Karaia Urana Harihari Gauna Namona Dirava Amo
IEHOVA be ena havaraia gaudia ia moalelaia. (Salamo 104:31) Iena havaraia karana amo moale mamina ia abia ita itaia diba Genese 1:31 ai: “Dirava ese ia karaia vadaeni gaudia ibounai ia itaia bona momokani idia be namo herea.”
Unai moale be Iehova sibona ese ia mamia lasi. Hahenamo badana ia henia Iesu dekenai, badina be ia dekena amo Dirava ese gau ibounai ia karaia. (Ioane 1:3; Kolose 1:16, 17) Ia be “gaukara diba momo tauna,” bona danu Iesu be “[Iehova] vairanai [ia] moale nega ibounai.”—Hereva Lada-isidia 8:30, 31.
Karaia urana be guba sibona ai ia noho lasi. Eugene Raudsepp ena buka How Creative Are You? lalonai ia torea, ia gwau: “Karaia urana be taunimanima ena kahana badana ta.” Unai ia vara kava lasi, badina Dirava ese taunimanima ia karaia iena toana hegeregerena. (Genese 1:28) Iehova ese karaia urana namona taunimanima dekenai ia atoa.—Iakobo 1:17.
Unai dainai, ita hoa lasi badina Baibel ese ane abia, mavaru, turia, nadua, ima karakara daladia idauidau karadia ia gwauraia namo. (Esodo 35:25, 26; 1 Samuel 8:13; 18:6, 7; 2 Sisiga 2:13, 14) Besalele, ima karakara gaukara tauna, ena diba bada “gau namodia karaia” dekenai be ia gaukaralaia dubu haginia gaukara durua totona. (Esodo 31:3, 4) Idia loaloa momo taudia durua gauna, palai rumana unai, ia havaraia tauna reana be mamoe naria tauna Iabal. (Genese 4:20) David be ane ia torea bona ane abia tauna sibona lasi, miusik gaudia matamata ia havaraia. (2 Sisiga 7:6; Salamo 7:17; Amos 6:5) Reana Miriama be moale hedinaraia mavaruna karaia dalana ia karaia, Isreal taudia be Davara Kakakaka amo idia roho mauri neganai.—Esodo 15:20.
Nega momo karaia urana ia noho dainai tomadiho momokani ia durua. Iesu be haheitalai namodia bona hadibaia sivaraidia ia karaia iena hereva ena anina hahedinaraia totona. Ia murinai idia raka taudia ia hagoadaia “haroro bona hadibaia gaukara dekenai idia gaukara goadagoada.” (1 Timoteo 5:17) Oibe, edia haroro gaukara idia karaia kava lasi. Hadibaia daladia namodia amo idia hahedinaraia ia be diba ta. (Kolose 4:6) Unai be mai anina edia natudia idia hadibaia neganai.—Deuteronomi 6:6, 7; Efeso 6:4.
Unai dainai, Iehova ena havaraia karana ese Ia ia hamoalea bona unai bamona moale be ma haida ese idia mamia diba. Unai be harihari gauna namo hereana ta!