14.

To ita be unai dainai hisihisi iboudiai amo ita roho mauri lasi. Salamo torea tauna ia gwau: “Kara maoromaoro tauna ena hisihisi be momo.” (Salamo 34:19) To Dirava ena maino ese ita ia durua diba. Edena bamona?

Paulo ia gwau Dirava ena maino ese “taunimanima edia diba ia hanaia momokani.” Lalo-hekwarahi ese iseda lalona be dala idauidau ai ia hametaudia diba. (Kohelete 7:7) To, “siahu badana” ita abia be namo neganai, bona nega oredia ai danu, Dirava ena maino ese ita ia hagoadaia diba.​—2 Korinto 4:7; 2 Timoteo 1:7.

Dirava ena maino ese ita ia gimaia diba danu. Paulo ese Filipi taudia ia hamaorodia, ia gwau: “Inai maino ese emui laloa gaudia bona emui kudouna idia mamia gaudia ibounai do ia naria namonamo.” Inai hereva “naria namonamo” be Greek gado herevana ta, ami taudia edia hereva, ida idia hahegeregerea. Gunaguna unai hereva idia kamonai neganai, gadi taudia idia lalodia, dina bona hanuaboi idia gima noho. Unai hegeregerena, Dirava ena maino ese iseda kudouna bona iseda laloa gaudia be dina bona hanuaboi ia gimadia diba.​—1 Korinto 10:13; ma danu Efeso 4:26 itaia.

Hari inai negai gau momo ita hekwarahilaidia dainai, Dirava ena maino dainai ita tanikiu henia be namo, ani?​—Salamo 18:2; ma danu Esodo 40:38 itaia.