Iehova Ena Witness Taudia Tanobada Hegegemadai​—New Zealand

MOTUMOTU ese Iehova idia hanamoa diba, a? Oibe. Isaia 42:10 (NW) ia gwau: “Iehova dekenai ane matamatana umui abia, tanobada ena dokona amo ia umui hanamoa, . . . umui motumotu bona umui noholaia taudia danu.” New Zealand ena motumotu iboudiai ese Iehova idia hanamoa momokani. New Zealand ena gohu, ororo padadiai davara ia noho gabudia, ororo badadia, aisi gabudia, kone, uda, bona mamoe edia rei gabudia namodia dainai, ia be mai ladana bada tanobada ibounai dekenai. Unai gau ese guba bona tanobada ia karaia Diravana ena siahu bona ena hairai idia hahedinaraia namonamo.

Lagani 1900 murinai, New Zealand idia noholaia taudia haida ese dala goevana ai Iehova tomadiho henia karana bona ena Basileia ena sivarai namona harorolaia gaukarana idia karaia matamaia. Unai nega amo ema bona hari, idia momo idia lao bona edia kara amo Iehova idia hanamoa. Vanegai, Witness tauna ta ese varavara haroro henidia sivaraina namona ta ia kamonai, unai dainai ena lalona ia hadaia iena varavara do ia haroro henidia toho. Ia ese buka ladana Mauri Hanaihanai Paradaiso Lalonai be ena famili taudia momo ia harihari henidia. Unai dainai dahaka ia vara? Ia gwau hari iena taihuna ta bona ena tadikakana ta ese Baibel idia stadilaia, ena vavana ta ese Iehova ena Witness taudia edia orea lalonai bapatiso ia abia vadaeni, bona ma haida ese Dirava ena Hereva momokani be hari idia kamonai. Iena famili be bada​—ena tamana bona sinana, bona ena tadikakana 6 bona ena taihuna 4​—unai dainai ma haida ia haroro henidia diba!

Iehova ena Witness taudia ese Kingdom Hall haginidia totona idia gaukara hebou neganai, unai danu ese Iehova ia hanamoa. Niuspepa torea tauna, Roy Perkins, be Opotiki News, May 7, 1994 gauna, lalonai ia gwau: “Lau be Dirava abidadama henia lasi tauna dainai, unai ruma haginia taudia iboudiai edia gaukara bona edia hekwarahi lau hoalaia. Edia Dirava idia lalokau henia dainai, edia goada bona edia nega bada idia haorea unai gaukara lalonai.

“Saturday bona Sunday ai idia gaukara negana ibounai lalonai, lau be gaukara heailaia karana ta lau itaia lasi bona lau kamonai lasi . . . Hahine be pata, ruma haginia neganai idia gaukaralaia gaudia, latanai idia gini bona tatau badinai idia gaukara. Semenisi gunana be biriki padadia amo idia kokia bona matamatana idia atoa, bona kohu idia abia isi bona idia huaia; unai ibounai idia karaia mai edia moale ida.

“Bona miniti ta be kuku lokua karana ai idia haorea kava lasi. Herevana dahaka gaukara idia karaia, to idia gaukara gabuna ai hodahoda ia goeva; peni ena bonana bona biriki edia kahu sibona ese hodahoda idia hamiroa sisina.”

Opotiki Kongregesen ena elda edia orea ia gwau: “Inai gaukara ibounai ese taoni taudia ia hahoadia. Toana be taunimanima iboudiai ese idia herevalaia. Baibel stadi haida ai hamatamaia vadaeni. Idia ta be ai moalelaia bada; ia be tau ta bona ena adavana dekenai. Idia be tomadiho goadalaia taudia, bona lagani momo lalonai idia ese ai idia hamaoroa edia ruma dekenai do ai lao lasi. Kingdom Hall haginia negana lalonai dina ta ta iboudiai idia mai, bena unai murinai hebou dekenai idia mai. Tau be gabeai ia gwau, ‘Lau itaia umui be Dirava ena orea taudia. Egu mauri ibounai lalonai, egu lalona ai lau ura dikadika inai bamona taudia do lau bamoa.’ ”

Lagani 1993 ai, Otago Daily Times torea tauna ta ese Dunedin ai idia haginia haraga Kingdom Hall ta be inai bamona ia gwauraia: “Unai gaukara be hoa gauna; ia ese edia ura namona bona idia heduru heheni karana be hoa dalanai ia hahedinaraia.” Unai niuspepa be ma ia gwau: “Siti taudia ese ruma badana haginia gaukarana idia itaia mai edia hoa ida. Edia matana vairanai unai ruma ia tubu daekau bamona. Bona reana idia momo idia laloa, bema taunimanima ma haida be unai gaukara taudia hegeregeredia sibodia edia ura hegeregerena idia gaukara hebou mai edia lalo-tamona ida, idia ese ruma hanamoa bona haginia gaukaradia ma haida do idia karaia diba. Kingdom Hall be gaukara hebou dalana amo anina havaraia karana ena toana namona.”

Taunimanima handred momo idia lao unai haginia gaukarana itaia totona. Idia ta, tau badana ta, ia gwau Witness taudia ese “dubu” idia haginidia noho lalonai iena tomadiho oreana ese ena dubu ia hoidia, badina be orea taudia edia momo ia diho. Ia gwau: ‘Bema umui be ma hua 12 umui naria, aiemai dubu ta do umui hoia diba. Ai ese ta do ai hoia, badina be ena davana ai karaia diba lasi. To, momokani, emui haroro taudia idia gaukara davana lasi. . . . Ma danu, emui ruma naridia gaukarana be auka lasi, idia be ruma latadia lasi bona mai edia kohoro lasi. Unai kohoro naria dalana be lasi.’

Ia hedinarai goevagoeva motumotu ese Dirava idia hanamoa diba. Namona be Iehova hanamoa herevadia be unai Pacific motumotuna mai hairaina ai​—bona tanobada hegegemadai​—do idia gwauraia noho!

[Box on page 9]

TANO RIPOTINA

Hesiai Laganina 1994

HARORO TAUDIA EDIA NAMBA BADANA: 12,867

WITNESS TAUNA TAMONA INAI NAMBA AI: 271

MEMORIAL AI IDIA HEBOU TAUDIA: 24,436

PAINIA TAUDIA EDIA AVERES: 1,386

BAIBEL STADI EDIA AVERES: 7,519

BAPATISO ABIA MATAMATA TAUDIA: 568

KONGREGESEN EDIA MOMO: 158

BRENS OPESI: MANUREWA

[Picture on page 9]

Lagani 1930 bamona ai, painia taudia idia lao haroro

[Picture on page 9]

Brens rumadia, Manurewa ai

[Picture on page 9]

Basileia sivaraina idia harorolaia, Devonport, Auckland ai