Edia Lamepa Idia Bodo Lasi

BAIBEL negadiai Iehova ena Witness taudia haida mai edia kamonai ese hekwakwanai bona hekwarahi idia davaria. Haida ese idia koudia toho, bona nega haida toana be idia lusi vadaeni. To idia hesiku lasi. Edia lamepa idia bodo lasi.

Idia ta be peroveta tauna Ieremia, Dirava ese ia siaia, gwau-edeede besena Iuda do ia haroro henidia. Ia haroro, ia gwau haida ese Ierusalema do idia hadikaia ore. (Ieremia 1:​11-19) Unai dainai, nega momo Ieremia ena bese taudia ese ia idia gwau henia, idia laloa iena hereva be koikoi.

Nega ta ai, Ieremia ena peroveta herevana ta dainai hahelaga tauna Pasahuru, Dirava ena dubu naria tauna badana, ese ia botaia, bena ena oda hegeregerena Ieremia be aena koua audia ai idia atoa. Unai dainai Ieremia ia gwau: “Taunimanima ibounai ese lau idia kirikirilaia. Idia ibounai be lau dekenai idia hereva dika noho. Lau ese oiemu hereva lau gwauraia negana ibounai, be lau boiboi, bona oi ese egu gadona oi habadaia, lau gwau, ‘Tuari ia mai noho! Umui ese dika do umui davaria!’ Taunimanima ibounai ese, inai hereva idia kamonai neganai, lau idia hereva dika henia, bona lau idia hahemaraia noho.” Peroveta tauna ena lalona ia manoka momokani dainai, ia gwau: “Lau ese Lohiabada do lau laloaboio, bona iena ladana dekenai do lau hereva lasi.”​—Ieremia 20:​1, 2, 7-9.

To Ieremia ena lalo-manoka ese ia hadarerea lasi. Iehova ena hereva be ma ia herevalaia, ia gwau: “Oiemu hereva be lahi bamona, lauegu lalona ia gabua noho, ela bona lauegu turiana dekenai. Momokani lau ese oiemu hereva lau koua toho auka herea, to lau koua hegeregere lasi.” (Ieremia 20:8, 9) Lauma helaga ese Ieremia ia ha-uraia Dirava ena hereva do ia gwauraia, bena ia hagoadaia dainai ena gaukara ia hagugurua.

Aposetolo Paulo danu ese ena lalona idia hamanokaia diba gaudia momo herea ia davaria. Ia ese sinavai edia abata, lagatoi idia dika, dagedage, bona hekwadi ia haheaukalaia. Unai sibona lasi, to ‘ena lalona danu dina ibounai ia hekwarahi, ekalesia orea ibounai ia naria dainai.’ (2 Korinto 11:​23-28) Oibe, dina iboudiai Paulo be hekwakwanai ia davaridia. Kongregesen matamatadia, haginidia gaukarana ai guna ia durua oreadia, be ia ese ia lalo-hekwarahilaia. Inai danu, ia goevadae lasi, bona ‘ena kopina ia gwadaia giniginina’ ia hisihisilaia, reana unai be ena matana idia namo lasi. (2 Korinto 12:7; Roma 7:15; Galatia 4:15) Paulo be idia dekenai ia noho lasi neganai, haida ese idia gwauraia dika, bena unai sivarai ia kamonai.​—2 Korinto 10:10.

To, ena be Paulo be siahu herea tauna lasi, to unai ibounai ese ena lalona ia hamanokaia vaitani lasi. (2 Korinto 11:​29, 30) Vadaeni, dahaka ese ena ‘lalona lahina’ ia ha-araia noho? Gau ta be, ena bamona ese idia durua, bona idia haida ese idia bamoa ela bona Roma, bena unuseniai ia abia rumana dekenai tuari tauna ta ese ia gimaia. (Kara 28:​14-16) Gau iharuana be, aposetolo ese sibona ena mauri ia laloa maoromaoro. Ia diba, ia kerere lasi, to ia idia dagedage henia taudia bona idia koua toho taudia be kerere. Iena mauri tanobada ai ena dokona be kahirakahira neganai, ena haroro gaukarana ia laloa lou mai ena moale ida, bena ia gwau: “Harihari lauegu kwalimu ahuna, kara maoromaoro ena davana namona, be lau dekenai ia noho hegaegae. . . . Lohiabada, kota biaguna maoromaorona, ese unai davana namona lau dekenai do ia henia.”​—2 Timoteo 4:8.

Gau badana be inai: Guriguri amo Paulo be Iehova Dirava dekenai ia raka kahirakahira lao loulou, bona ‘Lohiabada ese ia durua, bona ia hagoadaia.’ (2 Timoteo 4:17) Paulo ia gwau: “Keriso ese lau ia hasiahua, vadaeni gau ibounai lau goadalaia diba.” (Filipi 4:13) Paulo ese Dirava ia hereva henia, Keristani taudia ida ia herevahereva, bona ia laloa ena haroro gaukarana be mai anina bada; unai ibounai ese Paulo ia durua, Iehova ena hesiai ia lao henia noho totona.

Dirava ese ena lauma amo ia hasiahua dainai, Paulo ia gwau: “Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.” (Galatia 6:​7-9) Anina be mauri hanaihanai do ita abia. Vadaeni, Ieremia, Paulo, bona Iehova ena Witness taudia ma momo mai edia kamonai, Baibel lalonai idia herevalaia taudia, hegeregeredia oi kara. Oibe, idia hegeregeredia oi kara, bena lalo-manoka ese oi do ia hadarerea lasi. Emu lamepa oi naria, bena do ia bodo lasi.​—Mataio 5:​14-16 itaia.

[Pictures on page 25]

Paulo bona Ieremia ese edia lamepa idia naridia bena idia bodo lasi